Áskerı teńizshiler ózderine júktelgen mindetterdi oryndaı otyryp, jylyna 240 kúnnen astam ýaqytqa teńizge shyǵady jáne osy ýaqytta 3600 keme jattyǵýy, sabaqtar men jattyǵýlar ótedi. Olar memlekettik organdarǵa tabıǵatty qorǵaýda kómek kórsetedi, ekologııalyq apattardyń saldaryn joıýǵa jáne basqa da is-sharalarǵa qatysady.
– Qazirgi ýaqytta Qazaqstan Respýblıkasy Qarýly Kúshteriniń Áskerı-teńiz kúshteri aýqymdy mindetterdi sheshýge qabiletti jumys jasaı alatyn jáne jaýyngerlik áleýeti bar ásker túri. Onyń quramyna mına-tartqysh jáne zymyran-artıllerııalyq kemeler, sondaı-aq qosalqy kemeler, jaýyngerlik jáne materıaldyq-tehnıkalyq qamtamasyz etý bólimsheleri, túrli kemeler kiredi, - dedi Áskerı-teńiz kúshteriniń bas qolbasshysy kontr-admıral Sáken Bekjanov.
Áskerı-teńiz kúshteriniń ofıserleri Reseıdiń, Túrkııanyń, Germanııanyń, Qytaıdyń, Ońtústik Koreıanyń, AQSh-tyń jetekshi áskerı oqý oryndarynda bilim alady. Áskerı-teńiz kúshterinde oqý-jattyǵý ortalyǵy quryldy. Aqtaý jáne Oral qalalarynyń ýnıversıtetterinde áskerı kafedralar jumys isteıdi. Onda kelisimshart boıynsha áskerı qyzmetshilerdi daıyndaıdy.
Áskerı-teńiz kúshteriniń júzýge sheber jaýyngerlerin ereksheleıtini – joǵary kásibılik. Olar tikushaqtar men qaıyqtardan desant retinde sýǵa túsiriledi, qarsylastyń kemege jasaǵan shabýylyna toıtarys bere alady, sý asty mınalaryn jáne mınanyń belsendiligin joıýdy oryndaı alady.
Jedel daıarlyq aıasynda áskerı teńizshiler basqa ásker túrleri men tekteriniń quramynan jedel toptarymen jedel-taktıkalyq jıyndarǵa, komandalyq-shtabtyq jattyǵýlarǵa, taktıkalyq-arnaıy oqý-jattyǵýlarǵa qatysady.
Jaýyngerlik daıarlyq barysynda áskerı kemelerdiń ekıpajdary Armııa halyqaralyq oıyndarynyń «Teńiz kýbogy» konkýrsyna daıarlyq sheńberinde kýrstyq mindetter men teńiz bıatlonynyń elementterin pysyqtaıdy. Atalǵan áskerler jarysynda qazaqstandyq teńizshiler júldeli oryndar aldy.
Qarý-jaraq pen áskerı tehnıkany, onyń ishinde jaýyngerlik robottardy paıdalana otyryp qarý-jaraq pen áskerı tehnıkany qoldaný daǵdylaryn, bólimshelerdiń, kemelerdiń úılesimdiligine jáne olardyń jaraqtandyrylýyna erekshe nazar aýdarylady.
2 sáýirde Qazaqstan Áskerı-teńiz Kúshteriniń qurylǵanyna 28 jyl tolýyn atap ótedi.
