Elimizdiń Bas sanıtar dárigeri bıylǵy oqý jylynyń 4 toqsanynda kontıngenti 300 oqýshyǵa deıin qalalyq jáne aýyldyq mektepterdegi sabaqty bala sanyn 25 adamnan asyrmaı dástúrli formatta oqytýǵa ruqsat bergen bolatyn. Shyny kerek, jyl boıy mektep kórmeı, qurby-qurdastarymen aralaspaı, qashyqtan oqýǵa májbúr bolǵan oqýshylar sáýirdiń 1-in asyǵa kútken edi. Alaıda elimizde qaıta kúsheıgen koronavırýs bul jospardy ózgertti. Ásirese sońǵy aptalar boıy «qyzyl aımaqtan» shyǵa almaı kele jatqan Batys Qazaqstan oblysynda balalardyń qaýipsizdigin qaterge tigýge bolmaıdy.
- Táýekeli joǵary aımaqta ornalasqan óńirlerdegi barlyq bilim nysandary Densaýlyq saqtaý mınıstri bekitken qaǵıdaǵa sáıkes sanıtarııalyq-epıdemıologııalyq talaptaryn saqtaýy tıis. Búgin oblys aýmaǵyndaǵy 379 memlekettik mekteptiń 279-ynda sabaq shtattyq rejımde, 100 mektepte aralas formatta bastaldy, - deıdi Batys Qazaqstan oblystyq bilim basqarmasynyń basshysy Aıgúl Myńbaeva.
Ádettegideı oqytyp jatqan – shalǵaı eldi mekenderdegi shaǵyn komplektili mektepter. Olardyń sany barlyq mekteptiń 75 paıyzy bolǵanymen, oblystaǵy barlyq oqýshynyń 25,4%-y ǵana ol mektepterde bilim alady. Al oqýshylardyń 74,6%-y, ıaǵnı 82 myńnan astam oqýshy qashyqtan oqytylýda.
Oblystyń bas sanıtar dárigeri M.Aryspaev bala sany kóp, synyptaǵy oqýshy tyǵyz Bórli, Báıterek aýdandary men Oral qalasynyń mektepterinde ár synyptaǵy bala sanyn 15 adamnan asyrmaı aralas formatta oqytýdy usyndy.
Qala mektepterinde árbir synyp oqýshylaryna ózindik qozǵalys kestesi bekitilip, balalardyń bir-birimen aralaspaýy, ǵımarat ishinde júrip-turý kezinde bir jaqty qozǵalys, ara qashyqtyq qaǵıdalary saqtalýy, qol óńdeýge arnalǵan sanıtaızerlerdiń ár qabatta bolýy, mekteptiń kire berisinda aıaq kıimge arnalǵan dezınfeksııa kilemshesiniń bolýy, mindetti túrde jeldetý, ylǵaldy jınaý, kvarstaý jumystaryn júrgizý, sabaq arasyndaǵy úzilis ár synypqa ártúrli ýaqytqa belgilenýi, sanıtarııalyq-epıdemologııalyq talaptardyń saqtalýyna jaýapty maman taǵaıyndalýy qarastyrylǵan.
«Barlyq mekeme sanıtaızer, antıseptıkalyq qural, termometrııa, kvars shamdary, dıspenser, dezınfeksııalaý quraldary, aqparattyq materıaldarmen qamtamasyz etildi» dedi basqarma basshysy.
Kópshiliktiń suraýyna sáıkes, oqýshylarǵa mektep formasyn saqtaý talap etilmeıtin boldy.
Batys Qazaqstan
