M. Ábilqasymova jýrnalıstermen kezdesken kezde 2021 jyly Agenttik táýekelderdi baǵalaýdyń jańa ádistemesi – ár banktiń jaǵdaıyn zertteıtinin jáne bankterdi táýekel boıynsha bólýge múmkindik beretin SREP táýekelge negizdelgen qadaǵalaý júıesin engizý jumysyn jalǵastyratynyn aıtty.
M. Ábilqasymova naqtylap ótkendeı, basty nazar aktıvterdiń sapasyn baǵalaý elementterin (AQR) jáne qadaǵalaýshy stress-testileýdi (NST) biriktirý arqyly táýekelge negizdelgen baqylaý quraldaryn keńeıtýge baǵyttalady. Bul tásildi Eýropalyq Ortalyq Bank Keshendi baǵalaý prosesiniń bóligi retinde paıdalanady jáne stress-test nátıjeleriniń senimdiliginiń kepili retinde qyzmet etedi.
Agenttik táýelsiz aýdıtorlardy, baǵalaýshylardy jáne konsýltanttardy tartpaı, AQR negizgi elementterin qoldana otyryp, bankterge aýdıt júrgizedi. «Aktıvterdiń sapasyn baǵalaý nátıjeleri birinshi kezekte stress jaǵdaıynda bankter kapıtalynyń jetkiliktiligin baǵalaý maqsatynda kelesi qadaǵalaý stress-testileý úshin paıdalanylatyn bolady. Bıylǵy jyly Agenttik turaqty baqylaý prosesine NST engizýdi josparlap otyr. Ol úshin 2020 jyly saraptamalyq baǵalaý negizinde ótkizilgen stress-testileý ádistemesi jeke táýekelderdi stress-testileýdiń statıstıkalyq modelderin ázirleý turǵysynan jetildiriledi. Álemdegi kóptegen retteýshi qoldanatyn NST eki satyly modeli negizge alynady», dedi Ábilqasymova.
Sondaı-aq aǵymdaǵy jyly bankterdiń táýekeldik beıinine baılanysty jeke qadaǵalaý kapıtaly boıynsha syıaqy tóleý ádistemesin ázirleý josparlanyp jatyr. Banktik emes sektorda qarjylyq retteýshi qadaǵalaý saıasatynda uqsas tásilderdi qoldanady. Osy jyly baǵaly qaǵazdar naryǵyndaǵy negizgi basymdyqtar sandyq jáne sapalyq krıterıılerdi taldaý, prýdensıaldyq retteýdi yryqtandyrý jáne saralaý, táýekelderdi basqarý júıesi jáne esep berý rásimderi negizinde baǵaly qaǵazdar naryǵyna kásibı qatysýshylardyń táýekelderin baǵalaýǵa baǵyttalǵan. Saqtandyrý salasynda ishki qadaǵalaý júıesi táýekeldi sapalyq jáne sandyq baǵalaýdy taldaýǵa negizdelgen, onyń negizinde ár saqtandyrý uıymyna táýekelge baǵyttalǵan qadaǵalaý deńgeıi belgilenedi.
Ábilqasymova naqtylap ótkendeı, baǵalaý qadaǵalaý resýrstaryn qaýipti aımaqtarǵa shoǵyrlandyrýǵa múmkindik beredi. Bıyl birinshi ret saqtandyrý kompanııalary táýekelderdi táýelsiz baǵalaýdy júrgizgeli otyr. Baǵalaý nátıjelerin saqtandyrý uıymdarynyń dırektorlar keńesi men aksıonerleri qaraıdy, bul menedjment pen menshik ıeleriniń óz qyzmetteriniń nátıjeleri úshin jaýapkershiligin arttyrady. Osy baǵalaýdyń nátıjeleri Agenttikke usynylady.
