Boks • 07 Sáýir, 2021

Qos jerlesimiz kósh bastap tur

1956 ret kórsetildi

Jýyrda áýesqoı boksshylardyń álemdik reıtıngi jarııalandy. Bir qýanyshtysy, «TOP-10» bylǵary qolǵap sheberleriniń qataryna toǵyz jerlesimiz enip otyr.

Solardyń ekeýi úzdikter tiziminde kósh bastap tur. Olar – Bekzat Nurdáýletov pen Vasılıı Levıt. Árıne, oǵan esh tańdanbaımyz. Sebebi 81 jáne 91 kılo salmaq dárejelerinde óner kórsetetin eki otandasymyz birer jyldan beri asa iri dúbirli dodalarda tolaǵaı tabystarǵa qol jetkizip júr.  

Álem chempıony Bekzat Nurdáýletov pen Olımpıadanyń kúmis júldegeri Vasılıı Levıtten keıingi eń úzdik nátıje Qamshybek Qońqabaevqa tıesili. Alyptarmen aıqasyp júrgen qazaqtyń nar tulǵaly azamaty ekinshi orynda tur. Álem jáne Azııa birinshilikterinde kúmis medaldy eki ret moınyna ilgen Qamshybektiń aldyn tek ózbek Bahodır Jalolov orap tur. 75 kılo salmaqta kúsh synasyp júrgen boksshylar arasynda Ábilhan Amanqul úshinshi satyǵa jaıǵasqan. Onyń álemdik doda men Azııa oıyndarynyń kúmis júldegeri degen ataǵy bar. Esimderi joǵaryda atalǵan jýan judyryqty jigitterimizden bólek, «TOP-10» boksshynyń qatarynda Zákir Safıýllın (63 kılo, 4-oryn), Abylaıhan Júsipov (69 kılo, 5-oryn), Tursynbaı Qulahmet (75 kılo, 6-oryn), Sáken Bıbosynov (52 kılo, 7-oryn) jáne Qaırat Eralıev (57 kılo, 10-oryn) syndy sańlaqtar bar.

Búgingi tańda AIBA músheliginde 195 memlekettiń baryn eskersek, joǵarydaǵy kórsetkish kóńil marqaıtady dep aıtýǵa tolyq negiz bar. О́ıtkeni kósh bastap turǵan boksshylardyń sany jaǵynan Qazaqstan men О́zbekstan úzeńgi qaǵystyryp qatar keledi. Olardyń da qos dúldúli daralanyp tur. Iаǵnı qazirgi kezde kórshiles eki el órenderiniń aldyna túsken eshkim joq. Sonymen qatar Úndistan, Kýba, Iordanııa jáne Fılıppınniń bir-bir ókili top basynda. Endi sol álemdik reıtıngtiń aldyńǵy leginde turǵan sańlaqtardyń árqaısysy jaıynda qysqasha maǵlumat bere keteıik.

52 kılo salmaq dárejesinde 25 jastaǵy Amıt Pangal aldyna jan salar emes. Úndistandyq boksshy 2018 jyly Djakartada alaýy tutanǵan Azııa oıyndarynda jarq etip kózge tústi. Aıtýly dodada bas júldeni oljalaǵan Amıt fınalda Rıo Olımpıadasynyń jeńimpazy, Vel Barker kýbogynyń ıegeri ózbekstandyq Hasanboı Dýsmatovtyń ózin san soqtyryp ketti. 2019 jyly Bangkokta qurlyq chempıony atanyp, Ekaterınbýrgte ótken álem chempıonatynda kúmis medaldy ıelendi. Reseıdegi jarystyń aqtyq saıysynda ol О́zbekstannyń taǵy bir ókili Shahobıddın Zaırovqa ese jiberdi. Bul salmaqta aljırlik Muhammed Flıssı men qytaılyq Hý Szıangýan ekinshi jáne úshinshi oryndardy ıelenýde.

57 kılo salmaqta ózbekstandyq Mırazızbek Mırzahalılovtiń mereıi ústem. 26 jastaǵy Ferǵana boks mektebiniń túlegi sońǵy jyldary ózi qatysqan jarystardyń barlyǵynda jeńimpaz atandy. 2018 jyly ol Azııa oıyndarynda jáne 2019 jyly álem jáne qurlyq birinshilikterinde qarsylas shaq keltirmedi. Odan keıingi satylarǵa zambııalyq Everısto Mýlenga men kýbalyq Lasaro Alvares jaıǵasqan. Iá, Bostandyq araly ókiliniń úzdikter sanatyna qosylýy zańdy. Ol – álemniń úsh dúrkin chempıony, Olımpııa oıyndarynyń eki dúrkin qola júldegeri jáne Panamerıka oıyndarynyń eki dúrkin jeńimpazy. Al qara qurlyq ókiline osyndaı qurmet ne úshin kórsetilgeni túsiniksiz.

63 kılo salmaqta Endı Krýstyń shoqtyǵy bıik. 25 jastaǵy Kýba qabylany sońǵy kezderi qarsy kelgenderdi qoǵadaı japyrýda. 2005 jyldan beri ol álem chempıonaty men Panamerıka oıyndaryn eki retten utty. Bir qyzyǵy, sol jarystardyń fınalynda Krýstyń joly únemi amerıkalyq Keıshon Devıspen qıysýda. Bul básekelerdiń barlyǵy da kýbalyqtyń jeńisimen aıaqtaldy. Ekinshi orynda – Elnur Abdýraımov. Ol – О́zbekstanda týyp-ósken qazaqtyń ór minezdi uly. Úshinshi orynda – namıbııalyq Ionas Jýnıas Ionas.

69 kılo salmaq dárejesindegi jaǵdaı tym qyzyq. Álemdik reıtıngtiń úzdik úshtigindegi eki esim kópshilikke múlde tanys emes. Birinshi oryndy ıordanııalyq Zeıad Easnash enshileýde. Onyń qandaı erlik istegeni, qandaı dúbirli jarysty utqany bizge beımálim. Úshinshi satyǵa jaıǵasqan Albert Aııssıdiń de ómir joly jankúıerler úshin jumbaq. Ári ketse, Afrıka qurlyǵynda ótken dodalarda daralanǵan bolar. Áıtpese, esimderi atalǵan qos boksshynyń asa iri jarystarda jasyndaı jarqyldaǵan kezi esimizde joq. Olarǵa qaraǵanda ekinshi oryndaǵy ózbekstandyq Bobo-Ýsmon Batýrovtyń halyqaralyq arenada qol jetkizgen tabysy áldeqaıda qomaqty.

75 kılo salmaqta Eýmır Marsıaldiń ózgelerden kóshi ilgeri. Fılıppınniń 25 jastaǵy ókili – 2019 jylǵy álem chempıonatynyń kúmis júldegeri. Sol jarystyń jartylaı fınalynda ol bizdiń Tursynbaı Qulahmetti jolynan yǵystyrǵanyn kózimiz kórdi. Odan bólek, Marsıaldiń qorjynynda Azııa oıyndary men qurlyq birinshiliginiń júldeleri bar. Ekinshi jáne úshinshi oryndardy aljırlik Iones Nemýchı men qazaqstandyq Ábilhan Amanqul ózara bólisýde.

81 kılo salmaqta 22 jastaǵy qazaqtyń maqtan tutar uly, álem chempıony Bekzat Nurdáýletovtiń (sýrette) kósh bastap turǵanyn joǵaryda aıttyq. Ekinshi orynda mysyrlyq Ábdelrahman Ábdelgavvad pen aljırlik Muhammed Homrı. 

91 kılo salmaq dárejesinde de Qazaqstannyń boksshysy álemdik reıtıngte birinshi orynda tur. Ol – Rıo Olımpıadasynyń kúmis júldegeri, álem chempıonatynyń eki dúrkin qola júldegeri, Azııanyń úsh dúrkin chempıony 33 jastaǵy Vasılıı Levıt. Ekinshi jáne úshinshi oryndarda Jańa Zelandııanyń jampozy Davıd Nııka men Marokkonyń myqtysy Iýnes Baala tur.

+91 kılo salmaqta 26 jastaǵy Bahodır Jalolov aldyna jan salar emes. 2005 jyly Dohadaǵy dúnıejúzilik dodada qola medaldy ıelengen О́zbekstannyń alyby arada tórt jyl ótken soń Ekaterınbýrgte altynǵa qol sozdy. Azııa chempıonatynda eki ret top jardy. Kásipqoılar arasynda segiz jekpe-jek ótkizip, barlyq qarsylasyn nokaýtqa jiberdi. Ekinshi orynǵa Qamshybek Qońqabaev turaqtasa, úshinshi satyǵa aýstralııalyq Iýstıs Hýnı taban tirep tur.

Sońǵy jańalyqtar

Eldanaǵa el rıza

Sport • Keshe

Jumekenniń «Balaýsasy»

Rýhanııat • Keshe

«Sálemetsiz be, Baqtııar!»

Rýhanııat • Keshe

Sortóbeniń baǵy eselenip keledi

Rýhanııat • Keshe

Aldaǵy apta kún jylynady

Aýa raıy • Keshe

Súıispenshilik sabaǵy

Aımaqtar • Keshe

Uqsas jańalyqtar