UBT elektrondy formatta ótedi

Bilim • 07 Sáýir, 2021

UBT elektrondy formatta ótedi

Barlyq salany damytý men ondaǵy sybaılas jemqorlyqtyń aldyn alý úshin sıfrly nusqaǵa kóshý kerek ekenin sarapshylar jıi aıtady. Mine, osyndaı ilgerileý bilim salasynda da baıqalady. Elimizde Ulttyq biryńǵaı testileý bilim berý salasynyń tarıhynda alǵash ret bıyl elektrondy formatta ótedi.

Aıdana ShOTBAIQYZY

UBT-nyń jańa formaty jaıly Bilim jáne ǵylym vıse-mınıstri Sholpan Karınova testileýdiń qalaı ótetinin baıandaýǵa arnalǵan brıfıngte: «Bilim jáne ǵylym mınıstrligi bilim salasyn damytý, sapany arttyrý maqsatynda birqatar sheshim qabyldady. Sonyń ishinde ashyqtyqty, adaldyqty qamtamasyz etetin sıfrlandyrý prosesine kóshkenine de biraz ýaqyt boldy. Osyndaı baǵyttaǵy jumystardyń bir kórinisi – bıyl UBT-ny elektrondy formatta ótkizýdi josparlap otyrmyz», dedi.

Ulttyq biryńǵaı testileý 2004 jyldan beri qaǵaz nusqada ótkizilip kelgen edi. UBT-nyń nátıjesi bastapqy ýaqytta eki máseleniń sheshimi boldy. Birinshiden, mektep bitirýshi túlekterin qorytyndy attestattaý úshin qoldanylsa, ekinshiden, joǵary oqý oryndaryna túsý úshin memlekettik bilim berý grantyn ıelený maqsatynda qoldanyldy. Búginde attestat mekteptegi qorytyndy emtıhandar negizinde beriledi, al testileý tek memlekettik grant alýǵa jáne elimizdegi joǵary oqý oryndarynyń aqyly bólimderine oqýǵa túsý úshin tapsyrylady.

UBT-nyń jańa formaty talapkerler úshin qolaıly bolmaq. Joǵary jáne joǵary oqý ornynan keıingi bilim departamentiniń dırektory Ádilet Toıbaevtyń aıtýynsha, test tapsyrýshy testileýdiń ótkiziletin ornyn jáne ýaqytyn ózi tańdaı alady. «UBT burynǵydaı 10 kúnniń ishinde ǵana emes, 3 aı boıy elektrondy formatta ótkiziledi. Jańa formattaǵy testileýdiń eń utymdy jeri talapker testini qashan, qaı jerde ótetinin ózi tańdaıdy. О́zine yńǵaıly kúni men ýaqytyn tańdap, qolaıly jerde tapsyrady. Sondaı-aq elektrondy UBT testilenýshige nátıjesin keshke deıin kútpeı-aq sol jerde alýyna múmkindik beredi. Al test nátıjesimen kelispegen jaǵdaıda, testilenýshi sol sátte-aq, ıaǵnı 30 mınýt ishinde appelıasııaǵa ótinish berýge quqyly», dedi Á.Toıbaev.

Buǵan deıin testileý qorytyndysy UBT ótkizilgen mekemeniń habarlandyrý taqtasynda qaǵaz nusqada jarııalandy. Ondaǵy aqparatty sonda júrgen kez kelgen adam kóre alatyn. Bul testilenýshilerdiń jeke deregin jarııalaýmen teń edi. Keıbir túlekterge óziniń nashar nátıjesi úshin synyptastarynyń tabalaýyna, tómendetýine tózýge týra keletin. Endi elektrondy UBT-nyń qorytyndysy testilenýshiniń saıttaǵy jeke kabınetinde ǵana saqtaýly bolady.

Al Ulttyq testileý ortalyǵynyń basshysy Dıdar Smaǵulov elektrondy UBT-nyń basty qaǵıdasyn túsindirdi. «Jańa formattaǵy testileý «bir testilenýshi – bir kompıýter – bir kamera» qaǵıdasy boıynsha ótkiziledi. Bul degenimiz – testilenýshiniń kompıýteri baqylaýda bolady degen sóz. Iаǵnı testileýdi tapsyrý prosesi tolyǵymen beınejazbada saqtalady. Elektrondy UBT proktorıng júıesimen ótedi. Atalǵan júıe testilenýshiniń test tapsyrmalarynan bólek basqa paraqshany ashýyna, túrli saıtty qaraýyna jol bermeıdi. Sondaı-aq kez kelgen adam testileýdiń ótkizilý barysyn www.education.kz saıtynan kórip, baqylaı alady», dedi ol.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz