Tennıs • 08 Sáýir, 2021

Aldymyzda – Argentına

9 ret kórsetildi

Osy aıdyń ekinshi jartysynda Argentınanyń ońtústiginde ornalasqan Kordova qalasynda tennısten áıelder arasyndaǵy dástúrli Bıllı Djın Kıng kýbogynyń (burynǵy Federasııa kýbogy) pleı-off saıystary bastalady. Jarys jolyna shyǵatyn komandalardyń qatarynda Qazaqstannyń ulttyq quramasy da bar. Bizdiń qyzdar 16-17 sáýir kúnderi argentınalyq tennısshilermen sheberlik baıqasady. Pıreneı túbegindegi týrnırde bizben oınaıtyn sol komanda jaıynda ne bilemiz?

Birden aıta keteıik, dál qazirgi kezde Argentına quramasy bizder úshin alynbaıtyn qamal emes. О́ıtkeni bul eldiń bir ǵana ókili «TOP-100» oıynshynyń sanatynda. Ol – Nadıa Podoroshka. 24 jastaǵy Rosarıo qalasynyń týmasy byltyr Rolan Garros týrnırinde úzdik tórttiktiń qataryna qosylyp, jankúıerler nazaryn ózine aýdarǵan edi. Parıjdegi dodada ol belgııalyq Grete Mınnendi, qazaqstandyq Iýlııa Pýtınseva men chehııalyq Barbora Kreıchıkovany jáne ýkraınalyq Elına Svıtolınany san soqtyryp, jartylaı fınalda polshalyq Iga Sventekke ese jiberdi. Sonymen qa­tar ol 2019 jyly Lımada alaýy tutanǵan Panamerıka oıyndarynda jeńimpaz atandy. Podoroshkanyń odan basqa jeńip alǵan pálendeı ataǵy joq. Bul kúnderi tennısshi álemdik reıtıngte 46-oryndy ıelenip otyr.

Argentınanyń ózge tennısshileriniń nátıjeleri tipten tómen. Máselen, Paýla Ormaechea nebári 282-oryndy enshileýde. 28 jasta bolsa da, «Úlken dýlyǵa» sanatyndaǵy týrnır­lerde úshinshi aınalymnan asyp kórgen emes. Al Marııa Lýrdes Karle (435), Vıktorııa Bozıo (437), Evgenııa Ganga (718), Jıýleta Lara Esteıbl (756), Melanı Solange Kryvoı (804) sekildi oıynshylar qalyń toptyń arasynda júr. Olardan pálendeı qaýip kele qoımas dep oılaımyz.

Argentınaǵa qaraǵanda qazaq­stan­dyq­tardyń qarqyny áldeqaıda shıraq. Elimizdiń birinshi raketkasy Elena Rybakına WTA tiziminde 23-oryndy ıelenýde. Al Iýlııa Pýtınseva 31, Zarına Dıas 88-satyǵa jaıǵasqan. Bul oıyn­shylardyń barlyǵy da ár jyldary kil myqtylar jınalatyn «Úlken dýlyǵa» sanatyndaǵy týrnırlerdiń bel ortasyna deıin jetken. Sonymen qatar qosalqy quramda Anna Danılına (290), Gozal Aınıtdınova (469), Jibek Qulambaeva (619) jáne Iаroslava Shvedova (738) sııaqty qyzdarymyz
bar.

Al Bıllı Djın Kıng kýbogynyń jeńimpazdary jaıynda aıtar bolsaq, bul jarysta eń kóp oljaǵa kenelgen  AQSh quramasy. Amerıkalyqtar 18 márte bas júldeni oljalaǵan. Chehııa 11 ret top jarsa, Aýstralııa jeti ret aldyna jan salmapty. Sondaı-aq jeńimpazdar qatarynda Ispanııa (5 ret), Italııa (4 ret), Reseı (4 ret), Fransııa (3 ret), Germanııa (2 ret), Belgııa (1 ret), Slovakııa (1 ret) jáne OAR (1 ret) sekildi quramalar bar. 

Sońǵy jarys 2019 jyly jasyl qur­lyq­taǵy Pert qalasynda uıym­das­ty­ryldy. Fınaldyq saıys­ta Aýstralııa men Fransııa sheberlik baıqasty. Bul tartys 3:2 esebimen qonaqtardyń paıdasyna sheshildi. Jeńimpaz komandanyń sapynda Karolın Garsııa, Krıstına Mladenovıch jáne  Polın Parmante óner kórsetti.

Sońǵy jańalyqtar

Eldanaǵa el rıza

Sport • Keshe

Jumekenniń «Balaýsasy»

Rýhanııat • Keshe

«Sálemetsiz be, Baqtııar!»

Rýhanııat • Keshe

Sortóbeniń baǵy eselenip keledi

Rýhanııat • Keshe

Aldaǵy apta kún jylynady

Aýa raıy • Keshe

Súıispenshilik sabaǵy

Aımaqtar • Keshe

Uqsas jańalyqtar