Kúni keshe senatorlar qabyldaǵan zańǵa sáıkes budan bylaı memleket týrıstik áleýeti joǵary aýmaqtarda nysan salǵan kásipkerler úshin ınvestısııalyq jeńildikter qarastyrýǵa mindetti. Ondaı arnaıy aımaqtardyń tizimi jeke bekitiledi. Al, kásipkerdiń qurylysqa salǵan ınvestısııasynyń kólemi 200000 eselengen AEK mólsherinen asýy kerek. Sondaı-aq, memleket jol boıynda qyzmet kórsetý salasyndaǵy shyǵynnyń bir bóligin óteýdi jáne týroperatorlardyń shyǵystaryn sýbsıdııalaýdy da óz moınyna alady.
«Elimizde týrızm salasyn damytý mańyzdy maqsattardyń biri. Búgin qabyldanǵan zań osy baǵytta keshendi zańnamalyq negiz qalyptastyrady. Soǵan sáıkes qarjylaı qoldaý tetikteriniń de aýqymy keńeıdi. Olardyń qatarynda ınvestısııalyq jeńildikter, týrıstik qyzmetti yntalandyrý, syrttan týrıster ákeletin týroperatorlardyń shyǵyndaryn sýbsıdııalaý sııaqty basymdyqtar bar», dedi Senat Tóraǵasy Máýlen Áshimbaev.
Aıta keteıik, mundaı jańa normalar búgin Senat otyrysynda qabyldanǵan «Qazaqstan Respýblıkasynyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zańda jazylǵan.
