Bar-joǵy úsh joldama buıyrdy

Tursynov Tokıoǵa barady

Juma kúni grek-rım kúresi sheber­leri boz kilemge shyqty. Osydan eki jyl buryn Nur-Sultanda ótken álem chempıonatynda Olımpıadanyń alǵashqy joldamalary sarapqa salynǵany belgili. Sol jarysta 60 kılo salmaqtaǵy Meırambek Aına­ǵulov pen 77 kılo salmaqtaǵy Ashat Dilmuhamedov Kúnshyǵys eline sapar shegetinderdiń sanatyna qosylǵan edi. Kelesi irikteý synyn Almaty qalasy qabyldady. Iá, óz elimizde ótetin jarysta qalǵan tórt joldamany ıelený úshin bizdiń balýandar baryn salady dep úmittendik. Biraq úkili úmitimiz aqtalmady. 67 kılo salmaqta beldesken Meıirjan Shermahanbet sheshýshi synda shabysynan jańyldy. Álem chempıonatynyń qola júldegeri degen ataǵy bar qandasymyz esimi kópshilikke beımálim qyrǵyzstandyq balýan Marlen Asıkeevten oısyraı utyldy. Esep – 2:8.

97 kılo salmaqtaǵy Oljas Syr­ly­baı men Ońtústik Koreıanyń ókili Seıol Lı arasyndaǵy saıysta teń esep tirkeldi – 1:1. Ereje boıynsha eki balýan teń túsken jaǵdaıda sońǵy upaıdy kim alsa, jeńis sonyń enshisine jazylady. Bul rette Lıdiń baǵy jandy.

Asa aýyr salmaqta Georgıı Sýr­sýmııa aıqasty. Jasy 40-tan asqan ardager balýannyń úlken sporttan qol úzgenine baqandaı 13 jyldyń júzi boldy. 2004 jyly onyń Afına Olımpıadasynda kúmis medaldi ıelengenin jankúıerler umyta qoıǵan joq. Odan bólek, Sýrsýmııanyń álem chempıonatynyń qola júldegeri, Azııa oıyndarynyń jeńimpazy, qurlyqtyń tórt dúrkin chempıony degen ataqtary taǵy bar. Arada 17 jyl ótken soń Georgıı qaıta Olımpııa oıyndarynda kúsh synasýdy maqsat tutty. Biraq jalyndy jastar saqa sportshyǵa ondaı múmkindik bermedi. Alǵashynda koreıalyq Mınsok Kımnen, kóp uza­maı qytaılyq Lındze Mengten utylǵan ol jarys jolynan shyǵyp qaldy. Osylaısha, úsh balýanymyz Alash topyraǵynda ótken jarysta óz jankúıerlerin qýanta almady.

Jerlesterimizdiń arasynan Nursultan Tursynovtyń asyǵy alshysynan tústi. Shırek fınalda ol japonııalyq Masato Sýmımen sheberlik baıqasty. Báseke barysynda 0:3 esebimen utylyp jatqan qazaq jigiti ekinshi kezeńde jankeshtilik tanytyp, jeńisti qarsylasynyń ýysynan julyp áketti. Jartylaı fınaldyq saıysta da joǵarydaǵy jaǵdaı aına-qatesiz qaıtalandy. Úziliske deıin Sýshıl Kýmar qanda­symyzdan ush upaı ozyp turdy. Bul jaǵdaı Nursultannyń jigerin jasyta alǵan joq. Ekinshi kezeńde Úndistan ókilin tórttaǵannan julyp alǵan ol ońtaıly ádisin júzege asyrdy. Aqyry 9:5 esebimen jeńiske jetken Tursynov Tokıoǵa baratyndardyń tizimine qosyldy. Fınalda qytaılyq Feı Peng boz kilemge shyǵýdan bas tartty. Osylaısha, Nursultan Olım­pıada joldamasymen qatar, jarystyń bas júldesin jeńip aldy.

Almatydaǵy týrnırdiń qorytyn­dysy boıynsha Qyrǵyzstannan kelgen jigitterdiń qanjyǵasy maılandy. Aıyr qalpaqty aǵaıyndarymyz úsh joldamany oljalasa, Qytaı, Ońtústik Koreıa jáne Irannan eki jáne Japonııa, О́zbekstan jáne Qazaqstannan bir-bir balýan sondaı qurmetke bólendi.

Tatıana tabandylyq tanytty

Senbide áıelder kúresinen báseke­ler ótti. Olar da 2019 jylǵy álem chem­pıo­natynda eki joldamany qorjynǵa sal­ǵan edi. Bul joldamalardyń ıe­ger­­leri – Valentına Islamova (50 kı­lo) men Elmıra Syzdyqova (76 kılo). Qalǵan qyzdarymyz dit­tegen maq­­sattaryna Almatyda qol jet­kizý­di kózdedi. Alataý baýraıynda uıym­dastyrylǵan irikteý týrnırinde tórt burymdymyz boz kilemge shyqty. О́kinishke qaraı, qatarynan eki kezdesýde jeńilistiń kermek dámin tatqan Emma Tısına (57 kılo) men Jámılá Baqbergenova (68 kılo) jarys jolynan shyǵyp qaldy.

Barsha jankúıer 53 kılo salmaqta óner kórsetken Tatıana Ahmetovanyń jankeshtiligi men tabandylyǵyna rıza boldy. Tórt dúrkin Azııa chem­pıony, Azııa oıyndarynyń qola júl­degeri degen ataǵy bar 35 jas­taǵy ardager sportshy tusaýkeser kezde­sýinde tájikstandyq Vatansýltan Shakarshoevany shań qaptyrsa, ile-shala mońǵolııalyq Bolotýıa Bat Ochırmen beldesti. Báseke barysynda 0:8 esebimen utylyp jatqan Tatıana aıaǵynan aýyr jaraqat alǵanyna qara­mastan qarsylasyn úsh ret jam­basqa salyp laqtyrdy. Osy úsh ádis te tóreshiler tarapynan tórt upaı­men baǵalandy. Nátıjesinde otandasymyz kelesi aınalymǵa ótti.

Jartylaı fınalda Ahmetova Ońtústik Koreıanyń ókili Kım Hen Djýmen aıqasty. Jaraqaty janyna batqanyna qaramastan ol Azııa oıyndarynda úsh márte, qurlyq chempıonatynda tórt ret júldegerler qatarynan kóringen saqa sportshyny san soqtyrdy. Sóıtip Tatıana Ahmetova kózdegen maqsatyna qol jetkizip, Olımpııa oıyndarynyń jolda­masyn qaltasyna basty. Onyń aqtyq syndaǵy kúresine dárigerler ruqsat bermedi.

62 kılo salmaq dárejesindegi Aıaý­lym Qasymovanyń da joldama alýǵa jaqsy múmkindigi boldy. Bastapqy básekelerinde koreıalyq Hanbıt Lıden aılasyn asyrǵanymen ol mońǵolııalyq Serenshımedke jol berdi. Al jartylaı fınalda úndistandyq Sonam Sonamnan utyldy. Bir ókinishtisi, eki retinde de qazaq balýany alǵashynda qar­sylasynan bes-alty upaı ozyp tur­dy. Biraq báseke bel ortadan aýǵanda Aıaýlym bilgeninen jańylyp, jeńisti ýysynan shyǵaryp aldy.

Áıelder kúresinen mońǵol qyz­dary eń kóp lısenzııaǵa qol jet­kizdi. Olardyń tórteýi Japonııaǵa bara­tyndardyń sanatyna qosyldy. Qyrǵyzstan, Úndistan, Qytaıdyń eki jáne Japonııa men Qazaqstannyń ba­lýandaryna bir-bir joldamadan buıyrdy.

Batyrmurzaevtyń baǵy jandy

Jeksenbi kúni erkin kúres she­ber­leri jarys kórigin qyzdyrdy. Buǵan deıin bizdiń jigitter tórt jol­damany qorjynǵa salǵan edi. Olar – Nur­ıslam Sanaev (57 kılo), Dáý­let Nııazbekov (65 kılo), Danııar Qaı­sanov (74 kılo) jáne Álisher Erǵalı

(97 kılo). Bapkerlerdiń «Qalǵan eki joldama úshin kim talasady?» degen saýalǵa biraz bas qatyrýyna týra keldi. Sebebi julqynyp turǵan jigitter kóp. Solardyń arasynan eń myqtylardy iriktep alý qajet. Ke­simdi sózdi ulttyq quramanyń bas bapkeri Áset Serikbaev aıtty. Aı­týly maman 86 kılo salmaqta Azamat Dáýletbekovti jáne 125 kılo salmaqta Iýsýp Batyrmurzaevty boz kilemge shyǵarýdy jón kórdi.

Almatydaǵy jarysty eki jerle­simiz de keremet bastady. Ekeýi de Oń­­tústik Koreıanyń ókilderin óz eline qaıtardy. Shırek fınalda Aza­mat Kvon Hek Bonnyń tas-tal­qanyn shyǵardy. Báseke bir mınýtqa jetpeı aıaqtaldy. Iýsýp ta uzaqqa sozbady. Kım Donghvandy oısyrata utý úshin oǵan bar-joǵy úsh mınýt jetkilikti boldy. Biraq odan keıin Dáýletbekovtiń baǵy baılandy. Ol Reseıden qonys aýdaryp, О́zbekstannyń týy astynda óner kórsetip júrgen Jabraıl Shápıevten jeńilip, jergilikti jan­kúıerlerdiń kóńiline selkeý túsirdi. Al Batyrmurzaev el senimin aqtady. Jartylaı fınaldyq mejede Qazaq eliniń namysyn qorǵap júrgen noǵaı jigiti úndistandyq Samıt Sa­mıtti san soqtyryp, Tokıoǵa baratyn balýan­dardyń tizimine qosyldy.

Sóıtip Qazaqstannyń erkin kúres sheberleriniń jeńip alǵan jol­damalarynyń sany beske jetti. Otan­dastarymyzdyń arasynan ázirge tek 86 kılo salmaqtaǵy balýandar osaldyq tanytýda. Al Almatydaǵy týrnırde О́zbekstan quramasy tamasha óner kórsetti. «Ala taqııalylar» tórt lısenzııany óz qorjyndaryna saldy. Irannyń apaıtósteriniń úsheýi Japonııaǵa sapar shegetinderdiń sanatyna qosyldy. Sondaı-aq Qytaıdyń eki jáne Qazaqstan, Qyrǵyzstan, Mońǵolııanyń bir-bir ókili sondaı qurmetke bólendi. 

Sonymen Alataý baýraıynda uıym­dastyrylǵan dúbirli doda óz máresine jetti. 2019 jyly Nur-Sultanda jalaýy jelbiregen álem chempıonaty jáne kúni keshe Almatyda aıaqtalǵan týrnırdi qosa alǵanda, Qazaqstannyń balýandary barlyǵy 11 lısenzııaǵa ıelik etti. Tarqatyp aıtsaq, erkin kúresten  bes, grek-rım kúresi men áıelder kúresinen úsh-úshten joldamany qor­jynǵa saldyq. Alda taǵy bir irikteý saıysy bar. Bul jarys 6-9 mamyr kúnderi Bolgarııanyń astanasy – Sofııada ótedi. Sol básekeden keıin bıyl Tokıoda alaýy tutanatyn Olım­pııa oıyndarynda kúsh synasatyn balýandar tolyqtaı anyqtalady. Sońǵy synaqta Qazaq eliniń órenderi tórt jyldyqtyń bas­ty dodasyna tolyq qurammen barý úshin baryn salady dep úmittenemiz.

ALMATY