Elbasy • 15 Sáýir, 2021

Elbasy Asqar Mamın men Álıhan Smaıylovty qabyldady

35 ret kórsetildi

Elbasy Premer-Mınıstr Asqar Mamın men Premer-Mınıstrdiń birinshi orynbasary Álıhan Smaıylovty qabyldady, dep habarlaıdy Egemen.kz Elbasynyń baspasóz qyzmetine silteme jasap.

Kezdesýde «Nur Otan» partııasynyń Tóraǵasyna «О́zgerister joly: Ár azamatqa laıyqty ómir!» saılaýaldy baǵdarlamasyn iske asyrýǵa baǵyttalǵan Jol kartasy aıasynda atqarylyp jatqan jumystar týraly aqparat usynyldy. Partııanyń Saıası keńesi Bıýrosynyń múshesi, Premer-Mınıstr A.Mamın Saılaýaldy baǵdarlama elimizde júzege asyrylyp jatqan reformalardyń jalǵasy ekenin aıtty.

Ol partııanyń aldyna aýqymdy ári naqty maqsattar qoıǵanyn, ony baǵyndyrýǵa qajetti barlyq resýrs jetkilikti ekenin atap ótti. Sondaı-aq Qazaqstannyń Tuńǵysh Prezıdentine 2021 jyldyń birinshi toqsanyndaǵy áleýmettik-ekonomıkalyq damý qorytyndysy, Úkimettiń jahandyq daǵdarys jaǵdaıynda ulttyq ekonomıkanyń ósý qarqynyn saqtaý jumystary týraly baıandaldy.

Alǵashqy toqsannyń qorytyndysy boıynsha ekonomıkanyń negizgi salalaryndaǵy kórsetkishter birtindep jaqsara bastaǵany aıtyldy. Máselen, óńdeý ónerkásibinde (+7,5 paıyz), qurylys (+13,1 paıyz) pen aýyl sharýashylyǵynda (+2,8 paıyz) ósim bar ekeni atap ótildi.

Sondaı-aq mashına jasaý (+21,8 paıyz), farmasevtıka (+9,1 paıyz), hımııa ónerkásibi (+14,2 paıyz), metallýrgııa (+2,3 paıyz), jeńil ónerkásip (+3,1 paıyz) pen otandyq ekonomıkanyń basqa da birqatar salalarynda ósýdiń oń qarqyny baıqalýda. Taý-ken metallýrgııa sektoryn qospaǵanda, negizgi kapıtalǵa salynǵan ınvestısııalar kólemi 34 paıyzǵa artty.

Osynyń bári IJО́-niń boljanǵan naqty ósimin 2021 jyl qorytyndysy boıynsha 2,8 paıyzdan 3,1 paıyzǵa deıin arttyrýǵa múmkindik berdi. Inflıasııa 4-6 paıyz aralyǵynda bolady dep boljanyp otyr Sondaı-aq Úkimet basshysy naqtylanǵan respýblıkalyq bıýdjet jobasy týraly baıandady. Onyń shyǵystary «Nur Otan» partııasynyń 2021-2025 jyldarǵa arnalǵan saılaýaldy baǵdarlamasyn, Elbasynyń strategııalyq bastamalaryn jáne Memleket Basshysynyń Joldaýyn iske asyrýdy qamtamasyz etýge baǵyttalǵan.

Sonymen qatar qarjylandyrý COVID-19 indetine qarsy aýqymdy kúres is-sharalaryn júzege asyrýǵa, densaýlyq saqtaý júıesin jańǵyrtýǵa, memlekettiń jurtshylyq aldyndaǵy áleýmettik mindettemelerin oryndaýǵa, sondaı-aq negizgi memlekettik baǵdarlamalardy iske asyrýǵa baǵyttalady. Elbasy el ekonomıkasyndaǵy kórsetkishterdi jaqsartý úshin júıeli jumys atqarýdyń mańyzdylyǵyna toqtaldy.

– Ekonomıkanyń negizgi kórsetkishteri qalpyna kelip jatqanyn kórip otyrmyz. Bul jaqsy úrdis. Mashına jasaýda ósim shamamen 22 paıyzdy qurady. Jeńil ónerkásip te qarqyndy damyp keledi. Jalpy óńdeý ónerkásibi, qurylys sektory, agroónerkásiptik keshen men basqa da birqatar salalarda ósim bar, – dedi Qazaqstannyń Tuńǵysh Prezıdenti.

Áńgime barysynda sanıtarlyq-epıdemııalyq ahýaldy turaqtandyrý jáne vaksına saldyrǵan azamattardyń sanyn kóbeıtýge baǵyttalǵan jumystar jaıly aıtyldy. Elbasy jurtshylyq arasynda vaksına salýdyń mán-mańyzy týraly aqparattyq-túsindirý jumystaryn júrgizýdiń mańyzdylyǵyn atap ótti.

– Densaýlyqty kútý kerek. Betperde taǵyp, qoldy jıi jýyp júrgen jón, kópshilik sharalarǵa barmaý, mindetti túrde ekpe saldyrý óte mańyzdy. Sonda ǵana osy kúrdeli kezeńnen óte alamyz, – dedi Nursultan Nazarbaev.

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar