Aımaqtar • 21 Sáýir, 2021

Qaı eldiń sardarlaryn daıarlap júrmiz?

984 ret kórsetildi

Jýyrda Petropavl qalasynda ornalasqan Ulttyq ulannyń Áskerı ıns­tıtýty S.Muqanov atyndaǵy oblystyq ámbebap kitaphanamen birlesip, el Táýelsizdiginiń 30 jyldyǵyna arnalǵan ǵylymı-praktıkalyq semınar ótkizdi. Bul is-sharanyń maqsaty – eldiń erteńi bolatyn kýrsant-jastarǵa ǵıbrat alarlyq aqparat berý, táýelsizdiktiń qadirin uqtyryp, onyń nyǵaıa berýine qyzmet etýge úndeý. Sóz sóıleýshilerdiń biri retinde bizdi de shaqyrǵan eken.

Zalǵa ınstıtýt kýrsanttary kirip kelip, qaz-qa­tar tizilip otyrysymen aýdıtorııany kóńildi kúı ker­nep ketti. Bári de qazaqtyń órimdeı jas­tary. Ara­synda basqa etnos ókilderi biren-saran ǵana. 

Sonymen, semınardyń jumysy bastalyp ketti. Biraq... Is-shara bastalǵannan aıaqtalǵansha tek orys tilinde júrgizildi. Bizden basqa baıandamashylar da aldyn ala daıyndaǵan mátinderin tegis orys tilinde oqydy. Jáne olardyń kóbi qazaqtar edi. Al bizdiń ana tilimizde sóılegen sózimizge jastar eleń etip, erekshe ynta qoıyp tyńdaǵany anyq sezildi. Demek olarǵa naq ana tilinde aıtylatyn sóz kerek. Munyń ózi kýrsanttardyń kópshiligi qazaqtildi ortadan shyqqandyǵyn kórsetip tur.

Al is-sharanyń barysy olarǵa áskerı qyzmette memlekettik til kerek emes sııaqty áser qaldyr­dy. Biz ózi qaı eldiń sardarlaryn daıarlap júr­miz degen  oı  keldi basymyzǵa. Osyndaı ıdeolo­gııa­lyq is-sharadaǵy áńgimeniń tym bolmasa 30-40 paıyzy qazaq­sha aıtylýǵa tıisti edi ǵoı. Qazir tipti orys aǵa­ıyndardyń ózi qazaqshany jatsynbaı qabyldaıdy.

Memleket basshysy Qasym-Jomart Toqaev­tyń «Táýel­sizdik bárinen qymbat» baǵdarla­ma­lyq maqa­la­synda: «Memlekettik tildi bilý – Qazaq­stannyń árbir azamatynyń paryzy. Min­deti dep te aıtýǵa bolady. Osy oraıda men barsha qazaqstandyqtarǵa, onyń ishinde qazaq tilin áli jete meńgermegen otandastaryma úndeý tastaǵym keledi. Jastar aǵylshyn tilin nemese basqa da tilderdi az ǵana ýaqytta meńgere alatynyn kórip otyrmyz. Tutas býyn almasqan osy jyldarda qazaq tilin úırengisi kelgen adam ony áldeqashan bilip shyǵar edi. Halqymyzda «Eshten kesh jaqsy» degen sóz bar. Eń bastysy, ynta bolý kerek», dep jazǵanyn Áskerı ınstıtýt basshylyǵy qulaǵyna ilmegen be, qalaı? Álde ol maqalany oqymaǵan ba?

 

PETROPAVL

 

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar