Bilim • 21 Sáýir, 2021

Doktorantýraǵa túsý kezinde shyǵarmashylyqqa kóńil bólinedi

39 ret kórsetildi

Doktorantýraǵa túsý emtıhandary bıyl alǵash ret elektrondy formatta ótedi. Úmitkerler doktorantýrada oqýǵa daıyndyǵyn tekserý úshin test, bilim berý baǵdarlamasynyń beıini boıynsha emtıhan tapsyryp, kompıýterde esse jazatyn bolady. Bul týraly vedomstvonyń apparattyq keńesinde Bilim jáne ǵylym vıse-mınıstri Mıras Dáýlenov málimdedi.

«О́tken jyly magıstratýraǵa emtıhan tapsyrý kezinde qoldanylǵan elektrondy format synaqtan sátti ótti. Doktorantýraǵa túsý úshin qujattar BǴM Ulttyq testileý ortalyǵynyń aqparattyq júıesi arqyly qabyldanady. Granttyń taǵaıyndalýy týraly kýálik árbir oqýǵa túsýshiniń jeke kabınetinde elektrondy formatta beriletin bolady», dedi vıse-mınıstr. 

Doktorantýraǵa magıstr dárejesi jáne keminde 9 aı jumys ótili bar tulǵalar, sondaı-aq medısınalyq mamandyqtar boıynsha rezıdentýrada oqýyn aıaqtaǵan úmitkerler túse alady.

 «Tirkeý kezinde oqýǵa túsýshi saýaldamany toltyryp, bir JOO-ny, bir bilim berý baǵdarlamalarynyń tobyn kórsetedi jáne emtıhan tapsyrý ornyn ózi tańdaıdy. Túsý emtıhandaryn ótkizý kestesi oqýǵa túsýshilerdiń nazaryna emtıhan bastalǵanǵa deıin úsh kún buryn jetkiziledi. Úmitkerler kompıýterde esse jazyp, doktorantýrada oqýǵa daıyndyq testin jáne bilim berý baǵdarlamalary tobynyń beıini boıynsha emtıhan tapsyratyn bolady», dedi M.Dáýlenov.

Bul rette túsý emtıhanynyń qorytyndy baǵasy esse, doktorantýrada oqýǵa daıyndyq testi jáne beıindi emtıhandardy baǵalaý nátıjelerin jınaqtaý arqyly alynǵan baldardyń jıyntyǵy bolyp tabylady. Doktorantýraǵa ótinish qabyldaý 3 shildede bastalyp, 3 tamyzǵa deıin jalǵasatynyn esterińizge sala keteıik. Doktorantýraǵa túsý emtıhandary 4-20 tamyz aralyǵynda ótedi.

Magıstratýraǵa túsý formatyna keletin bolsaq, bıyl eshqandaı ózgeris joq. Testileý nátıjelerimen kelispegen jaǵdaıda oqýǵa túsýshi testileý aıaqtalǵannan keıin 30 mınýt ishinde birden apellıasııaǵa ótinish bere alady.

Magıstratýraǵa qujattardy qabyldaý 1 maýsymda bastalyp, 15 shildede aıaqtalady. Oqýǵa túsý emtıhandary 20 shilde men 10 tamyz aralyǵynda ótedi. Magıstratýraǵa túsýshiler Ulttyq testileý ortalyǵynyń saıtynda baıqaý synaǵynan óte alady.

Memlekettik bilim berý tapsyrysy bo­ıynsha magıstratýraǵa túsý úshin ótý baly ózgerissiz qalyp, 75 baldy quraıdy, al doktorantýraǵa aqyly negizde túsý úshin – 50 ball. Emtıhannyń uzaqtyǵy – tórt saǵat.

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar