Sport • 21 Sáýir, 2021

Eldanaǵa el rıza

238 ret kórsetildi

Bul kúnderi Polshanyń Kels qalasynda ótip jatqan jastar arasyndaǵy álem birinshiliginde Qazaqstannyń boksshylary tabysty óner kórsetkeni belgili. Dáp qazirgi kezde 10 birdeı órenimiz jeńis tuǵyryna kóterilip, solardyń altaýy aldaǵy kúnderi bas júlde úshin talasady, dep habarlaıdy Egemen.kz

Aıtýly jarysta Qazaqstan quramasynyń qorjynyna alǵashqy júldeni salǵan Almaty oblysynyń týmasy Eldana Tálipova ekeni málim. Asa aýyr salmaq dárejesinde kúsh synasyp júrgen qazaq qyzy shırek fınaldyq saıysta Ýkraınanyń ókili Vıktorııa Levchýkty ekinshi raýnda esinen tandyryp, jartylaı fınalǵa joldama aldy. Bul mejede Eldananyń joly bolmady. Asa shıelenisti ótken básekede ol Moldova boksshysy Darııa Kozorezge ese jiberip qola medaldi qanaǵat tutty. Desek te Tálipovanyń óneri mamandar tarapynan joǵary baǵalandy.

Búgin  Eldana Tálipovanyń alǵashqy bapkeri Darhan Qabylanbekovpen jolyǵyp, aıtýly bylǵary qolǵap sheberi jaıynda biraz maǵlumat aldyq. Darhannyń ózi de kezinde osy sport túrimen shuǵyldanyp, azdy-kemdi tabystarǵa qol jetkizgen eken. Sonymen qatar, kıkboks jáne qoıan-qoltyq aıqastan da túrli jarystarda óner kórsetip, biraz jarystarda qanjyǵasy maılanǵan kórinedi. Qazirgi kezde Darhan óziniń dosy, Qazaqstan Respýblıkasyna eńbek sińirgen jattyqtyrýshy Darhan Sádýaqasov jáne tanymal kıkboksshy Nurbolat Tashpen birge «Daryn» promoýterlik kompanııasyn quryp, otandyq kásipqoı boksty damytýǵa barynsha at salysýda. Aıtýly promoýshenniń uıymdastyrýymen Jetisý óńirinde birqatar dúbirli dodalardyń uıymdastyrylǵanyn jankúıerler jaqsy biledi. 

–  Men birer jyl Almaty oblysy Ile aýdanynda bapker bolyp eńbek etip, boks ónerine ańsary aýǵan jastardy jattyqtyrdym. Solardyń qatarynda Eldana Tálipova da bar. Ony men Qazsıktegi orta mekteptiń segizinshi synybynda oqyp júrgen kezinde baıqadym. О́z qurbylarynan boıy edáýir uzyn qyzǵa birden kóńilim túsip, oǵan bokspen aınalysý jaıynda usynys aıttym. Aldyn-ala Eldananyń apasy Jupar Omarovadan ruqsat surap, sol kisiniń aq batysyn aldym. Sodan jattyǵý jumystaryna kirisip, shákirtimniń sheberligin ábden shyndadym. Nátıjesi jaman bolǵan joq. Eldana ózi qatysqan jarystardyń barlyǵynda júldeli oryndardy ıelenip, únemi jeńis tuǵyryna kóterildi. Mine, endi jastar arasyndaǵy álem birinshiliginde qola medaldi moınyna ildi. Men shákirtimen dán rızamyn. Aldaǵy ýaqytta Eldananyń baǵyndyrǵan belesteri budan da bıik bolatynyna óz basym esh shúbá keltirmeımin, –  dep Darhan Qabylanbekov aǵynan jaryldy.

Aıtqandaı-aq, Eldana Tálipova qysqa ǵana merzim aralyǵynda óz qurbylarynyń aldy boldy. Orta mektepte oqyp júrgen kezdiń ózinde birqatar respýblıkalyq jáne halyqaralyq týrnırlerde atoı saldy. Áli esimizde, 2017 jyly 15 jasar Eldana Shvesııaǵa sapar shegip, «Altyn qyzdar» dep atalatyn dúbirli dodada altynnan alqa taǵynǵany. Fınaldyq saıysta ol ırlandııalyq Loren Laıondy 90 sekýnd aralyǵynda uryp jyqqany jaıynda sol kezde barlyq gazetter jarysa jazǵan edi. Sodan keıin Ýkraına, Reseı jáne taǵy basqa memleketterde jalaýy jelbirgen jarystarda Tálipova bas júldeni oljalady.

Jasóspirimder men jastar býyny arasyndaǵy Qazaqstan birinshiliginde qarsylas shaq keltirmegen Eldana Tálipova bıyl Polshada ótken álemdik dodada Qazaq eli namysyn qorǵady. Jaýapty jarysta ol jankúıerler senimine selkeý túsirmeı, elge qola medalmen oraldy. Eldanynyń endigi maqsaty – Qazaqstannyń áıelder quramasy sapyna enip, baıraqty básekelerde tabysty óner kórsetý.  

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar