Aq úıdiń resmı saıtynda Reseı Federasııasy úkimetiniń «zııandy syrtqy áreketine» jaýap retinde jarııalanǵan málimdemede birqatar jeke tulǵa men uıymnyń jumysyna shekteý qoıylǵan. Qujatta Baıden ákimshiligi Amerıka Qurama Shtattary Reseımen turaqty jáne boljamdy qarym-qatynasty qalaıtynyn anyq kórsetkeni aıtylǵan. Sondaı-aq AQSh bıligi eki el qarym-qatynasyn teris traektorııada jalǵastyrý kerek dep oılamaımyz deıdi. «Degenmen, biz ulttyq múddelerimizdi qorǵaıtynymyzdy, Reseı úkimetiniń qaýip tóndiretin is-áreketterine jaýap beretinimizdi ashyq aıttyq» delingen habarlamada. Bul arqyly AQSh Reseıdiń «turaqsyzdyqqa jeteleıtin halyqaralyq is-qımyldary» toqtamaǵan nemese odan saıyn órshigen jaǵdaıda strategııalyq jáne ekonomıkalyq saldary bolatynyn eskertip otyr.
Reseıge taǵylǵan aıyp kóp. Atap aıtqanda, «AQSh pen seriktesteriniń demokratııalyq ınstıtýttaryna, ádil ári ashyq demokratııalyq saılaý ótkizýge kedergi keltirý, kıbershabýyldarǵa uıytqy bolý nemese qatysý, ózge elderdiń úkimetterine áser etý úshin transulttyq sybaılas jemqorlyqqa jol berý, dıssıdentter men jýrnalısterge qarsy eksterrıtorııalyq sıpattaǵy áreketter, AQSh-tyń ulttyq qaýipsizdigi úshin mańyzdy elder men memleketterdiń qaýipsizdigine qol suǵý, memleketterdiń aýmaqtyq tutastyǵyn qurmetteýdi ustanatyn halyqaralyq zań prınsıpterine qarsy kelý» sekildi aıyptaýlar bar.
AQSh Qarjy mınıstrliginiń sheteldik aktıvterdi baqylaý basqarmasy Reseı banki, Ulttyq ál-aýqat qory jáne Qarjy mınıstrligi shyǵarǵan oblıgasııalardy satyp alýǵa, olarǵa qaryz berýge tyıym saldy. Bul tyıym 2021 jylǵy 14 maýsymda kúshine enbek.
Sondaı-aq AQSh Qarjy mınıstrligi Reseıdiń alty tehnologııalyq kompanııasyn «qara tizimge» engizip otyr. Málimdemede bul kompanııalar «Reseıdiń arnaıy qyzmetteriniń kıber baǵdarlamasyna qoldaý kórsetedi, onyń ishinde saraptamalyq keńester berip, baǵdarlamalar ázirleýge jáne kıberkeńistiktegi zııandy áreketterdi jeńildetýge kómektesedi» delingen.
«AQSh-taǵy prezıdent saılaýynyń nátıjelerine áser etýge tyrysqany» jáne «jalǵan aqparat taratqany úshin» 32 zańdy jáne jeke tulǵaǵa canksııa engizilgen. El úkimeti mundaı qyzmetpen aınalysatyndardy qýdalaýdy jalǵastyratynyn aıtady. Odan bólek, Vashıngtondaǵy Reseı dıplomatııalyq mıssııasynyń 10 qyzmetkerin elden shyǵarý týraly sheshim qabyldanǵan.
Jaqynda AQSh-nyń Qazaqstandaǵy elshisi Ýılıam Mozer Reseıge qatysty sanksııalardyń Qazaqstanǵa áseri bolmaıtynyn jetkizdi.
«Reseıdiń is-áreketin ózgertý úshin osy sanksııa sharalaryn qabyldaǵanymyzdy aıtqym keledi. Munda bir nárseni atap ótý kerek: olardyń bizdiń saılaýǵa jáne memlekettik aqparatqa aralasý sııaqty áreketi boldy. Biraq Qazaqstanǵa qatysty bul sanksııalardyń mindetti saldaryn boldyrmaý úshin biz Qazaqstanda jumys istedik jáne jumys isteı beremiz de. Biz bul sanksııalardyń Qazaqstanǵa áser etkenin qalamaımyz», dedi Ý.Mozer.
Reseı óz kezeginde AQSh-qa qarsy sanksııalaryn jarııalady. Máskeý sáıkesinshe 10 amerıkalyq dıplomatty elden shyǵaryp jibermek. Reseı men úshinshi elderdiń azamattaryn AQSh elshiligine nemese bas konsýldyǵyna jumysqa tartýdy toqtatý boıynsha da sharalar qarastyrylady. Sondaı-aq amerıkalyq dıplomattardyń ornalasqan jerlerinen tys aýmaqtarǵa saparlaryna tyıym salady. Reseıdiń ishki isterine aralasatyn amerıkalyq qorlar men úkimettik emes uıymdardyń jumysyn shekteý boıynsha sharalar qabyldanbaq. Sonymen qatar jaqyn arada mınıstrlik «qara tizimge» engizilgen segiz amerıkalyq sheneýniktiń attaryn jarııalaıtynyn málimdedi. Eldiń syrtqy ister mınıstrligi eger Vashıngton sanksııalar saıasatyn ustanýdy jalǵastyrsa, Máskeý basqa da sharalardy qarastyra bastaıdy deıdi. Mınıstrlik Máskeý Vashıngtonmen qarym-qatynastaǵy shıelenistiń odan ári ósýine jol bergisi kelmeıtinin jáne dıalogqa ashyq ekenin jetkizdi. AQSh ta sońǵy engizilgen sanksııalarǵa qaramastan, dıplomatııalyq baılanys ornatýǵa daıyn sekildi.
Aıta ketý kerek, Reseı prezıdenti Vladımır Pýtın ózge 40 el kóshbasshysymen qatar, AQSh bastamasymen ótetin Halyqaralyq klımat sammıtine qatysady. Alaıda Pýtın – Baıden kelissózi ótpeıtini belgili.
