Elorda • 23 Sáýir, 2021

Nur-Sultanda taǵy bir aýla klýby ashyldy

8 ret kórsetildi

Nur-Sultan ákimdigi aýla ortalyqtaryn damytýǵa erekshe kóńil bóledi. Jyl saıyn elordanyń ár aýdanynda aýla klýbtarynyń sany artyp keledi, dep habarlaıdy Egemen.kz qala ákiminiń baspasóz qyzmetine silteme jasap.

Nur-Sultanda taǵy bir aýla klýby ashyldy. "Qolóner ortalyǵy" jańa aýla klýbynyń tárbıelenýshilerine (Nájimedenova 10/3) qolóner, zergerlik jumys, pishý jáne tigý, qysh jáne sándik-qoldanbaly ónermen aınalysý úshin barlyq jaǵdaı jasalǵan.

«14-29 jas aralyǵyndaǵy jastarmen jumys isteımiz. Qolóner sheberligi — ata-babalarymyzdyń murasy. Halqymyzdyń tarıhy óte baı. Basty maqsat – jastardy qolónerge úıretý, ulttyq kodty saqtaý jáne árıne mádenıetimizdi barynsha nasıhattaý. Aramyzda ómirin qolónerge arnaǵan otbasylar bar. Balalar bizden belgili bir bilim alyp, tabys taba alady», dep atap ótti «Qolóner ortalyǵy» aýla klýbynyń jetekshisi Raýza Balmaǵambetova.

Osylaısha, qazirgi ýaqytta Nur-Sultanda 27 aýla klýby jumys isteıdi, al olardyń tárbıelenýshileriniń sany úsh myńǵa jýyqtady.

«Men osy aýla klýbyn qurý týraly anam arqyly bildim, ol meni osynda tirkeýdi jón dep sanady. Al men qatty qýandym. Sebebi qolónermen, tiginmen aınalysqandy unatatynmyn. Bolashaǵymdy osy salamen baılanystyramyn. Ulttyq kıim dızaıneri bolǵym keledi», dedi «Qolóner ortalyǵy» aýla klýbynyń qatysýshysy Janel.

Elordalyq aýla klýbynyń basty artyqshylyǵy — balalar tegin qatysa alady. Sondaı-aq, qala boıynsha aýla klýbtary jumys isteıdi, onda balalar sportpen, modeldeýmen, robototehnıkamen, mýzykamen, bımen jáne t.b. baǵyttarmen aınalysa alady.

Sondaı-aq, elorda ákimdigi Memleket basshysynyń tapsyrmasy boıynsha aýlalar men qoǵamdyq keńistikterdi abattandyrý boıynsha aýqymdy jumystar júrgizýde. О́tken jyldyń ózinde qala ákimdigi 76 gektardan astam aýmaqty abattandyrdy: bul 150-den astam aýla jáne 60 qoǵamdyq keńistik (saıabaqtar, skverler, býlvarlar). Bıyl bul jumys belsendi túrde jalǵasatyn bolady.

Bos ýaqyt ótkizý ortalyqtaryn ashý jáne aýlalardy/qoǵamdyq keńistikterdi abattandyrý qala turǵyndaryn sportpen aınalysýyna múmkindik beredi.

Sońǵy jańalyqtar

Uqsas jańalyqtar