Nur-Sultanda advokattar koronavırýstyń taralý qarqyny boıynsha astananyń «qyzyl aımaqta» bolýyna baılanysty tergeý ızolıatorlaryndaǵy óz klıentterimen kezdese almaı jatqandyǵyn málimdedi.
SK-Farmasııanyń burynǵy basshysy Berik Sháriptiń isine qatysty sot prosesinde aıyptalýshy men onyń advokaty tergeý ızolıatorlarynda kezdesýine ruqsat berýin surady. О́z kezeginde prokýror ruqsat berý týraly sheshim KVI jaǵdaıyna baılanysty qabyldanatynyn aıtty. Al sýdıa advokat pen sottalýshylarǵa tek Zoom platformasy arqyly sóılesýge bolatynyn málimdedi.
Osyǵan uqsas málimdemeni «Astana LRT» isi boıynsha aıyptalýshylardyń advokattary da jasady.
Nur-Sultan qalasynyń sanıtarlyq-epıdemıologııalyq baqylaý departamenti tergeý ızolıatorlarynda tergeýshilermen jáne advokattarmen kezdesýge eshqandaı shekteý engizilmegenin habarlady.
«Qylmystyq-atqarý júıesi mekemelerinde sottalǵandar, kúdiktiler men aıyptalýshylar qatysatyn barlyq is-sharalar olardyń mindetti túrde maskalardy, rezeńke qolǵaptardy, jabyq úlgidegi kózildirikterdi paıdalana otyryp jáne qatysýshylar arasynda eki metr qashyqtyqty saqtaı otyryp ótkiziledi. Bul QR Bas memlekettik sanıtarlyq dárigeriniń 2020 jylǵy 25 jeltoqsandaǵy № 67 qaýlysynyń 24 – qosymshasynyń 4-tarmaǵynda jazylǵan», delingen departamenttiń jaýabynda.
