Jaqynda múmkindigi shekteýli bolsa da el qatarly jumys istep otyrǵan mamanmen tildesýdiń sáti tústi. Aty-jóni Erbol Eskenov eken. Osynda jumys istegenine eki jyldaı ýaqyt bolypty. Negizgi mamandyǵy – tehnık-baǵdarlamashy. «Fızıkalyq múmkindigimniń shekteýli bolýy jumys isteýge eshqandaı da kedergi emes. О́ıtkeni múgedektik masyldyq emes, jumys isteýge bárimiz talpynýymyz kerek. Qaıta úıde otyrǵan adam aýrýǵa berilip, ózin-ózi mújigish keledi. Al ujymda jumys isteseń, barlyq qıyndyqty umytyp, ýaqyttyń qalaı ótkenin bilmeı qalasyń», deıdi Erbol.
Jalpy, áleýmetpen jumys isteıtin salada qyzmet etý – ońaı emes. Ásirese Halyqqa qyzmet kórsetý ortalyǵynyń qyzmetkeri bolý úshin jaýapkershilik pen tózimdilik kerek. О́ıtkeni munda halyq san salaly máselelermen keledi. Solardyń ishinde sabyrsyzdyq tanytyp, birden ashýǵa beriletinder de barshylyq. «Kópshiliktiń kóńilinen shyǵý úshin aldymen óziń sabyrly bolýyń kerek. Jyly sóıleseń, baıyppen túsindirseń, bárimen til tabysýǵa bolady. Men bastapqyda kireberiste jurtshylyqqa keńes berip otyrdym. Halyq maǵan músirkeýshilikpen qarap, HQKO-nyń shyn qyzmetkeri ekenime sene qoımady. Qansha keńes berip tursam da kózimen basqa mamandy izdep turatyn. Qazir kózderi úırengen sııaqty. Menimen kádimgi mamanmen sóıleskendeı sóılesedi, bul meniń de mártebemdi bıiktete tústi» deıdi E.Eskenov.
Qazir Erbol «Nátıje» azamattardyń ótinishterin qabyldaýdyń biryńǵaı ortalyǵy» qanatqaqty jobasymen jumys istep jatyr eken. Bul joba Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý sheńberinde qolǵa alynǵan. Bıylǵy shilde aıynan bastap, barlyq memlekettik mekemege «e-ótinish» aqparattyq júıesin engizý josparlanyp otyr. Jobanyń tıimdiligi sol, jurtshylyq aryz-shaǵymyn arqalap, ártúrli memlekettik mekemege baryp júrmeıdi. Resmı organdarǵa baǵyttalǵan ótinishin, shaǵymyn HQKO-ǵa qaldyryp ketse bolǵany, ári qaraıǵy jumysty osy ortalyqtyń mamandary retteıdi. О́tinishke jaýapty da ıeleri osy ortalyqtan alyp ketedi, ıaǵnı halyqtyń ýaqyty únemdeledi ári memlekettik mekemeniń aryz-shaǵymǵa jaýap berý merzimi qysqarady. «Bul – halyqtyń ótinishterine qatysty prosesterdi sıfrlandyrýǵa arnalǵan aqparattyq júıe. Paıdasy bar. Máselen, memlekettik organdar arasynda saýaldar sanyn ońtaılandyrýǵa, sonyń esebinen eldiń ótinishterin qaraý merzimin qysqartýǵa múmkindik beredi. Al biz ótinishti qaraýdyń barlyq satysy men ýaqyty jóninde ótinish ıesine aqparat berip otyramyz. Jańa joba memlekettik mekemelerdiń jumysyn baǵalaýǵa da jol ashady», deıdi maman. Osy jobaǵa qatysty HQKO mamandaryn oqytý júrgizilip jatyr. Erbol da solardyń qatarynda. «Mundaı halyqqa tıimdi jobalar kóbirek qoldanysqa engizilse, jumys ta jeńildeı túser edi» deıdi ol.
Jalpy, «Azamattarǵa arnalǵan úkimet» korporasııasynda Erbol sııaqty erekshe qajettiligi bar 831 adam jumys isteıdi eken. Korporasııanyń baspasóz qyzmetiniń jetekshi mamany Ásel Mızamqyzynyń málimetinshe, «Azamattarǵa arnalǵan úkimet» muqtaj jandarǵa qatysty qyzmetterge jiti kóńil bóledi. «Máselen, múgedektikti belgileýge baılanysty qyzmetke qol jetkizý úshin azamattar buryn eki mekemeni aralap, 67 qujat jınaýǵa májbúr edi. Qazir medısınalyq-áleýmettik saraptamanyń sheshimi birden elektrondy úkimettiń portalyna qoıylady da, osy málimetke sáıkes memlekettik korporasııa járdemaqy taǵaıyndaıdy, al jergilikti atqarýshy organ qajetti kómekterdi kórsetedi. Korporasııa muqtaj jandarǵa qolaıly jaǵdaı jasap qana qoımaı, olardy jumysqa alý máselesine de úlken mán berip keledi. Qazirgi tańda korporasııada jumys isteıtin múgedek jandardyń bári de ózderin eńbekqor, jaýapty da saýatty maman retinde tanytty», deıdi Ásel.
Qazirgi tańda halyqqa qyzmet kórsetý ortalyqtarynda pandýstar, shaqyrý tetikteri, taktıldi joldar, jeńildik terezeleri men braıl taqtaıshalary qarastyrylǵan. Front-ofısterde múmkindigi shekteýli jandarǵa qyzmet kórsetetin arnaıy «jeńildik terezeleri» bar. Al 1,2 - toptaǵy múgedekter HQKO-ǵa kelmeı-aq, 1414 nómirine qońyraý shalyp nemese gov4c.kz saıtynda ótinish qaldyryp, qyzmetkerlerdi úıine shaqyrta alady. Sońǵy bes jyl ishinde 206 092 memlekettik qyzmet muqtaj adamdardyń úıine baryp kórsetilgen eken.
1411-áleýmettik-aqparattyq ortalyǵy muqtaj kisilerge keńes berip qana qoımaı, moraldyq turǵyda demeý de kórsetedi. Operatorlardyń aıtýynsha, erekshe qajettiligi bar jandar memlekettik qyzmetter boıynsha keńes alý úshin ǵana emes, syrlasyp, muńyn shaǵý úshin de habarlasady eken. «Ondaı kezde biz azamattardyń áńgimesin baıypen tyńdap, sherin tarqatýǵa múmkindik beremiz. Jandaryna jylý syılar sózder aıtyp, moraldyq qoldaý kórsetýge tyrysamyz», deıdi mamandar.
