Baqtııar Máken atap ótkendeı, búgingi tańda qalada kún saıyn orta eseppen 300-600 KVI jaǵdaıy tirkeledi. Salystyrmaly túrde alsaq, ótken jyldyń shildesinde bul sıfr 180-200 bolatyn. Epıdemııalyq jaǵdaıdy baǵalaý boıynsha Nur-Sultan bir aıdan astam ýaqyt «qyzyl aımaqta» tur.
«Vaksınalaý – indettiń aldyn alýdyń basty sharasy. Sol sebepti ony qoldanýdyń paıdasy yqtımal qaýipterden edáýir asyp túsedi. Memleket basshysy Qasym-Jomart Toqaev óz sózinde KVI-men kúrestegi jalǵyz senimdi sheshim vaksına ekenin aıtty. Bul lokdaýndardan shyǵý strategııasyn aldyn ala oılastyrǵan elderdiń mysalymen dáleldendi. Qazir olardyń ekonomıkasy men azamattardyń kúndelikti ómiri pandemııalyq qıyndyqtardy sezinbeıdi. Qazirgi ýaqytta halyqty vaksınalaý koronavırýs ınfeksııasymen kúrestegi mańyzdy kezeń bolyp sanalady. Ujymdyq ımmýnıtetti qalyptastyrý úshin biz 650 myńnan astam adamdy nemese qala halqynyń 60%-yn vaksınalaýymyz kerek. Búginde elordada 100 myńnan astam adam vaksınanyń birinshi komponentin, al 16 myńnan astamy vaksınanyń eki komponentin aldy», dep atap ótti ákim orynbasary.
Sonymen qatar B.Máken medısına qyzmetkerleriniń koronavırýspen kúreste óz densaýlyǵyn qaterge tigip, naýqastardy emdep shyǵarý jolynda atqaryp jatqan eńbegin aıryqsha atap ótti.
Nur-Sultan qalasy ákimdiginiń «Kópbeıindi medısınalyq ortalyq» ShJQ MKK dırektorynyń orynbasary Sáýle Atyǵaeva 15 aı boıy koronavırýs gospıtalinde jumys istep keledi.
«Biz birneshe myń naýqasty emdedik, ókinishke qaraı qaıtys bolǵandar qatary da az emes. Sol sııaqty áriptesterimizden de, týystarymyzdan da, tanystarymyzdan da aıyryldyq. Sáýir aıynda indettiń aıtarlyqtaı óskenin baıqap otyrmyz. Osy jyldyń qańtar aıymen salystyrsaq, koronavırýs úsh-tórt ese, ólim-jitim bes ese ósti. Qańtar aıynda 22 adam qaıtys bolsa, sáýirde 104 adamǵa jetti. Qaıtys bolǵan týystarynyń máıitin alýǵa kelgen kisilerdiń qaıǵysyn kórý – biz úshin óte aýyr. «Vaksına nege erterek paıda bolǵan joq», «ata-anamyzǵa nege vaksına saldyrmadyq, qazir olardy jerleýdiń ornyna bir dastarqan basynda otyrar edik» degen sózderdi jıi estımiz», dedi S.Atyǵaeva.
Indettiń aldyn alýdyń jalǵyz, jeńil, qoljetimdi joly – vaksınalaý. Vaksına bólip shyǵaratyn antıdeneler qaýipti vırýspen betpe-bet kezdeskende aýrýdyń jeńil ótýine yqpal etedi.
«Eń durysy vaksına qabyldap, ımmýnıtetti arttyrý. Bul sózimdi 30 jylǵa jýyq tájirıbesi bar juqpaly aýrýlar dárigeri retinde aıtyp otyrmyn. Men dıfterııanyń órshýin 1994-1995 jyldary kórdim, ol kezde qaıtys bolǵan týystarymyzdy jerledik. Ol kezeńdi de vaksına arqyly jeńip shyqtyq. Biz qyzylshanyń órshigenin de kórdik, ásirese balalarǵa vaksına bolmaǵan jyldary úlken qıyndyqqa tap boldyq. Sol sebepti jaǵdaıdy tolyqtaı salystyra alamyn», dedi medısınalyq ortalyq dırektorynyń orynbasary.
Áriptesiniń aıtqanyn qalalyq ftızıopýlmonologııa ortalyǵynyń dırektory Anna Sepke de qoldady. Atalǵan ortalyq 2020 jyly KVI pasıentterin qabyldaǵan alǵashqy klınıka boldy.
«Indettiń basynda eń birinshi bolyp naýqastardy qabyldadyq. Naýqastardy emdeıtin jalǵyz mekeme bolamyz dep oılaǵan edik. Biraq ótken jyly jaǵdaı múldem basqa baǵytta órbidi. Aýrýhanadaǵy oryn qoryna úlken júkteme tústi, aýyr jaǵdaıdaǵy naýqastar da óte kóp. О́tken jyldyń jazy medısına qyzmetkerleri úshin, jalpy densaýlyq saqtaý júıesi úshin eń qıyn kezeń boldy. Búgingi tańda aýrý odan da kóp. Biraq ınfeksııaǵa qarsy vaksınanyń shyǵýy úlken kómegin tıgizbek. Vaksınalaý bizge tyǵyryqtan shyǵatyn úmit syılady. Túptep kelgende bul jumys óz nátıjesin berip, adam ómirin saqtap qalatynyna senimdimin», dep atap ótti A.Sepke.
Qoǵam qaıratkeri, dáriger Nadejda Petýhova eldegi epıdemııalyq jaǵdaıdyń ýshyqqanyn atap ótti. Onyń aıtýynsha, qazir elde koronavırýs aýrýy 2020 jyldyń shildesine qaraǵanda úsh ese kóp.
«Búginde jansaqtaý bólimderinde aýyr jaǵdaıdaǵy naýqastar kóp. Biz bul indettiń buryn zerttelmegen, belgisiz jáne jańa túri ekenin bilemiz. Qazaqstannyń óz halqyn vaksınalaýǵa múmkindigi bar ekeni qýantady. Keıbir elderde adamdar mıtıngilerge shyǵyp, narazylyq bildirýde, óıtkeni olardyń vaksına alýǵa múmkindigi joq. Vaksına koronavırýstan qorǵanýdyń jalǵyz senimdi, qaýipsiz jáne tıimdi ádisi ekenin esten shyǵarmaıyq», dedi N.Petýhova.
О́z kezeginde «Ulttyq ǵylymı medısınalyq ortalyq» AQ Basqarma tóraǵasy, medısına ǵylymdarynyń doktory Abaı Baıgenjın qazaqstandyqtar qabyldaıtyn vaksınalardyń qaýipsizdigi men joǵary tıimdiligin alǵa tartty.
«Biz Máskeýdegi professor Gınsbýrg basqaratyn N.F.Gamaleıa atyndaǵy Epıdemıologııa jáne mıkrobıologııa ulttyq zertteý ortalyǵyna bardyq. Eki kún ishinde bizge Spýtnık V vaksınasynyń búkil tizbegi men damý mehanızmi kórsetildi. Bul vaksına sonaý keńes dáýirinen jasalǵan eń sátti ázirlemelerdiń biri ekenine kóz jetkizdik. Biz koronavırýstyń qandaı qaýipti aýrý ekenin jaqsy bilemiz. Búginde vaksınanyń balamasy joq», dep atap ótti A.Baıgenjın.
