Eki el basshylary bir-birin qasıetti Ramazan aıymen quttyqtap, Qazaqstan men Qatar halyqtarynyń ósip-órkendeı berýine tilektestik bildirdi.
Prezıdent pen sheıh ekijaqty baılanystardyń damý perspektıvalaryn jan-jaqty talqylap, kóp salaly yntymaqtastyqty keńeıtýge beıildi ekenin naqtylady.
Qasym-Jomart Toqaev pen sheıh Tamım ben Hamad Ál Tánı qazaq-qatar kooperasııasyn jańa mazmunmen tolyqtyrýǵa qajetti resýrstar men zor áleýet bar ekenin atap ótti.
Qazaqstan Prezıdenti eki eldiń úkimetteri men isker toptary arasyndaǵy qarym-qatynastardy jandandyrýdy jáne birlesken ınvestısııalyq jobalardyń jekelegen tizimin jasaqtaýdy usyndy. Memleket basshysy ekijaqty yntymaqtastyqtyń basym baǵyttary retinde aýyl sharýashylyǵy, geologııalyq barlaý, taý-ken ónerkásibi, kólik jáne logıstıka, sondaı-aq, qarjy jáne bank sektoryn atady.
Qasym-Jomart Toqaev eki el arasyndaǵy yntymaqtastyqtyń naqty baǵyttary boıynsha joǵary deńgeıdegi ýaǵdalastyqtardy naqtylaý úshin Qatar Ámirin ózine yńǵaıly ýaqytta Qazaqstanǵa resmı saparmen kelýge shaqyrdy.
Sheıh Tamım Ál Tánı Dohanyń Qazaqstanmen kópjaqty ekonomıkalyq jáne ınvestısııalyq yntymaqtastyǵyn damytýǵa múddeli ekenin jetkizdi. Qatar Ámiriniń pikirinshe, ekijaqty baılanystardyń ózindik qozǵaýshy kúshi bolatyn birneshe iri ınvestısııalyq jobalardy daıyndaý kerek.
Kelissózder barysynda eki el úkimetteriniń COVID-19 indetiniń taralýyna qarsy kúreste qabyldap jatqan sharalary arnaıy sóz boldy. Qatar Ámiri COVID-19
indetine qarsy ekpe daıyndaýdaǵy qazaqstandyq ǵalymdardyń jetistikterin joǵary baǵalap, bul Qazaqstannyń óz vaksınasyn jasap shyǵarǵan on memlekettiń jáne ǵylymı ázirlemesin tirkegen bes eldiń qataryna kirýge múmkindik bergenin atap ótti.
Áńgimelesý sońynda sheıh Tamım Ál Tánı Qasym-Jomart Toqaevqa Qazaqstanǵa saparmen kelýge shaqyrǵany úshin alǵys aıtty.
