Abaı oblysynda ótken joǵary kórkemdik keńestiń alǵashqy otyrysy óńirdiń mádenı-rýhanı ómirindegi jańa kezeńniń bastalǵanyn ańǵartty. Qazaqstannyń halyq ártisi, professor Tuńǵyshbaı Jamanqulov, jazýshy Asqar Altaı, Qazaqstannyń mádenıet qaıratkeri Otantaı Káribjanuly, Qazaqstannyń eńbek sińirgen qaıratkerleri Darıǵa Turanqulova, Bekjan Turys, Áset Imanǵalıev, aktrısa Gúlmıra Jakılına, rejısser Erlan Káribaev, dramatýrg Álisher Rahat (baqylaýshy) kórkemdik keńestiń múshesi bolyp bekitildi. Keńes músheleriniń usynysymen, oblys ákiminiń kelisimimen Berik Ýálı joǵary kórkemdik keńestiń tóraǵasy bolyp taǵaıyndaldy.
«Búgin Abaı oblysynda alǵash ret ótip otyrǵan joǵary kórkemdik keńestiń otyrysy – óńirimizdiń mádenı-rýhanı ómirindegi mańyzdy qadamdardyń biri. О́ıtkeni mundaı kórkemdik keńester elimizdiń basqa óńirlerinde joqtyń qasy. Abaı oblysy ákiminiń janynan qurylǵan joǵary kórkemdik keńestiń negizgi maqsaty – teatr óneriniń damýyna serpin berý, shyǵarmashylyq úderisterdiń sapasyn arttyrý, óńirdegi mádenı saıasatty júıeli túrde jetildirý», dedi óńir basshysy.
Alǵashqy otyrysta Tuńǵyshbaı Jamanqulov, Otantaı Káribjanuly, Darıǵa Turanqulova, Bekjan Turys sóz sóılep, teatr óneriniń qazirgi ahýaly, shyǵarmashylyq baǵytty jetildirý, salanyń ózekti máselelerine qatysty usynys-pikirlerin bildirdi. Oblysta teatr ujymynyń vakansııasyn kóbeıtý, aılyq-jalaqysyn arttyrý, qyzmetkerlerge baspana berý týraly usynystar aıtyldy.
«Bul keńes tek Abaı elindegi teatrdyń ǵana emes, elimizdegi teatrlardyń muń-muqtajyn joqtaıtyn jaǵdaıǵa jetetin kórkemdik keńes bolýǵa tıis», dedi Tuńǵyshbaı Jamanqulov.
Al Semeıdegi «Darıǵa-aı» jastar teatrynyń negizin qalasqan teatr salasynyń bilikti ustazy Darıǵa Turanqulova oblys jastaryn teatr mamandyǵyna oqytýǵa grant bólý týraly usynysyn aıtty. Sondaı-aq jıynda Abaı atyndaǵy Qazaq mýzykalyq drama teatrynyń dırektory Nartaı Saýdanbekuly oblystyq teatrdyń jaı-kúıi týraly baıandady. Keńeste teatr repertýarynyń kórkemdik deńgeıin qalyptastyrý, mádenı qyzmetterdiń sapasyn baǵalaý jáne shyǵarmashylyq ujymdardy qoldaý baǵytynda jumys júrgizilmek.
Aıta keteıik, Abaı atyndaǵy Qazaq mýzykalyq drama teatry – elimizdiń mádenı keńistiginde ózindik orny bar, tarıhy tereń óner ordasy. 1934 jyly memlekettik teatr retinde qurylǵan ujym ulttyq sahna óneriniń damýyna eleýli úles qosyp keledi. Alaıda oblysta sodan beri, 80 jylǵa jýyq ýaqytta birde-bir jańa mádenı nysan salynbaǵanyn aıtady jergilikti jurtshylyq.
Abaı atyndaǵy Qazaq mýzykalyq drama teatry sahnasynda ótken sharaǵa óńir basshylyǵy men belgili óner qaıratkerleri qatysty. О́ńir basshysy óner ıelerin kásibı merekelerimen quttyqtap, óńirde teatr ónerin qoldaýǵa erekshe kóńil bólinip kele jatqanyn jetkizdi.
«Memleket basshysy Qasym-Jomart Toqaev Semeı qalasynda jańa teatr salý týraly tapsyrma bergenin bilesizder. Qazirgi tańda jobalyq-smetalyq qujattamasy ázirlenip jatyr. Bul bastama shyǵarmashylyq ujymdarǵa tyń serpin berip, ulttyq teatr óneriniń jańa bıikterge kóterilýine jol ashatynyna kámil senemiz. Búgin Semeıde teatr ónerin qoldaý maqsatynda qurylǵan joǵary kórkemdik keńestiń alǵashqy otyrysy ótti. Jıynda Darıǵa Turanqulova talantty jastardy teatr mamandyǵyna oqytý jóninde usynys aıtty. Temirbek Júrgenov atyndaǵy óner akademııasyna oblys ákiminiń grantymen oqýǵa joldama beretin bolamyz», dedi Berik Ýálı.
Mádenı is-shara barysynda Qazaqstannyń eńbek sińirgen qaıratkeri Darıǵa Turanqulova, sondaı-aq jergilikti teatrdyń birqatar qyzmetkeri «Abaı oblysyna sińirgen eńbegi úshin» tósbelgisimen, oblys ákiminiń Alǵyshattarymen, Qazaqstannyń halyq ártisi Tuńǵyshbaı Jamanqulov «Dara» medali jáne Alǵyshatymen marapattaldy. Sonymen qatar «Eń úzdik er adam beınesi», «Eń úzdik áıel adam beınesi» atalymdary boıynsha úzdikter anyqtalyp, F.Dostoevskıı, Beken Imahanov, Rahymjan Otarbaev, Iаkov Gorelnıkov, Akbaráli Aıtbaev atyndaǵy arnaıy syılyqtar tabystaldy.
Merekelik kesh aıasynda Abaı atyndaǵy memlekettik Qazaq mýzykalyq drama teatry, F.Dostoevskıı atyndaǵy orys drama teatry jáne «Darıǵa-aı» jastar teatrynyń ujymdary kórermen nazaryna qoıylymdaryn usyndy.
Abaı oblysy
