Keshkilik ýaqytta teatr aldy erekshe jandanyp, sándi kıingen kórermen legi tolastamady. Foıede qyzý áńgime, asyǵa kútken áser, shyǵarmashylyq tolqynys sezilip turdy. Ár buryshtan qoıylym týraly pikir almasqan kórermen men teatr synshylarynyń oılary estilip, ónerge degen ortaq súıispenshilik bir arnaǵa toǵysqandaı áser qaldyrdy.
Sherý shymyldyǵy túrilgen sátten bastap-aq sahnada san túrli taǵdyrlar men harakterler tirilip, kórermendi beıjaı qaldyrmady. Atap aıtsaq, Jánibek Álikenniń názik sezimge qurylǵan «Júrek syry. Mahabbatym sen...» dramasy kóńil túkpirine boılasa, Bertolt Brehttiń «Sheńberi» qoǵam men adam bolmysyna tereń úńilýge jeteledi. Ábish Kekilbaıulynyń «Kúıi» ulttyq rýh pen fılosofııalyq tolǵanysty astastyryp, kórermendi oı teńizine batyrdy. Al Lev Tolstoıdyń «Anna Karenına» romany jelisimen qoıylǵan «Anna Karenına. Roman paraqtary» horeodramasy sahna men plastıkanyń úılesimi arqyly ishki dramany ózgeshe órnektedi. Álemdik dramatýrgııa jaýhary «Romeo & Juliet» shyǵarmasynyń zamanaýı úlgisi jas kórermenniń yqylasyn oıatyp, klassıkanyń máńgilik ekenin taǵy bir dáleldedi. Dýlat Isabekovtiń ıýmor men shyndyqty qatar órgen «Qazaqı komedııa nemese Bonaparttyń úılenýi» kórermenge kóterińki kóńil kúı syılasa, Maǵjan Jumabaevtyń «Sholpannyń kúnási» dramasy adam janynyń kúrdeli ıirimderin ashyp berdi.
Ár qoıylymnan keıin zalda uzaq qol shapalaqtaý tolastamaı, kópshilik yqylasy sahna ıelerine degen sheksiz qurmetti ańǵartty. Arnaıy shaqyrylǵan kásibı mamandar, teatr men kıno sarapshylary qoıylymdarǵa kásibı turǵyda baǵa berip, akterlik sheberlik pen rejısserlik izdenisterdi jiti saralady. Sahnagerlerge arnap ótkizilgen sheberlik sabaqtarynan da alar taǵylym mol boldy. Al kórermender arnaıy saýalnama arqyly óz tańdaýyn jasap, óner merekesiniń belsendi qatysýshysyna aınaldy.
Osylaısha, bir aptaǵa sozylǵan «Qallekı tynysy» sherýi ónersúıer qaýym júreginde óshpes áser qaldyryp, teatrdyń tiri óner ekenin taǵy bir márte dáleldedi. Sahnadaǵy ár obraz, ár sóz, ár qımyl – adam janyna jol tapqan shynaıy ónerdiń kórinisi boldy. Elordadaǵy bul mádenı oqıǵa teatrdyń tek óner ordasy ǵana emes, rýhanı tárbıe men tereń oıdyń mekeni ekenin aıqyn ańǵartty.
Aptalyqtyń sharyqtaý shegi – 27 naýryz Halyqaralyq teatr kúnine oraı ótken qorytyndy gala-kesh boldy. Sahna shymyldyǵy ashylǵan sátten bastap zalda erekshe tolqý ornady. Bul – tek marapattaý rásimi emes, teatr ujymynyń bir jyl boıy atqarǵan shyǵarmashylyq izdenisiniń qorytyndysy, ónerge degen adaldyqtyń saltanaty edi.
Aldymen kórermen tańdaýy boıynsha jeńimpazdar anyqtaldy. Zal ishin erekshe yqylasqa bólegen sátte «Úzdik akter» ataǵy Janat Ospanovqa, al «Úzdik aktrısa» atalymyndaǵy júlde Inabat Ábenovaǵa tabystaldy. Sonymen qatar kórermender tańdaýy boıynsha «Úzdik spektakl» atalymy da erekshe atalyp ótip, bul marapat kórermen men teatr arasyndaǵy shynaıy baılanystyń aıqyn kórinisine aınaldy.
Kezek sarapshylar alqasynyń sheshimine berilgende, zal ishi tipti tyna qaldy. Nátıjesinde, «Úzdik akter» atalymy taǵy da Janat Ospanovqa buıyryp, onyń kásibı sheberligi men sahnalyq qýaty erekshe atap ótildi. «Úzdik aktrısa» atalymynda Aıkórkem Turanova jeńimpaz tanyldy. Sonymen qatar ekinshi plandaǵy rólder de nazardan tys qalmady. «Ekinshi plandaǵy úzdik er adam róli» atalymyn Ulan Qabyl ıelenip, shaǵyn obrazdyń ózin úlken ónerge aınaldyra alǵanyn dáleldedi. Al «Ekinshi plandaǵy úzdik áıel róli» Botagóz Maqsutovaǵa tabystalyp, onyń sahnadaǵy shynaıylyǵy kórermen júregine jol tapqany atalyp ótti. Jas býynǵa baǵyttalǵan «Úmit» atalymy Qaıyrjan Sadyqovqa berilip, bul marapat onyń aldaǵy shyǵarmashylyq jolyna úlken senim berdi. Al «Teatr tarlany» atalymyndaǵy qurmet Halyq ártisi Tilektes Meıramovqa berilip, kórermen qoshemetine bólense, sarapshylardyń arnaıy júldesi aktrısa Aınur Jetpisbaevaǵa tabystaldy. Sonymen qatar ataýly marapattar legi jalǵasyp, árbir óner ıesiniń eńbegi elendi. Atap aıtsaq, rejısser Nurlan Jumanııazov Kekilbaevtar áýletiniń arnaıy syılyǵyna ıe bolsa, Qazaqstannyń eńbek sińirgen qaıratkeri Nurken О́teýil men Marǵulan Namenov Eraly Toǵjanov taǵaıyndaǵan arnaıy júldemen marapattaldy. «Daryn» memlekettik jastar syılyǵynyń laýreaty Aqmaral Tanabaeva Qazaqstannyń halyq ártisi Talǵat Temenov usynǵan arnaıy syılyqqa ıe bolyp, shyǵarmashylyq izdenisi úshin qurmetke bólendi. Al aktrısa Araı Omarova dızaıner Jadyra Sahıevanyń arnaıy júldesin ıelendi. Odan bólek, teatrdyń sahna syrtynda eńbek etip júrgen qyzmetkerleri de nazardan tys qalmady. Olardyń mańdaıteri men tynymsyz eńbegi arnaıy dıplomdarmen marapattalyp, kórermen qoshemetine ıe boldy. Bul – teatrdyń tek akterlerden ǵana emes, tutas bir ujymdyq eńbekten turatynyn aıqyndaǵan áserli sátterdiń biri edi.
Osylaısha, «Qallekı tynysy» spektaklder sherýi bıyl da óz máresine jetip, ónerdiń bıik ólshemin, sahna mádenıetiniń tereńdigin hám akterlik sheberliktiń shynaıy qýatyn aıqyndady. Bir apta boıy kórermen júregine jol tapqan qoıylymdar men sahnadaǵy san qıly taǵdyrlar uzaq ýaqytqa deıin el esinde saqtalary sózsiz. Bul sherý – teatrdyń máńgilik ekenin, al ónerdiń adam janyn tárbıeleıtin eń uly kúsh ekenin taǵy bir márte dáleldegen taǵylymdy mereke boldy.
