Bıyl Esil aýdanyndaǵy úlken sýqoımalarynyń biri Torańǵul kólinde ylǵal qory ótken jylǵymen salystyrǵanda edáýir tómen, shamamen 26%-ǵa kem. Bul kóńildi ornyqtyratyn jaıt. Biraq byltyrdan osynsha kem bolǵanymen, basqa jyldarmen salystyrǵanda qalypty jaǵdaıda dep aıtýǵa bolady. Kúnniń qyzýy kúrt kóterilgendikten, Esil aýdanyndaǵy qar qalyńdyǵy qarqyndy túrde azaıyp keledi.
«Qalǵan aýdandarda da táýekelder negizinen jergilikti sıpatta, olar erigen qar sýlarynyń kelýi men muzdyń álsireýine baılanysty. Shaǵalaly ózeninde sý deńgeıiniń azdap kóterilýi tirkeldi, alaıda bul da ótken jylǵymen salystyrǵanda kóp tómen. Muz jamylǵysy birtindep bosańsyp keledi», dep jazdy ákim áleýmettik jelidegi paraqshasynda. Osylarǵa qarap bıyl tasqyn bola qoımas desek te, tabıǵattyń tosyn syıyna eshkim de kepildik bere almaıdy.
Sý resýrstary jáne ırrıgasııa mınıstrligimen, sondaı-aq «Qazsýshar» RMK Aqmola fılıalymen birlesip qabyldanǵan sheshimge sáıkes aqpannan bastap Sileti sýqoımasynan sýdy aldyn ala jiberý bastalǵan. Bul sý tasqyny kezeńin qaýipsiz ótkizýdi qamtamasyz etip, sý deńgeıiniń kúrt kóterilýin tejeıdi. 25 naýryzdan bastap aýa temperatýrasynyń kóterilýine baılanysty kóktemgi úderistiń belsendi kezeńi bastalyp ketti. Qazir jaǵdaı turaqty baqylaýda. Barlyq jaýapty qyzmetter kúsheıtilgen rejimde jumys istep jatyr.
О́ńirde tasqynnyń bolý qaýpi men qabyldanyp jatqan keshendi sharalar «Amanat» partııasynyń SQOF janyndaǵy partııalyq baqylaý komıssııasynyń, óńirlik damý keńesiniń birlesken otyrysynda da jan-jaqty qaraldy.
Qazir sý basý qaýpi bar aýmaqtar erekshe baqylaýǵa alynǵan. Qala aýmaǵynda negizgi qaýip aımaǵy retinde Zarechnyı kenti belgilengen. Munda 6 kópqabatty turǵyn úı men 90 jeke baspana bar. Jergilikti atqarýshy organdar turǵyndardy qaýipsiz aımaqtarǵa kóshirý týraly sheshim qabyldap, qazirdiń ózinde 90 otbasy qaýipsiz jerge ornalastyryldy. Oblystyq bıýdjet esebinen 72, 90 páterlik jańa turǵyn úılerdiń qurylysy júrgizilip jatyr.
Qyzyljar aýdanynda 18 eldi meken tasqyn qaýpi bar aımaqqa jatady. Tasqynǵa qarsy sharalarǵa barlyǵy 12,4 mlrd teńge bólingen. Aýdanda qorǵanys bógetterin qaıta jańǵyrtý, jol ınfraqurylymyn jaqsartý, sý burý júıelerin salý jumysy júrgiziledi. Sonymen qatar Esil ózeninde muz keptelisiniń aldyn alý maqsatynda qoparylys jasaý jumysy júrgizildi. Bul óz kezeginde ózen arnasynyń ótkizý qabiletin arttyrýǵa múmkindik beredi.
Oblys ortalyǵyndaǵy evakýasııa júıesi de tolyq daıyn. Ýaqytsha ornalastyrý pýnktteri jataqhanalar men mektepter bazasynda ázirlenip, qajetti materıaldyq qorlar jasaqtalǵan.
«Bıylǵy qysta 199 myń tekshe metr qar shyǵarylyp, júzdegen sý ótkizý qubyry tazartyldy. Aýdanda 150-den astam arnaıy tehnıka, 33 evakýasııalyq pýnkt kóshirilgen adamdardy qabyldaýǵa ázir. Halyqty der kezinde habardar etýge daýyszoraıtqyshy bar drondar qoldanylmaqshy. Sonymen qatar óńirge kómek retinde 50 qutqarýshy tartylyp, olar bir aı boıy qaýipti ýchaskelerde jumys isteıdi», dedi Qyzyljar aýdany ákiminiń orynbasary Baqtııar Bekenov.
Sý basý qaýpi joǵary mekenderdi turaqty túrde qaýipsiz aımaqtarǵa kóshirmese, jyl saıyn tasqynnyń daqpyrtymen mıllıardtaǵan qarajat bosqa jumsala bermekshi. Bul másele týraly keńeste ashyq aıtyldy. Jıyn sońynda «Amanat» partııasy ókilderi atqarylyp jatqan jumystyń mańyzdylyǵyn, tasqynnyń aldyn alý baǵytyndaǵy sharalardy únemi qatań baqylaýda ustaý qajettigin atap ótti.
Soltústik Qazaqstan oblysy
