Irgetasy qalanǵanyna 60 jyl tolǵan oqý ornyndaǵy aıtýly is-sharaǵa óńir basshysy Marat Sultanǵazıev qatysyp, jyly lebizin bildirdi.
«Memleket basshysy Qasym-Jomart Toqaev «Stýdentterdi jataqhanamen qamtamasyz etý – Úkimet pen ákimderdiń basty mindetteriniń biri. Jastarǵa sapaly bilim alý úshin qolaıly jaǵdaı jasaýymyz kerek», dep atap ótken bolatyn. Búgingi ashylyp otyrǵan zamanaýı ǵımarat – osy baǵyttaǵy júıeli jumystyń naqty nátıjesi. Jataqhana tek jatyn oryn emes, bul – jastardyń alańsyz bilim alyp, shyǵarmashylyqpen aınalysýyna arnalǵan zamanaýı orta. Munda shalǵaı aýdan, aýyldardan kelgen jastar jaıǵasyp, alańsyz bilim alyp, mamandyq meńgeredi. Stýdentterdi jataqhanamen qamtamasyz etý maqsatynda 2023 jyly óńirde jalpy quny 6,0 mlrd teńgeni quraıtyn 711 oryndy 4 jataqhana qurylysy bastalǵan bolatyn. Osy jyly taǵy 3 kolledjdiń jataqhanasy paıdalanýǵa beriledi. Atap aıtsaq, Talǵar agrobıznes jáne menedjment kolledjiniń 111 oryndyq jataqhanasyn qaıtadan jańǵyrtý jumysyna 800 mln teńge bólinip, jaqynda paıdalanýǵa berý josparlansa, Almaty oblysynyń qyzmet kórsetý jáne tamaqtandyrý salasyndaǵy ınnovasııalyq tehnologııalar kolledjiniń 200 oryndyq jataqhanasy men Talǵar polıtehnıkalyq kolledjiniń stýdentterine arnalǵan 200 oryndyq jataqhana qurylysyna árqaısysyna 1,9 mlrd teńgeden qarajat bólinip, qurylys jumysy júrgizilip jatyr. Bul óz kezeginde kolledj stýdentteriniń turmysyn jaqsartýǵa tikeleı yqpal etpek», degen oblys ákimi qonaqtardy qýanyshtarymen quttyqtap, stýdentter úıiniń kiltin kolledj dırektory Almas Jylqybaevqa saltanatty túrde tabys etti.
Is-shara barysynda aqjaýlyqty analar men ustazdar aqjarma tilekterin aǵytyp, memleket tarapynan jasalyp jatqan ıgi isterge dán rızashylyqtaryn bildirdi.
Sonymen stýdentterge esigin aıqara ashqan 5 qabatty jataqhana 200 orynǵa arnalǵan. Ár seksııada 2 jáne 3 oryndy jatyn bólme, ortaq as bólme, jýynatyn oryn bar. Sondaı-aq jataqhanada 8 oqý zaly ornalasqan, olar teledıdarmen qamtylǵan. Zamanaýı úlgidegi jataqhanada jastarǵa kerektiń bári bar. Ár qabatta kir jýyp, kıim útikteý syndy turmystyq qajettiligin atqaratyn arnaıy bólmelermen qatar, dene shynyqtyrýǵa arnalǵan trenajerlik zal jabdyqtalǵan. Joǵary jyldamdyqty ınternet jelisi de iske qosylǵan.
Esik gýmanıtarlyq-ekonomıkalyq kolledjinde osy kúni 1 400-den astam stýdent oqıdy. Olardyń 400-den astamy bilim shańyraǵynyń eski jataqhanasynda turady.
Almaty oblysy
