Ekonomıkanyń damýy, aqsha-nesıe saıasaty, respýblıkalyq bıýdjettiń atqarylýy, memlekettik satyp alýdaǵy jergilikti qamtý týraly ulttyq ekonomıka mınıstri Áset Erǵalıev, Ulttyq bank tóraǵasy Erbolat Dosaev, qarjy mınıstri Erulan Jamaýbaev, ónerkásip pen energetıka sektoryndaǵy ahýal týraly ındýstrııa jáne ınfraqurylymdyq damý mınıstri Beıbit Atamqulov pen energetıka mınıstri Nurlan Noǵaev, agroónerkásiptik keshendegi jaǵdaı jaıynda aýyl sharýashylyǵy mınıstri Saparhan Omarov, áleýmettik mańyzy bar azyq-túlik taýarlarynyń baǵasy týraly saýda jáne ıntegrasııa mınıstri Baqyt Sultanov baıandady.
Osy jyldyń 4 aıynyń qorytyndysy boıynsha Qazaqstan ekonomıkasynyń ósý traektorııasyna shyǵýy qamtamasyz etildi. Bıylǵy qańtar-sáýir aılarynda JIО́ ósý qarqyny 0,7%-dy qurady. Qalpyna kelý serpini ekonomıkanyń barlyq salalarynda baıqalady.
JIО́ ósýine shıkizattyq emes sektor úlken úles qosty. О́ńdeý ónerkásibinde sońǵy 10 jylda turaqty jáne rekordtyq joǵary ósý qarqyny qamtamasyz etildi. Osy jyldyń 4 aıynyń qorytyndysy boıynsha ósim 7,7%-dy qurady. Mashına jasaý (20,6%), onyń ishinde avtomobıl jasaý (25,4%), lokomotıvter men vagondar (49,7%), elektr jabdyqtary (10,2%), kompıýterler, elektrondyq jáne optıkalyq jabdyqtar (52,3%) óndirisinde joǵary ósý qarqyny baıqalady. Sonymen qatar hımııa ónerkásibi (11,2%); kıim óndirisin qosa alǵanda (23,6%), jeńil ónerkásip (4,9%); metallýrgııa (3%), onyń ishinde tústi (3%) jáne qara (2,7%) metallýrgııa; azyq-túlik ónimderi (3,9%) jáne sýsyndar óndirisi (5,1%); farmasevtıka (26,2%) men munaı óńdeý (2,6%) salalary serpindi damý kórsetti. Qurylys materıaldary óndirisin (26,5%), qurylysty (12,5%), turǵyn úıdi paıdalanýǵa berýdi (13,3%) qosa alǵanda, qurylys sektorynda ornyqty ári joǵary ósý qarqyny qamtamasyz etildi.
Aýyl sharýashylyǵynda ósý qarqyny 3%-dy qurady. Salanyń tartymdylyǵyn arttyrý aıasynda aýyl sharýashylyǵy men azyq-túlik ónimderi óndirisindegi negizgi kapıtalǵa salynǵan ınvestısııalar 50%-dan astamǵa ulǵaıdy. Taý-ken óndirisin esepke almaǵanda, búkil ekonomıka boıynsha negizgi kapıtalǵa salynǵan ınvestısııalardyń ósýi 32,3%-dy qurady. Ekonomıka ósiminiń eń mańyzdy faktorlarynyń biri — qyzmet kórsetý sektoryndaǵy oń dınamıka boldy. Máselen, ósim saýda (5,7%), baılanys (11,1%), jyljymaıtyn múlik operasııalary (1,3%), qarjy jáne saqtandyrý qyzmeti (1,6%) sekildi salalarda baıqalady.
Bıylǵy qańtar-sáýir aılarynyń qorytyndysy boıynsha Mańǵystaý oblysy men Shymkent qalasy barlyq 7 negizgi makrokórsetkish boıynsha, Aqmola, Aqtóbe, Jambyl, Qaraǵandy jáne Qostanaı oblystary 6 kórsetkish boıynsha, Shyǵys Qazaqstan, Pavlodar, Soltústik Qazaqstan oblystary, Nur-Sultan jáne Almaty qalalary 5 kórsetkish boıynsha áleýmettik-ekonomıkalyq damý ósimin qamtamasyz etti. Batys Qazaqstan oblysynda eń tómengi kórsetkishterge qol jetkizildi.
«Ekonomıkanyń oń ósimi – pandemııany tejeý, sondaı-aq eldiń jeke sektory men óndiristik áleýetin qoldaý jónindegi sharalardy iske asyrý tıimdiliginiń mańyzdy ındıkatory. Ekonomıkanyń osy qarqynyn aldaǵy aılarda saqtap, ony ulǵaıtý mańyzdy», dedi A. Mamın.
Úkimet basshysy óńirlerdiń ákimderine áleýmettik mańyzy bar azyq-túlik taýarlarynyń baǵasyn turaqtandyrýǵa erekshe nazar aýdarýdy, jergilikti bıýdjet esebinen forvardtyq azyq-túlik satyp alýdy qarjylandyrýdy 10 mlrd teńgege deıin ulǵaıtýdy jáne «aınalym shemasy» boıynsha qarjylandyrýdy 50 mlrd teńgege deıin jetkizýdi tapsyrdy.
Premer-Mınıstr ishki jáne syrtqy ınvestısııalardy, ásirese, shıkizattyq emes salalarǵa tartý, shaǵyn jáne orta bıznesti odan ári damytýdy qoldaý, jumyspen qamtamasyz etý jáne halyqtyń naqty tabysyn arttyrý qajettigin atap ótti.
