Berik Ýálı 2020 jylǵy 1 qyrkúıekte jarııalanǵan Memleket basshysy Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýyna aıtylǵan mindetten úzindi keltirdi.
«Álemde qalyptasqan jańa ahýalda elge ınvestısııa tartyp, otandyq taýarlar men qyzmetterdi eksportqa shyǵarý Úkimet úshin erekshe basymdyqqa ıe bolyp otyr», delingen Prezıdent Joldaýynda.
Atalmysh tapsyrma boıynsha «Samuryq-Qazyna» UÁQ» aksıonerlik qoǵamy quny 1,3 trıllıon teńge bolatyn 18 ınvestısııalyq jobany júzege asyryp, 13 myńnan astam jumys orny ashylǵan.
«Atap aıtqanda:
- Qostanaı oblysynyń eldi mekenderin gazdandyrýdy keńeıtý;
- Qýaty 500 kV bolatyn Shúlbi sý elektr stansııasy – Aqtoǵaı – Taldyqorǵan – Alma jelisiniń qurylysy;
- Atyraý munaı óńdeý zaýytyndaǵy munaıdy joǵary deńgeıde qaıta óńdeý keshenin salý;
- Taraz qalasynda gaz taratý jelilerin jańǵyrtý;
- Mańǵystaý oblysynda gaz taratý jelilerin jańǵyrtý, rekonstrýksııalaý jáne salý;
- Shardara sý elektr stansııasyn jańǵyrtý;
- Prorva ken oryndary tobynyń ilespe munaı gazyn kúkirtsizdendirý qondyrǵysyn salý;
- «Beıneý – Bozoı – Shymkent» magıstraldy gaz qubyrynda 4 kompressorlyq stansııa salý», delingen habarlamada.
