«Tıanven-1» apparaty 15 mamyrda Qytaıdyń Marsty zertteý jónindegi birinshi mıssııasy aıasynda planetada aldyn ala tańdalǵan Ýtopııa jazyǵynyń ońtústik bóligine sátti qondy», dep habarlady agenttik ókilderi.
Orbıtalyq modýlden, qoný kapsýlasynan jáne roverden turatyn Marsty zertteýge arnalǵan alǵashqy qytaılyq «Tıanven-1» ǵarysh kemesi 2020 jyldyń 23 shildesinde Haınan aralyndaǵy Venchan ǵarysh aılaǵynan ushyryldy. Ol aqpannyń sońynda Marstyń orbıtasyna kirdi. Mıssııa sátti bolǵan jaǵdaıda, apparat alynǵan málimetterdi bıyl jerge jiberedi.
Apparat senbide Beıjiń ýaqyty boıynsha saǵat 1.00-de (Nur-Sultan ýaqyty boıynsha jumada, saǵat 23.00-de) kútý orbıtasynan túskeni naqtylandy. Beıjiń ýaqytymen 4.00-de apparat orbıtalyq modýlden bólindi, shamamen 3 saǵat ushýdan keıin Mars atmosferasyna kirip, 9 mınýttan soń zond saǵat 7.18-de (Nur-Sultan ýaqyty boıynsha 5.18) sátti qondy.
Mıssııa sátti ótse, ǵalymdar Marstaǵy atmosferany, jer bederin, geologııalyq sıpattamalaryn, planetanyń magnıt órisiniń erekshelikterin zertteı alady, bul Marstyń jáne búkil kún júıesiniń paıda bolýy men evolıýsııasyn ashatyn kiltti tabýǵa kómektesedi.
Degenmen, mıssııanyń basty maqsaty – Marsta ómir belgilerin tabý, sonymen qatar ǵalymdarǵa bolashaqta bul ǵalamshardaǵy jaǵdaılar adam ómirine qolaıly bolatyndaı ózgere ala ma degen suraqqa jaýap izdeıdi.
