Rásim barysynda Qyrǵyzstan Prezıdenti Elshini qyzmetke taǵaıyndalýymen quttyqtaı otyryp, onyń atalǵan laýazymdaǵy aldaǵy jumysy eki memleket arasyndaǵy tatý kórshilikke negizdelgen ózara tıimdi qarym-qatynastardy odan ári damytýǵa yqpal etetinine senim bildirdi.
Rásimnen keıin oryn alǵan kezdesýde qazaqstandyq dıplomat Elbasy Nursultan Nazarbaev Qazaqstan men Qyrǵyzstan arasyndaǵy baýyrlastyq jáne odaqtastyq qarym-qatynastardy árdaıym qoldaıtynyn, ári bul baǵytty Prezıdent Qasym-Jomart Toqaev jalǵastyrǵanyn basa aıtty.
Taraptar ekijaqty jáne kópjaqty formattaǵy saıası dıalogtyń joǵary deńgeıin atap ótip, saýda-ekonomıkalyq, ınvestısııalyq jáne mádenı-gýmanıtarlyq yntymaqtastyqty arttyrý múmkinshilikteri boıynsha pikir almasty.
Kezdesý sońynda Prezıdent S. Japarov Elbasy N. Nazarbaev pen Prezıdent Q. Toqaevqa izgi lebizderin jetkizýdi surady jáne jańa Elshige qazaq-qyrǵyz qarym-qatynastaryn odan ári nyǵaıtý jolynda zor tabystar tiledi.
