Qurmetti otandastar!
Barshańyzǵa Otan qorǵaýshy kúni qutty bolsyn!
Memlekettik ári qoǵamdyq mańyzy aıryqsha merekede jaýyngerlerimizdiń eren erligi, myqty rýhy men qaıtpas qaısarlyǵy keńinen dáripteledi.
Bul – Qazaqstannyń qaýipsizdigin, turaqtylyǵy men tynyshtyǵyn kúndiz-túni qas qaqpaı kúzetken, sondaı-aq qazir Otan aldyndaǵy boryshyn adal ótep jatqan barsha azamatqa qurmet kórsetiletin kún.
El jaýyngerleri men komandırleri batyr babalarymyzdyń dańqty jolyn jalǵastyryp, naǵyz otanshyldyq rýhynyń jarqyn úlgisin kórsetip keledi.
Sardarlar men sarbazdardyń, barlyq kúshtik qurylym qyzmetkerleriniń bitimgerlik mıssııalar, arnaýly oqý-jattyǵý jıyndary men túrli halyqaralyq saıystar kezindegi kásibı sheberligi, temirdeı tártibi men jaýyngerlik daıarlyǵy – sonyń aıqyn dáleli.
Qýatty áskerimiz eń kúrdeli mindetterdi oryndaýǵa qashanda daıyn ekeni sózsiz. Sondyqtan memleket elimizdiń qorǵanys qabiletin kúsheıtýge jáne áskerı qyzmetshilerdiń áleýmettik jaǵdaıyn jaqsartýǵa árdaıym basa mán beredi.
Jańa Konstıtýsııada «Qazaqstan Respýblıkasyn qorǵaý – onyń ár azamatynyń qasıetti paryzy men mindeti» dep jazyldy.
Osy asa mańyzdy tujyrym memleket pen halyqtyń tyǵyz baılanysyn, el taǵdyryna árbir otandasymyzdyń jaýapty ekenin ańǵartady.
Biz Otanǵa qaltqysyz qyzmet etý qaǵıdatyn jáne Konstıtýsııada aıqyndalǵan myzǵymas qundylyqtardy negizge ala otyryp, san ǵasyrlyq tarıhy bar memlekettiligimizdiń tuǵyryn nyǵaıta túsemiz, bıik maqsat-muratymyzǵa jetip, Ádiletti, Kúshti, Qaýipsiz Qazaqstandy quramyz. Men buǵan kámil senemin.
Antyna adal bolyp, tabandylyq tanytyp, minsiz qyzmet etip júrgen Otan qorǵaýshylarymyzǵa alǵys aıtamyn.
Barsha azamattarymyzǵa myqty densaýlyq, amandyq jáne tabys tileımin!
Armııamyzdyń aıbyny, halqymyzdyń yntymaǵy arta bersin!
Qasterli Táýelsizdigimizdiń tuǵyry bekem bolsyn!
