Aqpannyń sońynan bastap salymshylardan zeınetaqy aktıvteriniń jetkilikti sheginen asatyn bóligin aýdarý týraly ótinishter túse bastaǵany belgili. Osyǵan baılanysty alǵashqy aýdarymdar 15 naýryzdan bastaldy. Qazirgi kezde ınvestısııalyq portfeldi basqarýmen úsh bank belsendi aınalysýda. Sonyń ishinde Jusan Invest AQ senimgerlik basqarýyndaǵy zeınetaqy aktıvteri 663,97 mln teńgeni quraǵan. Olarǵa Ulttyq bank nottary (portfeldiń 60,11 paıyzy), Exchange Traded Funds (ETF) paılary (39,64 paıyz), ınvestısııalyq shottardaǵy aqsha qarajatynda qalǵan aktıvter (0,25 paıyz) satyp alynypty. Portfeldiń 60,36 paıyzy teńgede bolsa, 39,64 paıyzy dollarda saqtalǵan. Investısııalyq qyzmet nátıjesinde, sondaı-aq shetel valıýtalary baǵamdarynyń qubylmalylyǵy jáne qarjy quraldarynyń naryqtyq qunynyń ózgerýi saldarynan eseptelgen ınvestısııalyq kiris mólsheri 6,18 mln teńgege jetken. Jusan Invest zeınetaqy aktıvteriniń tabystylyǵyn 0,89 paıyz dep kórsetedi.
1 sáýirdegi jaǵdaı boıynsha Halyk Global Markets AQ senimgerlik basqarýǵa 502,97 mln teńge qabyldaǵan. «Portfeldiń qurylymynda keri REPO operasııalary (99,5 paıyz) jáne shottardaǵy aqsha qarajattary bar. Barlyq ınvestısııalar ulttyq valıýtada nomınaldanǵan. Kezeń ishinde eseptelgen ınvestısııalyq tabystyń mólsheri 1,21 mln teńge, tabystylyq 0,23 paıyzdy qurady» dep jazady BJZQ.
BCC Invest AQ enshisindegi zeınetaqy aktıvteriniń kólemi – 304,42 mln teńge. Qordyń habarlaýynsha, atalǵan qarjy ınvestısııalyq shottardaǵy aqshalaı qarajatqa (64,02 paıyz), REPO-ǵa (18,1 paıyz), Qazaqstandaǵy kvazımemlekettik uıymdarynyń oblıgasııalaryna (12,49 paıyz), sheteldik emıtentterdiń aksııalary men depozıtarlyq qolhattaryna (8,05 paıyz), paılarǵa (ETF ındeksterge) (6,86 paıyz) bólingen. Investısııalyq tabys kezeńine eseptelgen soma 0,94 mln teńgeni quraǵan, tabys – 0,29 paıyz deńgeıinde. Sonymen qatar portfeldiń 85,08 paıyzy ulttyq valıýtada jasaqtalǵanyn da aıta ketý kerek.
AERC qoldanbaly zertteýler departamentiniń konsýltanty Rýstam Bekishevtiń aıtýynsha, zeınetaqy aktıvteriniń jeke kompanııalardyń basqarýyna berilgenine kóp ýaqyt bola qoımady, sondyqtan kesip-piship baǵalaýǵa erte.
– Alǵashqy statıstıka 1 sáýirde jarııalandy. Sol jerdegi úsh kompanııanyń ákelgen tabystylyǵyn Ulttyq bank tabystylyǵymen salystyrý durys bola qoımas. О́ıtkeni basqarýshy kompanııalardyń bir jyl ishindegi tabys dınamıkasy qandaı bolary belgisiz. Naýryz aıynda Ulttyq bank basqarýymen zeınetaqy aktıvteriniń tabystylyǵy jyldyq mánde 11,37 paıyzdy qurady. Máselen, Jusan Invest tabystylyǵy 0,89 paıyz deńgeıinde qalsa jáne ári qaraı 12 aı boıy saqtalsa onda qıyn paıyzdar formýlasy esebinen jyldyq tabystylyq 11,22 paıyz deńgeıinde bolady. Bul Ulttyq banktiń naýryz aıyndaǵy tabysyna jaqynyraq. Al eger BCC Invest tabystylyǵy osy deńgeıde (0,29 paıyz) qala berse, onda bir jyldaǵy nátıjesi nebári 3,5 paıyz bolady. Bul Ulttyq bank tabysynan áldeqaıda tómen, – deıdi sarapshy.
Árıne, basqarýshy kompanııalar nátıjesi tap osy deńgeıde qalyp qoıady dep boljaýǵa da bolmaıdy. Sondyqtan bir jyl ishinde jeke kompanııalardaǵy aktıvter deńgeıi kúrt ósýi nemese quldyraýy múmkin.
– Portfel qurylymyna keler bolsaq, dollarmen berilgen zeınetaqy aktıvteri úlesiniń artqanyn atap ótýge bolady: bıyl 1 naýryzda – 29,95 paıyz, 1 sáýirde – 30,93 paıyz. Sondaı-aq táýekel boıynsha qurylymda da ózgeris bar: 1 naýryzda «AAA» reıtınginen bastalyp «VVV-»-ǵa deıingi qarjy quraldary 85,3 paıyzdy qurasa, qazir bul úles ınvestısııalyq portfeldiń 80,21 paıyzyna deıin tómendedi. «AAA» reıtıngine ıe (eń senimdi) qarjylyq aktıvter tek Ulttyq bank pen BCC Invest portfeli qurylymynda ǵana bar. Bul rette tabystylyq pen táýekel bir-birimen tikeleı baılanysty ekenin aıtqym keledi: qarjylyq aktıv táýekeli qanshalyqty tómen bolǵan saıyn tabystylyq ta sonshalyqty az, – deıdi R.Bekishev.
EXANTE halyqaralyq ınvestısııalyq kompanııasynyń sarapshysy Andreı Chebotarıov qordaǵy zeınetaqy aktıvterin jeke basqarýshy kompanııalarǵa taratyp berýden aıtarlyqtaı paıda joq ekenin aıtady.
– Tórt kompanııa tańdap alyndy jáne olarǵa táýekelge toly portfel qalyptastyrmaý týraly talap qoıylyp otyr. Sondyqtan da aktıvterin jeke kompanııalarǵa aýdarý týraly nebári myńnan astam ǵana ótinish kelip túsken. Bul óte az. Sonymen qatar kompanııalardyń kapıtalyna da úlken jaýapkershilik júkteledi. Iаǵnı biz tórt birdeı kishkentaı BJZQ-ny qurdyq deýge bolady. Olardaǵy tabystylyq BJZQ-ǵa qaraǵanda sál-pál joǵary bolady. Jeke kompanııalardyń aktıvtermen jumys isteı bastaǵanyna bir-eki aı ǵana bolady. Osy ýaqyt ishindegi kórsetkishin aldaǵy 12 aıǵa kóbeıtip, únemi solaı tabysty bolady eken dep baılam jasaýǵa bolmaıdy. Osy aıda tabystylyq joǵary bolsa, kelesi aıda ol quldyrap ketýi múmkin. Iá, olardyń portfeli taza, paıyzy joǵary, basqa alyp bara jatqan artyqshylyq joq, – deıdi sarapshy.
Qazirgi ýaqytta BJZQ zeınetaqy aktıvterin senimgerlikpen basqarý týraly tórt jeke basqarýshy kompanııamen kelisimshartqa otyrǵan. Olar – Jusan Invest AQ, BCC Invest AQ, Halyk Global Markets AQ jáne «Sentras Sekıýrıtız» A.
