TMD odaǵynyń qalyptasýy jáne ondaǵy halyq sany men aýmaǵynyń kólemine toqtalǵan Gýsman Reseıdiń Qazaqstanmen arasynda qurlyqtaǵy eń uzyn shekara bar ekenin atap ótti. Sonymen qatar efır barysynda jýrnalıst Marına Maksımova Qazaqstannyń tuńǵysh prezıdenti Nazarbaev ókilettikti tapsyrý týraly sheshim qabyldaýǵa úsh jyl jumsaǵanyn da eske saldy.
«Qasym-Jomart Toqaev el prezıdenti retinde saılanǵanǵa deıin halyqaralyq salada, syrtqy saıasatta, jalpy memlekettik qyzmette túrli laýazymdy qyzmette boldy. Ony dıplomat dep ataýǵa tolyq negiz bar. Men ótken jyly Qazaqstan prezıdentinen suqbat aldym. Pandemııaǵa baılanysty áńgimelesý onlaın formatta ótti. Bul jeńis kúniniń qarsańy bolatyn. Sol suhbatta Qazaqstan Respýblıkasynyń prezıdenti urys dalasynda oq pen ottyń arasynda eli úshin soǵysqan óziniń maıdanger ákesin eske aldy. Onyń ákesin qazaq ádebıetindegi detektıv janrynyń ákesi dep ataıdy», degen Gýsman Toqaevtar áýletiniń aýyr taǵdyryn da atap ótti.
Júrgizýshi Marına Maksımova keıbir derekkózder Toqaevty tym tuıyq adam dep sıpattaǵanyn aıtyp, prezıdentten suhbat alǵan Gýsmannyń osyǵan qatysty pikirin surady.
«Birinshiden, bul jaqsy dıplomattyń eń negizgi qasıeti. Sebebi olar kópshilik aldynda asa kóńilshek, ásershil bolmaýy kerek. Ekinshiden, ol qaljyńdy jaqsy kóretin azamat», dep jaýap berdi Gýsman.
TASS ókiliniń pikirinshe, Qasym-Jomart Toqaevtyń prezıdent qyzmetine saılanǵannan keıin eń birinshi issaparyn Reseıden bastaýy da tekten-tek emes. Sebebi Qazaqstan úshin Reseı árkez basty seriktes bolyp qala beredi.
Jalpy Gýsman Nursultan Nazarbaev pen Qasym-Jomart Toqaevty salystyra qaraýdyń durys emes ekenin aıtty. О́ıtkeni olardyń jas shamasy birdeı bolǵanymen, bilim alý, qyzmetke kelý, qyzmettik ósý, temperamenti jaǵynan jáne jalpy ómir joly boıynsha eki túrli baǵytta jetilgen azamattar. Ol Nazarbaevty ashyq-jarqyn, emosııaǵa toly azamat bolsa, Toqaev ár sózin ańdap sóıleıtin, dıplomatııalyq shekten aspaıtyn sabyrly kóshbasshy dep atady.
Marına Uly júzdiń Jalaıyr taıpasynyń Kúshik rýynan shyqqanyn atap ótip, Qazaqstannyń Tuńǵysh prezıdenti de rýy boıynsha Uly júzdiń urpaǵy ekenine nazar aýdarǵysy keldi.
«Meniń oıymsha, siz ekeýmiz qazaqtardyń rýy men júzge bólinýi jaıly tıisti dárejede áńgime qozǵaıtyndaı bilikti emespiz. Men talpynyp kórgenmin. Maǵan osynyń barlyǵyn túsindirýge tyrysqandar da boldy. Alaıda rý máselesin túsiný úshin ne qazaq bolyp týý kerek, ne qazaqstantanýshy ǵalym bolý kerek», dedi Gýsman.
«Toqaevtyń el prezıdenti bolyp saılanǵanyna endi ǵana eki jylǵa jýyqtady. Osy eki jyldyń bir jyly álemdi jaıpaǵan indetpen kúresýmen ótti. Jalpy moıyndaýymyz kerek, Qazaqstan álemniń keıbir elderine qaraǵanda pandemııaǵa qarsy kúrese aldy. Sondyqtan qıyndyqqa toly jylda Toqaevtyń jetekshilik etýimen qazaq eliniń saǵy synbady dep oılaımyn», dedi Gýsman.
Efırdi júrgizgen reseılik jýrnalıst Marına Maksımova Qazaqstan koronavırýsqa qarsy otandyq vaksına daıyndap jatqanyna tańdanysyn jasyra almady. Ol óz preparatyn daıyndaı alatyn memlekette ǵylym salasy damyǵan dep aıtýǵa bolatynyn atap ótti.
«Keńes odaǵy kezinde-aq Qazaqstan ǵylym salasy kúshti damyǵan, ǵylymı bazasy myǵym, álemge aty tanymal bolǵan ǵalymdar shyqqan el bolatyn. Al Qazaqstannyń táýelsizdik jyldarynda tuńǵysh prezıdent Nursultan Nazarbaevtyń bastamashylyǵymen kóp jas ǵalym shetelge oqýǵa jiberildi. Olar damyǵan memleketterdiń kóshbasshy oqý oryndarynda bilim alyp, sodan keıin elderine oraldy da, ǵylymdy damytý baǵytynda túrli jaýapty qyzmetterge taǵaıyndaldy. Bul mura retinde Toqaevqa ótken Nazarbaevtyń baǵdarlamasy», dedi TASS bas dırektorynyń birinshi orynbasary.
Onlaın formatta ótken suhbat kezinde pandemııa saldarynan ekonomıkalyq daǵdarysqa tap bolǵan álem elderi sekildi Qazaqstan da birqatar qıyndyqqa tap bolǵany aıtyldy. Osy baǵytta sport salasyndaǵy shyǵyndardy qysqartýǵa týra kelgen. Osy tusta Qasym-Jomart Toqaevtyń ústel tennısin jaqsy oınaıtyny tilge tıek boldy.
Sóz sońynda Gýsman Qazaqstannyń paıdaly qazbaǵa óte baı el ekenin atap ótip, eldiń qos prezıdenti de memleket munaıǵa táýeldi bolmaýy kerektigin keńinen nasıhattap júrgenin eske saldy.
Jýrnalıstiń «Toqaev elde reforma jasaı alatyndaı batyl kóshbasshy ma» degen suraǵy efırdiń qorytyndy saýaly boldy.
«Muny ýaqyt kórsetedi. Alaıda Qasym-Jomart Toqaev prezıdenttikke úmitker retinde saılaýǵa túsken kezde onyń óte aýqymdy saılaýaldy baǵdarlamasy bolǵanyn umytpaý kerek. Biraq bul baǵdarlamany júzege asyrýǵa aıaq astynan kelgen pandemııa kedergi boldy. Toqaev eldi basqarýǵa osy eki jylǵa jýyq ýaqyt ishinde barlyq baǵyt-baǵdar, kúsh-jiger men resýrs ınfeksııamen kúresýge, eldi aman alyp shyǵýǵa jumsaldy. Sondyqtan saılaýaldy baǵdarlamadaǵy tarmaqtardy iske asyratyn ýaqyt áli alda dep oılaımyn», dep túıindedi Gýsman.
