Prezıdent Qasym-Jomart Toqaevqa elimizdegi sanıtarlyq-epıdemıologııalyq jaǵdaı, halyqty vaksınalaý, sondaı-aq, áleýmettik-ekonomıkalyq damýdyń ózekti máseleleri týraly esep berildi.
Premer-Mınıstrdiń aıtýynsha, eldegi sanıtarlyq-epıdemıologııalyq jaǵdaı turaqtanǵan. Qazaqstan Covid-19 indetiniń taralý qarqyny boıynsha «qyzyl» aımaqtan «sary» aımaqqa ótti. Vırýstyń juǵý ındeksi – 0,94. Juqpaly aýrýlar bólimsheleri – 33 paıyzǵa, jan saqtaý bólimsheleri – 25 paıyzǵa tolǵan. Vaksınalaý qarqyny artyp keledi. Qazirgi tańda Qazaqstanda 3 mıllıon adamǵa ekpe salynyp, onyń 2 mıllıony vaksınanyń birinshi komponentin alǵan. 1 mıllıonǵa jýyq adamǵa ekpeniń ekinshi komponenti salyndy.
Memleket basshysyna 2021 jylǵy Jumyspen qamtý jol kartasy baǵdarlamasynyń oryndalý jospary týraly aqparat berildi. Asqar Mamın Jumyspen qamtý jol kartasyn iske asyrýǵa bıyl 300 mıllıard teńge bólingenin, 35,6 myń jumys orny, onyń ishinde, 20 myńnan astam turaqty jumys orny ashylatynyn atap ótti.
Qasym-Jomart Toqaevqa memlekettik qyzmetshilerge eńbekaqy tóleý júıesiniń pılottyq rejıminiń júzege asyrylýy jóninde baıandaldy. Atalǵan pılottyq jobaǵa 2018 jyly Memlekettik qyzmet isteri agenttigi, Sybaılas jemqorlyqqa qarsy is-qımyl agenttigi, Ádilet mınıstrligi, birqatar óńirdiń ákimdikteri qatysty. Júrgizilgen tájirıbeniń nátıjesinde jobaǵa qatysýshy memlekettik organdarda kadrlardyń almasýy 4,9 paıyzdan 3,5 paıyzǵa deıin azaıyp, memlekettik qyzmettiń tartymdylyǵy arta tústi (konkýrs 1 orynǵa 3,4 esege artty), ortalyqta jáne aımaqtarda eńbekaqy tóleý alshaqtyǵy 70 paıyzdan 16 paıyzǵa deıin qysqardy.
Memleket basshysy atalǵan jobany jergilikti atqarýshy organdarda sondaı-aq, ortalyq memlekettik organdarda aýqymdy túrde júzege asyrýdy tapsyrdy. Sonymen qatar memlekettik qyzmetshilerdiń sanyn kezeń-kezeńimen qysqartý jáne memlekettik apparattyń uıymdyq qurylymyn ońtaılandyrý jumystaryn jalǵastyrý kerek. Prezıdent qurylymdy qaıta ózgertý nátıjesinde únemdelgen qarjyny eńbekaqy kólemin arttyrýǵa baǵyttaý mańyzdy dep sanaıdy.
Budan bólek kezdesýde syrtqy jáne ishki ınvestısııalardy tartýdy ulǵaıtý, shaǵyn jáne orta bıznestiń áleýetin arttyrý, qaıta óńdeý sektorynyń ósimi men damýy esebinen ekonomıkanyń qurylymyn odan ári ártaraptandyrý, elimizdiń áleýmettik-ekonomıkalyq damýyna qatysty basqa da ózekti máseleler jóninde qabyldanǵan sharalar qarastyryldy.
