Qasym-Jomart Toqaevqa elimizdegi sý qoımalarynyń jaǵdaıy týraly esep berildi. Maǵzum Myrzaǵalıevtiń aıtýynsha, sońǵy jyldary sý tapshylyǵyn boldyrmaýǵa baǵyttalǵan aýqymdy jumystar júrgizilip jatyr. Atap aıtqanda kórshi elderdiń quzyretti organdarymen ózara yqpaldasa otyryp, sý nysandaryn qaıta qalpyna keltirý, sıfrlandyrý jáne sharýalardy sýmen qamtamasyz etý máseleleri qolǵa alyndy. Qyrǵyz tarapymen Toqtaǵul sý qoımasynan qosymsha sý jiberýge kelisim jasalyp, Jambyl oblysyndaǵy Shý jáne Talas ózenderiniń basseınderine sý jiberý kestesi bekitildi. Reseı tarapymen Irıklınsk sý qoımasynan Jaıyq ózenine jiberiletin sýdyń kólemin kóbeıtý jóninde kelissóz júrgizilip jatyr.
Prezıdentke kıikterdi qorǵaý úshin qabyldanǵan sharalar men olardyń sanyn anyqtaý maqsatynda júrgizilgen sanaqtyń qorytyndylary jóninde aqparat berildi. Salalyq vedomstvonyń málimeti boıynsha brakonerlikke qarsy tıimdi júrgizilgen kúrestiń jáne zańnamanyń qatańdatylýynyń arqasynda sońǵy 2 jyl ishinde kıikterdiń sany 334 myńnan 842 myńǵa deıin kóbeıgen.
Memleket basshysynyń tapsyrmasy boıynsha Maǵzum Myrzaǵalıev Batys Qazaqstan oblysyna baryp, sarapshylarmen, ǵalymdarmen, jergilikti fermerlermen jáne ákimdikpen birlese otyryp, kıiktiń jaıylym órisin anyqtaý máselelerin keshendi túrde qarastyrǵan. Qasym-Jomart Toqaev jalpy 657 myń gektar aýmaqty quraıtyn «Bókeıorda» jáne «Ashyózek tabıǵat qoryǵy» tabıǵı rezervattaryn qurý týraly sheshim qabyldady. Bul sheshim Oral óńirindegi kıikterdiń Jaıyq ózeniniń sol jaǵalaýyna óris aýystyrýyna múmkindik beredi.
Budan bólek mınıstr balyqtardy qorǵaýǵa baǵyttalǵan «Bekire», «Ýyldyryq shashý» jáne «Taza toǵan» sharalary týraly aıtty. Osy sharalardyń nátıjesinde birqatar qylmystyq is qozǵalyp, aıyppuldar salyndy, 300 shaqyrymǵa jýyq aý men birneshe kólik tárkilendi.
Prezıdenttiń 2 mıllıard aǵash egý týraly tapsyrmasyn oryndaý aıasynda búginge deıin 80 mıllıon kóshet otyrǵyzylǵan. Ekotýrızmdi damytý maqsatymen 4 iri ulttyq parkke jalpy quny 31 mıllıard teńgeden astam qarjy quıatyn ınvestorlar anyqtaldy.
Prezıdent mınıstrliktiń bul baǵyttaǵy jumystaryn oń baǵalady.
Kezdesý sońynda Memleket basshysy sý resýrstaryn retteý máselesin erekshe baqylaýda ustap, brakonerlikpen kúresti kúsheıtýdi tapsyrdy.
