Almatynyń Bas memlekettik sanıtarlyq dárigeri Jandarbek Bekshın búginde qalanyń áli de «qyzyl» aımaqta ekenin, mýtasııalanǵan shtammdardyń 84%-ǵa deıin óskenin eske saldy.
«Onyń ústine, mamyr aıynyń sońǵy aptasynda juqtyrý kórsetkishi tómendegeni baıqaldy, ótken táýlikterde tirkelgen jaǵdaılar 700-den 290-300-ge deıin azaıǵan», dep habarlady J. Bekshın.
Almatynyń Bas sanıtarlyq dárigeri táýliktiń ósimniń 3 esege deıin azaıǵanyn, aýrý kórsetkishiniń sońǵy 7 kúnde 7,7%-ǵa tómendegenin atap ótti.
«Mamyrdyń ortasynda sımptomdy syrqattar qatary azaıdy, olardyń 10%-ǵa deıin tómendegeni baıqaldy. Alaıda, KVI-diń sımpomsyz formasyn juqtyrýshylardyń tirkelýi 12%-ǵa deıin ósti», dep jalǵastyrdy J. Bekshın.
Sanıtarlyq-epıdemıologııalyq baqylaý departamenti basshysynyń aıtýynsha, koronavırýstyń úshinshi tolqynynyń báseńdeýine karantındik shekteýlerdiń engizilgeni oń áser etken. 20%-dyq ımmýndyq qabatty qalyptastyrý ınfeksııanyń taralýynyń aldyn aldy, onyń ishinde 14,8%-y vaksınalanǵan jáne 5%-y sońǵy jarty jylda aýyryp-jazylǵandar.
Sondyqtan J. Bekshın qala turǵyndaryn sanıtarlyq-epıdemıologııalyq qaýipsizdik sharalaryn qatań saqtaýǵa jáne koronavırýsqa qarsy turýdyń jalǵyz joly ekpe saldyrý ekenin aıtyp, vaksınalanýǵa shaqyrdy.
