Is-shara Qazaqstan Respýblıkasy Táýelsizdiginiń 30 jyldyǵyn merekeleý aıasynda Nur-Sultan qalasy ákimdiginiń qoldaýymen uıymdastyryldy.
Kezdesýge qatysýshylar – mádenıet, sport, ǵylym, medısına, bıznes jáne saıasat salalarynyń kórnekti tulǵalar jıynda el tarıhynyń kúrdeli kezeńderin, urpaqtar sabaqtastyǵyn, táýelsiz halyqtyń ulttyq sanasyn qalyptastyrýdaǵy irgeli isterdi talqylady.
Jınalǵandar aldynda Nur-Sultan qalasy ákiminiń orynbasary Baqtııar Máken sóz sóıledi. Ol kópshilikti azattyǵymyzdyń aıtýly kúnimen quttyqtap, halyq tarıhyn urpaq jadynda jańǵyrtýdyń mańyzdylyǵyn atap ótti.
«Táýelsizdik – qasıetti uǵym. Bostandyq elimizdiń jáne azamattarymyzdyń damýy úshin keremet múmkindikter beredi. Egemen memlekettiń sońǵy otyz jyldaǵy eleýli jetistigi Tuńǵysh Prezıdent – Elbasy Nursultan Nazarbaevtyń syndarly saıasatymen, sondaı-aq táýelsizdiktiń bastaýynda turǵan bilimdi, kásibı, talantty qazaqstandyqtardyń, ıaǵnı otandastarymyzdyń qajyrly eńbeginiń arqasynda múmkin boldy», dedi B.Máken.
Is-shara barysynda Azat Ábiken prodıýserlik jasaǵan «Otyz. Halyq taǵdyry - el tarıhy» atty derekti fılm kórsetildi. Bul kartınada Qazaqstannyń táýelsizdik alǵannan bastap qazirgi ýaqytqa deıingi kúrdeli kezeńi júıeli túrde, kıno tilimen kórkem baıandalǵan.
«Otyz. Halyq taǵdyry - el tarıhy» atty kınoǵa baılanysty qala ákiminiń orynbasary pikirin bildirip, uly oıshyl Ál-Farabıdiń «Tarıhyn bilmeıtin jurtty bulyńǵyr bolashaq kútip tur» degen syńaıdaǵy qanatty sózin jetkizdi. Derekti fılm kópshiliktiń oıynan shyǵyp, ystyq yqylasyna ıe boldy.
«Táýelsizdiktiń otyz jyly uly oqıǵalar men Qazaqstan tarıhyndaǵy eleýli ózgeristerge toly. Bizdiń mindetimiz - muny jas urpaqqa túsindirý, elimizdiń túrli salalarynda damýyna óz úlesin qosqan azamattarymyzdy qurmetteý jáne olarǵa qoldaý kórsetý. Sondyqtan búgingi fılm aýdıtorııanyń nazaryn aýdaryp, ulttyq sana-sezimdi qalyptastyrýda, patrıotızmdi nasıhattaýda mańyzdy ról atqarady dep senemin», dep tolyqtyrdy Baqtııar Máken sózin.
Jınalǵandardyń arasynda HH ǵasyrdyń 90-shy jyldary Qazaqstan saıasatynyń halyqaralyq vektoryn qalyptastyrýǵa belsendi atsalysqan Qazaqstannyń tuńǵysh Syrtqy ister mınıstri Tóleýtaı Súleımenov te boldy.
«Bizde ol shaqta bos ýaqyt bolmady, biz tek táýelsizdigimizdiń tuǵyryn nyǵaıtý týraly oımen ómir súrdik, eldi tezirek kóterýimiz kerek degen asyl muratymyz boldy. Táýelsizdik bizge erkindik, halqymyzdyń birligin berdi. Azamattyq soǵystar bolǵan joq. Halyq bizdiń Tuńǵysh Prezıdentimiz Nursultan Ábishuly Nazarbaevty qoldady. Halyq bolmasa, ol eshteńe isteı almaıtyn edi. Halyq oǵan sendi jáne ony qoldady. Tuńǵysh Prezıdenttiń quramynda jaýyngerlerden, óz eliniń patrıottarynan, óz adamdarynan turatyn qýatty komanda boldy», dep eske aldy memleket qaıratkeri.
Halyqaralyq dodalarda óz eliniń qorjynyna birneshe altyn medal salǵan Olımpıada chempıony Olga Shıshıgına da Táýelsizdiktiń mańyzdylyǵy týraly aıtty. Onyń paıymynsha, keńes odaǵy jyldarynda odaqtyń sporttyq quramasyna kirý óte qıyn bolatyn. О́ıtkeni, oǵan eń aldymen Máskeýden jáne oǵan jaqyn qalalardan sportshylar enetin edi. Biraq táýelsizdikke qol jetkizgennen keıin qazaqstandyq sportshylar tek Olımpıada oıyndarynda ǵana emes, basqa da baıraqty básekelerde óz halqy men eliniń namysyn qorǵady, maqtanatyndaı deńgeıge kóterdi.
О́z kezeginde Tuńǵysh Prezıdent kitaphanasy dırektorynyń orynbasary Botagóz Qaıypova qazaqstandyqtardyń jas urpaǵynyń el bolashaǵyndaǵy róline nazar aýdardy.
«Meniń oıymsha, Táýelsizdik qurdastarynyń býyny eń baqytty, óıtkeni olar egemen, azat elde týdy, sol memlekette ómir súrip jatyr. Nursultan Ábishuly da óz ókilettigin tapsyra otyryp, Táýelsiz Qazaqstannyń eń basty jetistigi - jańa táýelsiz urpaq ekenin aıtty. Qasym-Jomart Kemeluly «Aǵa býynnyń mindeti - táýelsiz eldiń kreatıvti bilimdi, aqyldy, tabysty urpaǵy bolý úshin barlyq jaǵdaıdy jasaý» dep atap ótti. Joǵary ataqqa - Táýelsiz Qazaqstannyń urpaǵy degen atqa laıyq bolyńyzdar!», dedi ol.
Sharanyń sońynda aǵa jáne jas býyn ókilderi táýelsiz Qazaqstannyń qalyptasý tarıhynyń jarqyn oqıǵalaryna arnalǵan QR Tuńǵysh Prezıdenti mýzeıindegi fotokórmeni tamashalady.
