Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Dáýren Ádilbekov kezdesýdi asha kelip, ulttyq ekonomıkany damytýda ınnovasııalyq júıeni damytý mańyzy zor máselelerdiń biri ekenin atap ótti.
Senator bul salada birqatar baǵdarlamalar, jol kartalary men jobalar jasalǵanyn, alaıda olardy júzege asyrý naqty nátıje bermeı otyrǵanyn atap ótti.
«Bizge memlekettik basqarý júıesin ınnovasııalyq damýǵa baǵyttaý qajet. Ulttyq ınnovasııalyq júıeni damytýda memlekettiń, bıznestiń, bilim jáne ǵylym júıesiniń tıimdi ózara is-qımyl prosesin jolǵa qoıý talap etiledi», dedi Dáýren Ádilbekov.
Senator Edil Mamytbekov óz kezeginde memlekettik basqarýdyń barlyq deńgeılerinde memlekettik teńdestirilgen sharalar strategııasy men olardy iske asyrý taktıkasynyń joqtyǵy ınnovasııa salasyndaǵy basty másele ekenin atap ótti.
«Ǵylymı-zertteý jáne syndarly tájirıbelik jumysty kommersııalandyrýdyń nashar bolý sebepteriniń biri ónerkásip pen ǵylymnyń ózara baılanysynyń damý deńgeıiniń tómendigi bolyp tabylady», dedi senator.
Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın senatorlar aldynda esep berdi. Ol aıtylǵan problemalarmen kelise otyryp, josparly kórsetkishterge qol jetkizýge jáne oń serpinge qaramastan, ol ekonomıkanyń ozyq ınnovasııalyq ósýin qalyptastyrý úshin áli de jetkiliksiz ekenin aıtty.
Sondaı-aq Indýstrııa jáne ınfraqurylymdyq damý mınıstrliginiń, "Samuryq-Qazyna", "Ulttyq agrarlyq ǵylymı-bilim berý ortalyǵy" KEAQ, Innovasııalardy damytý jónindegi ulttyq agenttiktiń ókilderi baıandama jasady.
Komıtet tóraǵasy óziniń qorytyndy sózinde jobalarǵa monıtorıng jasaý jáne taldaý quraldarymen qosa ulttyq ınnovasııalyq júıeni basqarýdyń jalpy kestesin usyndy.
Dóńgelek ústel qorytyndysy boıynsha birqatar usynystar ázirlendi. Onyń ishinde ınnovasııalar jáne onyń quramyndaǵy uǵymdardy aıqyndaý, Tehnologııalyq saıasat jónindegi keńestiń mártebesin kóterý, ınnovasııalyq damý jónindegi negizgi kórsetkishterdi qarastyrý jáne basqa da máseleler bar.
