Agroónerkásip keshenin damytý nátıjelerin kórsetken mınıstr koronavırýs pandemııasyna jáne álemdegi kúrdeli ekonomıkalyq jaǵdaıǵa qaramastan, 2020 jyldyń qorytyndysy boıynsha sala barlyq makrokórsetkishter boıynsha ósimge qol jetkizgenin aıtty. Máselen, aýyl sharýashylyǵynyń jalpy óniminiń kólemi 5,6%-ǵa artyp, 6,3 trln teńgege jetken.
Mundaı ósimge memlekettik agrarlyq saıasat ındıkatorlarynyń josparly túrde oryndalýy, sondaı-aq júıeli jumys pen ótken jyldyń kókteminde daǵdarysqa qarsy shuǵyl sheshimderdiń der kezinde qabyldanǵany yqpal etti.
«О́tken jyly daǵdarysqa qarsy sharalardy eseptegende, memlekettik qoldaý kólemi 366 mlrd teńgege deıin jetti. Bul 2019 jylǵy deńgeıden 13%-ǵa artyq.
Atap aıtqanda, sýbsıdııalaý barynsha jeńildetilip, tolyq avtomattandyryldy. Onyń belgili bir salaǵa ǵana nazar aýdarmaı, biryńǵaı tásildi kózdeıtin mehanızmderi qaıta qaraldy. Sondaı-aq shaǵyn jáne orta fermerlerdi sýbsıdııalaýǵa qol jetkizý shegi ózgertildi», dedi mınıstr.
Onyń aıtýynsha, ósimdik sharýashylyǵyndaǵy barlyq sýbsıdııalar Biryńǵaı erejelerge biriktirilip, ósimdikterdi qorǵaý quraldaryn sýbsıdııalaý keńeıtildi. Endi gerbısıdter ǵana emes, pestısıdterdiń basqa da túrleri sýbsıdııalanady. Basty jańalyqtardyń biri – sýbsıdııalardy bekitilgen ýaqytta ǵana emes, tuqymdy, tyńaıtqyshty, pestısıdterdi satyp alynǵan kúnnen bastap jyl on eki aı ala alatyn múmkindik berilip otyr.
Qarjy quraldaryn jetildirý aıasynda aınalym qarajatyn tolyqtyrýǵa arnalǵan nesıeler boıynsha syıaqy mólsherlemelerin sýbsıdııalaý normatıvi 5%-dan 7%-ǵa deıin ulǵaıtyldy. Endi egin egý jáne egin jınaý jumystaryn júrgizý syıaqy mólsherlemesiniń 9%-y sýbsıdııalanady.
«Agroónerkásip kesheniniń sýbektileri úshin kepildik bazasy jetpegen jaǵdaıda ekinshi deńgeıdegi bankterdiń nesıelerine kepildik berý mehanızmi qoljetimdi boldy. Nesıe somasynyń 50%-na deıin jáne basym ınvestısııalyq jobalar boıynsha nesıe somasynyń 85%-na deıin kepildik beriledi.
О́tken jyldan bastap aýyl sharýashylyǵy salasynda saqtandyrýdyń jańa júıesi jumys isteı bastady. Iаǵnı, saqtandyrý erikti túrde jasalady. Sondaı-aq ósimdik sharýashylyǵy salasyn ǵana emes, basqa da salalardy saqtandyrý mehanızmi engizildi», dep habarlady Saparhan Omarov.
Otyrys sońynda Qoǵamdyq keńes músheleri uıymdastyrý máselelerin qarady. Atap aıtqanda, tóralqa quramyn, erejeni jáne jyldyq jumys josparyn bekitti.
