Sapardyń birinshi kúni M.Tileýberdi óziniń qyrǵyz áriptesi R.Kazakbaevpen kelissózder júrgizdi. Taraptar ekijaqty yntymaqtastyqtyń ózekti máseleleriniń keń aýqymy, óńirlik jáne halyqaralyq kún tártibi boıynsha «saǵattardy teńestirdi», sondaı-aq joǵary jáne asa joǵary deńgeılerde qol jetkizilgen ýaǵdalastyqtardy jedel iske asyrý boıynsha naqty sharalardy belgiledi.
Mınıstrler ekijaqty taýar aınalymyn arttyrý, ónerkásiptik kooperasııany damytý jáne mádenı-gýmanıtarlyq baılanystardy nyǵaıtý joldaryn talqylady. Investısııalardy qorǵaý jáne sý-energetıka salasyndaǵy yntymaqtastyq máselelerine erekshe nazar aýdaryldy.
M.Tileýberdi Qazaqstan eki jaqty negizgi qujattarda - Máńgilik dostyq týraly shart jáne Odaqtastyq qatynastar týraly shartta belgilengen Qyrǵyzstanmen táýelsiz damý jyldarynda qalyptasqan tatý kórshilik jáne odaqtastyq qatynastardy joǵary baǵalaıtynyn atap ótti. «Elimizdiń joǵary basshylyǵy árqashan sizdiń respýblıkańyzben tyǵyz jaqyndasý baǵytyn ustanady. Biz baýyrlas Qyrǵyzstanda árdaıym beıbitshilik pen turaqtylyqtyń bolýyna shyn júrekten múddelimiz», dedi Qazaqstan SIM basshysy.
О́z kezeginde Qyrǵyzstan SIM basshysy R.Kazakbaev qazaqstandyq tarapqa turaqty qoldaý kórsetkeni úshin alǵysyn bildirdi, atap aıtqanda, pandemııanyń kúrdeli jaǵdaıynda Qazaqstannyń kórsetken gýmanıtarlyq kómegin erekshe atap ótti.
«Qazaqstan biz úshin baýyrlas respýblıka, máńgilik dos, senimdi odaqtas jáne strategııalyq seriktes. Qazaqstannyń Tuńǵysh Prezıdenti - Elbasy Nursultan Nazarbaevtyń ózara tıimdi yntymaqtastyqtyń senimdi jáne shyn máninde baýyrlastyq qatynastaryn qurýdaǵy baǵa jetpes rólin atap ótkim keledi. Qazaqstan Prezıdenti Qasym-Jomart Toqaev elimizben ózara is-qımyldy nyǵaıtýǵa baǵyttalǵan saıası baǵyttyń sabaqtastyǵyn jalǵastyrýda», dedi R.Kazakbaev. Qyrǵyzstan burynǵydaı baýyrlas Qazaqstanmen ekijaqty jáne kópjaqty qatynastardy tereńdetýge baǵyttalǵan syrtqy saıasatty júrgizetin bolady, dep qosty ol.
Qazirgi ýaqytta strategııalyq perspektıvada yntymaqtastyqty odan ári nyǵaıtý úshin Qazaqstan men Qyrǵyzstan arasynda tıisti tetikter qurylyp, jumys isteýde – Joǵary Memleketaralyq keńes, Úkimetaralyq keńes, Syrtqy ister mınıstrleri keńesi, sondaı-aq Yntymaqtastyq jónindegi parlamentaralyq keńes.
Qazaqstan Qyrǵyzstan ekonomıkasynyń iri ınvestorlarynyń qataryna kiredi jáne 2005 jyldan bastap 2020 jylǵa deıin jınaqtalǵan tikeleı ınvestısııalar kólemi 1 mlrd. AQSh dollar qurady. О́z kezeginde, bizdiń elimiz Qyrǵyzstannyń syrtqy saýda aınalymynda 3-shi oryn alady.
Joǵary deńgeıdegi ýaǵdalastyqtarǵa sáıkes toǵyspaly túrde mádenıet kúnderin uıymdastyrý, Bishkekte Abaı jáne Nur-Sultanda Manas eskertkishterin ashý jáne birlesken bilim berý baǵdarlamalaryn ázirleý pysyqtalýda. Qazaqstan qyrǵyz jastaryn elimizdiń joǵary oqý oryndarynda oqytý úshinjyl saıynǵy kvotalardy ulǵaıtýdy josparlaýda. Sondaı-aq, Bishkekte qazaqstandyq aldyńǵy qatarǵy joǵary oqý oryndarynyń biriniń fılıaldaryn ashý múmkindigi zerttelýde.
Mınıstr M.Tileýberdi Qyrǵyzstannyń Jogorký Kenesh tóraǵasy Talant Mamytovpen kezdesip, parlamentaralyq yntymaqtastyqty damytý máselelerin talqylady. Taraptar eki el arasyndaǵy kópjosparly ózara is-qımyldy arttyrýǵa ortaq múddelilik tanytty.
Sapar aıasynda qazaqstandyq delegasııa «Ata-Beııt» memorıaldyq keshenine gúl shoqtaryn qoıý rásimine qatysty.
