Pavlodar oblysynda memlekettik shekaradaǵy «Qosaq», «Úrlitóbe», «Sulý Aǵash», «Sharbaqty» ótkizý beketterinde qozǵalysqa monıtorıng júrgizý jalǵasýda.
Tek 26 mamyrda Pavlodar oblysynyń shekarasy arqyly 335 azamat ótti. Olardyń 148-i – jaıaý júrginshiler, 187-i – júk kólikteriniń júrgizýshileri. Osy kúni karantındik stasıonarǵa 9 adam ornalastyryldy.
Bir táýlik ishinde ótkizý beketterinde Covid-19 rastalǵan jaǵdaılar anyqtalǵan joq.
Reseı jáne Qyrǵyzstannan kelgen 2 azamattyń elge kirýine tyıym salyndy. Sheteldikter PTR tekserýiniń teris nátıjesi bar anyqtamany usynbaǵan.
Shekteýler engizilgen sátten bastap (19.09.2020 j.) Pavlodar oblysyna 108 943 adam keldi. Olardyń 65 296-y – halyqaralyq tasymaldardy júzege asyratyn júrgizýshiler bolsa, 43 647-i – jolaýshylar.
«26 mamyrdaǵy jaǵdaı boıynsha 30 911 PTR tekserý barysynda aýrýdyń asımptomatıkalyq aǵymy bar 202 adam anyqtaldy», delingen habarlamada.
PTR tekserýden ótkizý úshin 3 180 qazaqstandyq karantındik stasıonarlarǵa jatqyzyldy.
1 446 sheteldiktiń elge kirýine (anyqtamasyz) jol berilgen joq.
