Bul – Baltyq jaǵalaýynda uıymdastyrylyp jatqan álem birinshiliginde tirkelgen eń iri esep, bylaısha aıtqanda, rekordtyq nátıje. Ázirshe, AQSh, Fınlıandııa, tipti, A tobynda kósh bastap turǵan Reseı men Slovakııa hokkeıshileri de mundaı kóp shaıba soǵa alǵan joq.
Kanadany qapy qaldyra almadyq
Jerlesterimiz Italııa quramasyna deıin besinshi týrda chempıonattyń alǵashqy úsh oıynynda jeńilistiń kermek dámin tatqan Kanada hokkeıshilerimen sheberlik baıqasty. Asa tartysty ótken matchta Úıeńki japyraqtar eli sportshylarynyń baǵy janyp, jeńisti julyp aldy.
Qazaqstan quramasy kezdesýdi jap-jaqsy bastaǵanymen, matchtyń 6-mınýtynda qaqpalaryna gol ótkizip aldy. 4-mınýtta Dmı-trıı Shevchenko tártip buzǵany úshin eki mınýtqa kishi aıyppen jazalanyp, komandasyn tórt oıynshymen qaldyrdy. San basymdyǵyna ıe bolǵan kanadalyqtar bul múmkindikti múlt jibergen joq. Bastapqyda tóreshiler Endrıý Mandjapaneniń soqqan golyn esepke almaǵanymen, beıneqaıtalaýdan keıin gol oıyn jaǵdaıynda soǵyldy degen sheshim shyǵardy.
Ekinshi kezeń bastala salyp Adam Henrık Andreı Shýtov qorǵaǵan qaqpany dál kózdep, esepti 2:0-ge jetkizdi. Jerlesterimiz ekinshi 20 mınýttyqta oıynǵa shyndap kiristi. 24-mınýtta Nıkıta Mıhaılıs qarsy shabýylda qarsylastyń qorǵanysyn buzyp-jaryp, esep aıyrmasyn qysqartty – 1:2. Ekinshi kezeń sońyna deıin bizdiń quramanyń esepti teńestiretin múmkindikteri bolǵan edi. Alaıda tórt oıynshymyz tártip buzyp, 8 mınýt kem quramda oınaǵandyqtan shabýylǵa emes, qorǵanysqa kóbirek kóńil bólýge májbúr boldy. Degenmen úshinshi kezeń bastala sala Qazaqstan quramasy báribir tablodaǵy kórsetkishti teńestirdi. Kertıs Volktyń pasynan keıin qaqpany dál kózdegen Mıhaılıs dýbldiń avtory atandy. Biraq jankúıerlerdiń qýanyshy uzaqqa sozylmady. 48-mınýtta kanadalyqtar taǵy da esepte alǵa shyǵyp, match aıaqtalýǵa úsh sekýnd qalǵanda Konnor Braýn bizdiń bos qaqpaǵymyzǵa komandasynyń tórtinshi shaıbasyn soǵyp, kezdesýdiń núktesin qoıdy – 2:4.
Italııany asa iri eseppen jeńdik
Tartysty oıynda qarsylastaryna ese jibergen Iýrıı Mıhaılıs shákirtteri ertesine Italııa hokkeıshilerimen úsh upaı úshin baq synady. Barlyq oıynda jeńiliske ushyrap, týrnır kestesinde sońǵy orynda kele jatqan ıtalııalyqtar bizdiń jigitterge qaraǵanda bir kún demalyp oıynǵa tyń kúshpen kelgen-di.
Búginge deıin eki eldiń hokkeıshileri álem chempıonatynda 6 ret kezdesip, eki qurama da úsh oıynnan jeńiske jetken. Eń keıingi ret Qazaqstan men Italııa 2018 jyly Býdapesht muzaıdynynda jolyǵyp, jeńis ıtalııalyqtardyń enshisinde ketken edi. Sóıtip Italııa elıtaly dıvızıonda óner kórsetýge múmkindik alyp, Qazaqstan tómengi topqa túsip qalǵan-tyn.
Bul match sol bir aýyr jeńilisten keıin ese qaıtarý úshin tamasha múmkindik edi. Sony túsingen bizdiń hokkeıshiler 60 mınýt boıy muzaıdynda aıanyp qalmady. Match bastala sala san basymdyǵyna ıe bolǵan Qazaqstan quramasy «á» degennen esep ashyp úlgerdi. Goldyń avtory – Roman Starchenko. Biraq ıtalııalyqtar da ońaı shaǵylatyn jańǵaq emes ekendikterin ańǵartyp, jerlesterimizge biraz qarsylyq kórsetti. Alǵashqy kezeń 1:0 esebimen aıaqtaldy. Úzilisten keıin qarsylastarymyzdyń oıyn órnegi ózgerip sala berdi. Shaıbaǵa ıelik ete salysymen qarsy shabýylǵa shyqqan Italııa quramasy 24-mınýtta óz degenderine jetti. Nıkıta Boıarkın Andjelo Mıchelıdiń soqqysyn qaıtara almady. Ekinshi kezeńniń orta tusynan aýǵanda Egor Petýhov pen Evgenıı Rymarev belsendilik tanytyp, esepti 3:1-ge jetkizdi.
Al úshinshi kezeńde Qazaqstan quramasy goldan jańbyr jaýǵyzyp, jankúıerlerge naǵyz hokkeı merekesin syılady. Bul kezeńde jerlesterimizden Nıkıta Mıhaılıs, Kertıs Volk, Artem Lıhotnıkov (dýbl), Kırıll Panıýkov, Roman Starchenko, Vıktor Svedberg jáne Egor Shalapov gol soqsa, ıtalııalyqtar Peter Hohkofler men Aleks Petan eki golmen qarymta qaıtardy. Qorytyndy esep – 11:3.
Joǵaryda aıtyp ótkenimizdeı, Qazaqstan bıylǵy álem chempıonatynda bir oıynda eń kóp shaıba soqqan qurama atandy. Buǵan deıingi úzdik nátıje Germanııa hokkeıshilerine tıesili edi. Olar da Italııa quramasyna 9 shaıba soǵyp, chempıonattyń úzdik nátıjesin tirkegen bolatyn.
Sonymen qatar bul – Qazaqstan quramasynyń álem chempıonattarynyń (elıtaly dıvızıonda) tarıhyndaǵy da eń iri nátıjesi. Jerlesterimiz 2004 jyly Fransııa quramasyn 5:0 esebimen jeńse, 2006 jyly Slovenııadan da dál osyndaı eseppen basym túsken edi.
Alty oıynnan keıin 10 upaı jınaǵan Qazaqstan quramasy V tobynyń týrnır kestesinde úshinshi orynda keledi. Biraq ózge komandalarǵa qaraǵanda bir oıyn kóp ótkizgen. Jerlesterimiz álem chempıonatyndaǵy sońǵy oıynyn búgin Norvegııa hokkeıshilerimen ótkizedi. Eger bul oıynda negizgi ýaqytta jeńiske jete alsa, Qazaqstan hokkeıshileri tuńǵysh ret Álem chempıonatynyń pleı-off kezeńinde oınaıdy.
