inform.kz
Rásimge qatysýshylar saıası qýǵyn-súrgin jáne asharshylyq qurbandaryn «bir mınýt únsizdikpen» eske aldy. Sondaı-aq saıası qýǵyn-súrgin jáne asharshylyq qurbandaryn «bir mınýt únsizdikpen» QR Premer-Mınıstriniń orynbasary Eraly Toǵjanov, QR Prezıdenti ákimshiligi basshysynyń birinshi orynbasary Dáýren Abaev, «Nur Otan» partııasy tóraǵasynyń birinshi orynbasary Baýyrjan Baıbek, Aqmola oblysynyń ákimi Ermek Marjyqpaev eske aldy.
Murajaı-memorıaldyq keshendi aralaý barysynda Q.Kósherbaev murajaıdyń ǵylymı-izdestirý jáne ekspedısııalyq jumysyna erekshe nazar aýdaryp, áıgili ALJIR lageriniń tutqyndaryn aqtaý Memlekettik komıssııanyń respýblıka aýmaǵyndaǵy lagerlerde bolǵan jazyqsyz qýǵyn-súrginge ushyraǵandardy, sondaı-aq olardyń otbasy múshelerin aqtaýmen aınalysatyn jumys toptarynyń mindetine kiretinin atap ótti. Memlekettik hatshy atap ótkendeı, Memleket basshysy Q.K.Toqaevtyń bastamasymen qurylǵan memlekettik komıssııanyń qyzmeti tarıhty zerdeleý men arhıvtik zertteýler júrgizý jónindegi keshendi jumystyń negizinde júzege asyrylady.
Memlekettik komıssııanyń qyzmetin uıymdastyrý sheńberinde jobalyq ofıs, eki kishi komıssııa, 11 jumys toby jáne 17 óńirlik komıssııa qurylyp, jumys istep jatyr. Jumys toptary men óńirlik komıssııalardyń ǵalymdary jáne sarapshylary jabyq arhıv materıaldaryna ruqsat alyp, belsendi zertteý jumysyna kiristi. Onyń tıimdiligin qamtamasyz etý úshin bazalyq ádisnama bekitildi, jumys toptarynyń taqyryptyq josparlary qalyptastyryldy, jergilikti jerlerde arhıv qujattaryn izdeý jáne zerdeleý máseleleri boıynsha kezdesý ótkiziledi.
Qorytyndylaı kele Memlekettik hatshy memlekettik komıssııanyń qyzmeti, eń aldymen, jazyqsyz zardap shekken saıası qýǵyn-súrgin jáne asharshylyq qurbandaryn máńgi este qaldyrý jáne tarıhı ádilettilikti qalpyna keltirý jónindegi úlken tarıhı mıssııa jáne aldyńǵy jáne bolashaq urpaqtar aldyndaǵy jaýapkershilik ekenin taǵy da eske saldy.
