27 mamyrda túnde Saran qalasynda 31 jastaǵy Qaırat Táshenovti kólik qaǵyp ketti. Er adam Makarenko kóshesinde velosıpedpen ketip bara jatqan. Týystarynyń aıtýynsha, ony qarsy jolaqta qozǵalyp bara jatqan avtokólik soqqan, onyń júrgizýshisi jergilikti áskerı bólimniń kelisimshart boıynsha jumys isteıtin áskerı qyzmetshisi. Júrgizýshi «mas kúıde» aldynda kele jatqan kólikti basyp ozbaq bolyp, velosıpedshini qaqqany habarlandy.
«Osydan keıin júrgizýshi men onyń dosy jedel járdem de shaqyrǵan joq. Olar Qaıratty jerden kóterip esin jııýǵa kómektespek bolǵan, biraq qulatyp ala bergen. Muny ótip bara jatqan taksı júrgizýshisi kórip olarǵa jábirlenýshige tıispeýin surap, jedel járdem shaqyrǵysy kelgen. Biraq júrgizýshi kýágerge kedergi jasap, ol qazir óz-ózine keledi degen», dedi marqumnyń ápkesi Kamıla Samatova.
Oqys oqıǵany qala turǵyny kórip jedel-járdem shaqyrǵan.
«Júrgizýshi men onyń dosynyń alkogol ishkenin kórgen adamdar bar. Olar baýyryma birden alǵashqy kómek kórsetip, jedel járdem shaqyrǵanda, aman qalýy múmkin edi. Ýaqyt joǵaltyp aldyq. Ol Saran ortalyq aýrýhanasyna es-tússiz kúıde jetkizildi. Búkil súıegi synǵan, tósekte shúberek qýyrshaq sııaqty jatty. Qabyldaý bóliminiń qyzmetkerleri de ýaqytyly kómek kórsetpedi. Olar baýyrymnyń kelý ýaqytyn tirkemedi, shınalardy ýaqytyly salmady. Osy kúıde Makajanov atyndaǵy klınıkaǵa jiberildi, onda ol qaıtys boldy», dedi Kamıla.
Marqumnyń týystary jol-kólik oqıǵasyna kináli adamnyń mas bolǵanyn jáne onyń jyldamdyqty aıtarlyqtaı asyrǵanyn dáleldegisi keledi.
QR Qorǵanys mınıstrliginiń baspasóz qyzmeti oqıǵaǵa qatysty túsinik berdi. Vedomstvo ókiliniń aıtýynsha, júrgizýshi adam qaqty, biraq mas bolmaǵan.
Qaraǵandy oblysy PD baspasóz qyzmeti de oqıǵaǵa qatysty pikir bildirdi. Atalǵan derek boıynsha tergeý júrip jatqany habarlandy. Barlyq qajetti saraptama taǵaıyndaldy.
Bıyl qyrkúıekte Qaırat Táshenov 32 jasqa tolar edi.
«Ol sportpen shuǵyldanatyn, áýe kúshterinde qyzmet etti. 18 jasynda ákesiz qalǵan ol otbasyndaǵy jalǵyz asyraýshy bolǵan. О́mirge jospary kóp edi, úılenip te úlgermedi. Biz onyń ólimine kináliler jazalanǵanyn qalaımyz», deıdi qaıtys bolǵan jigittiń týystary.
