2021 jylǵy 24 mamyrda jedel-izdestirý is-sharalary men jasyryn tergeý is-qımyldary keshenin iske asyrý prosesinde qylmystyq ıerarhııada halyqaralyq esirtki tobyn uıymdastyrýshylardyń biri retinde áreket etetin, «mefedron» esirtki quralynyń kóterme partııalaryn ótkizýmen aınalysatyn Almaty qalasynyń turǵyny ustaldy.
Tintý is-sharalaryn júrgizý nátıjesinde 1,3 kg sıntetıkalyq esirtki tabylyp, tárkilendi. QR UQK baspasóz qyzmetiniń málimetinshe, taýar QR-da jumys isteıtin iri Internet-dúkenderdiń biri arqyly jasyryn qoıylmalardy júzege asyra otyryp, qatynassyz tásilmen satylǵany anyqtaldy.
«Atalǵan fakt boıynsha QR UQK Almaty q. boıynsha departamenti sotqa deıingi tergeý materıaldaryn QR QK 297-baby 3-bóligi boıynsha SDTBT-ǵa tirkedi», delingen vedomstvonyń málimetinde.
Sońǵy ýaqytta Almatynyń «qara naryǵynda» esirtki quraldarynyń iri partııalaryn qoldan jasaý men jetkizý toqtaýsyz ósýde. Naqtyraq aıtqanda, 2021 jyldyń basynan bastap qazirgi ýaqytqa deıin UQK departamenti esirtki quraldarynyń zańsyz aınalymynyń 11 faktisiniń jolyn kesti, sıntetıkalyq esirtki óndirý jónindegi 5 jasyryn zerthananyń (onyń ishinde bireýi Qyrǵyzstan aýmaǵynda) áreketin joıdy.
Zańsyz aınalymnan shamamen 190 kılogramm esirtki tárkilendi. Esirtki bıznesimen aınalysqany úshin 17 adam ustalyp, qylmystyq jaýapqa tartyldy.
