Oqıǵa bolǵan mańaıda turatyn qala turǵyndary tańǵy tátti uıqydan Borodın dúkeniniń artynan atylǵan oqtyń daýsynan oıanǵandaryn aıtady.
«6 maýsym kúni tańǵy saǵat 6:00-de Borodın dúkeniniń artyndaǵy Gogol 98 mekenjaıynan shaqyrtý tústi. Mekenjaıǵa 3 brıgada bardy. Oqıǵa ornynda úsh adam jaraqat alǵan. Bir brıgada bóksesinen pyshaq jaraqatyn alǵan adamdy alyp ketti. Ekinshi jedel járdem kóligine keýde tusy kógerip ketken jábirlenýshi mindi. Bul – travmatıkalyq qarý qoldaný nátıjesinde túsken iz bolýy múmkin. Al úshinshi adamnyń jaǵy, tisteri synǵan. Ony aýrýhanaǵa úshinshi brıgada jetkizdi», dep málimdedi oblystyq densaýlyq saqtaý basqarmasy.
Polısııa atalmysh oqıǵaǵa qatysty sotqa deıingi tergeý sharalary bastalǵanyn habarlady.
«6 maýsymda saǵat tańǵy 6-lar shamasynda Gogol kóshesinde birneshe adamnyń tóbelesip jatqany týraly málimet kelip tústi. Oqıǵa ornyna jedel tergeý toby men jergilikti polısııa qyzmetiniń jasaqtary jetip, janjaldy toqtatty. Oqıǵaǵa qatysqan adamdar men kýágerlerden polısııa bólimshesinde jaýap alyndy. Nátıjesinde, janjaldyń qyzǵa talasqan eki jas jigittiń arasynda týyndaǵany anyqtaldy. Odan keıin janjalǵa eki jaqtyń da tanystary aralasyp, onyń arty tóbeleske ulasqan.
Oqys oqıǵa týraly polısııaǵa habarlaǵan adam oq daýsyna uqsaıtyn daýys estigenin aıtqan bolatyn. Sondyqtan qazir sotqa deıingi tergeý sharalary aıasynda bul málimettiń ras-ótirik ekendigi tekserilip jatyr. Alaıda aýrýhanaǵa túskenderdiń ishinde oq jaraqatyn alǵan eshkim joq», dep málimdedi oblystyq polısııa departamentiniń baspasóz qyzmeti.
Qostanaı oblysy
