Búginde qarqyn alǵan qurylys jumysyna «Jumyspen qamtýdyń jol kartasy» sheńberinde bólingen qarjy tartylyp otyr. Onyń kólemi qomaqty, 105 mlrd teńge shamasynda. Bul qarjyǵa 1 051 joba júzege asyp, 20 myń adamǵa maýsymdyq jumys orny ashylǵan. Al byltyr bul baǵytta 60 myń adam eńbekpen qamtylǵan bolatyn.
– Almaty oblysynda qurylys salasynda karantındik shekteýlerge qaramastan, jumys qarqyny báseńdegen joq. Sol sııaqty biz shaǵyn jáne orta bıznes nysandarynyń jabylýy saldarynan ornynan bosap qalǵan kóptegen azamatty osy qurylys salasynda jumyspen qamtydyq. О́ńirde «Nurly jer» baǵdarlamasyn júzege asyrý jalǵasýda, jyl sońyna deıin 1 mln sharshy metr turǵyn úı paıdalanýǵa berý josparlanǵan. Qazir 2 603 páterlik 521 turǵyn úı salynyp jatyr, sonyń ishinde 1 212 páterdi kópbalaly analarǵa beremiz, – deıdi oblys ákimi Amandyq Batalov.
Jalpy bıyl oblysta «7-20-25», «Baqytty otbasy» jáne «Shańyraq 5-10-20» arnaıy baǵdarlamalary boıynsha da 1 986 otbasy jeńildikpen páterli bolady degen úmit bar. Osy turǵyn úımen qamtý jaıy oblystyń 2021-2025 jyldarǵa arnalǵan damý baǵdarlamasynyń negizgi arqaýy bolyp otyr. Al damý baǵdarlamasyna qyrýar qarajat jumsalmaq. Iаǵnı alǵa qoıǵan maqsatty júzege asyrýǵa 3,5 trln teńge qarastyrylsa, onyń 2 trln 300 mlrd teńgesi bıýdjetten, al 1 trln 200 mlrd teńge qarjy jeke ınvestorlardan quıylmaq. Árıne bul qarajatqa óńirdegi jol jóndeý, aýyz sýmen qamtý, jylýmen qamtý sııaqty negizgi salalardaǵy máselelerdi sheshý de qarastyrylǵan. Sonyń ishinde 2021-2025 jyldary oblysta shamamen 5 mln 400 myń sharshy metr turǵyn úı salý josparlanyp otyr. Onyń ishinde 1,1 mln sharshy metr baspana qurylysy «Nurly jer» baǵdarlamasy aıasynda iske aspaq. Bul baǵdarlama oblystaǵy baspanaǵa muqtaj 3 myńnan astam áleýmettik jaǵynan az qamtylǵan jáne 5,5 myń shamasyndaǵy kópbalaly otbasyn úımen qamtamasyz etýi tıis.
Búginde baspana qurylysy oblys ortalyǵynda ǵana emes, aýdandarda da júrip jatyr. Mysalǵa, Sarqan aýdanynda 50 páterli kópqabatty turǵyn úı salynýda. Qurylys «Nurly jer» memlekettik baǵdarlamasy aıasynda bastalǵan. Irgetasy byltyr qalanǵan turǵyn úıdi salýǵa 45 jumysshy maýsymdyq jumysqa tartylyp, on shaqty tehnıka jumys isteýde. Nysannyń aıaqtalý merzimi jyl sońyna josparlanypty. Bul jumysqa 505,630 mln teńge qarajat bólingen. Jaýapty merdiger Golden City DS seriktestigi nysandy talapqa saı salyp, merziminde aıaqtaıdy degen úmit bar.
– Jalpy, aýdanda buǵan deıin 55 turǵyn úı salynyp, baspana kezeginde turǵan azamattarǵa berilgen edi. Osy arqyly turǵyn úı kezeginde turǵan azamattardyń ártúrli memlekettik baǵdarlamalarǵa qatysyp, jeńildetilgen nesıe arqyly úı-jaıǵa qol jetkizýine jol ashylady. Bıyl aýdan ortalyǵynda zamanaýı úlgide salynyp jatqan 5 qabatty turǵyn úı keshenin qoldanysqa beremiz, – deıdi Sarqan aýdany ákiminiń orynbasary Jomart Myńbaev.
Sondaı-aq bul aýdanda taǵy da eki qabattan turatyn 20 páterli turǵyn úı qurylysy bastalýda. Aýdan ortalyǵyndaǵy qurylys jumystaryn júrgizý úshin memlekettik satyp alýǵa ashyq konkýrs jarııalanǵan. Jańa baspana salýǵa jalpy quny 296,53 mln teńge qarjy jumsalmaq.
