Premer-Mınıstr Qasym-Jomart Toqaevqa Qazaqstannyń bıylǵy qańtar-mamyr aılaryndaǵy áleýmettik-ekonomıkalyq damýynyń qorytyndylary, elimizdegi sanıtarlyq-epıdemıologııalyq ahýal men egis naýqanynyń aıaqtalǵany jóninde esep berildi.
Premer-Mınıstr Qazaqstan ekonomıkasynyń pandemııadan keıingi qaıta qalpyna kelý satysyna ótkeni týraly aıtty. Bıylǵy qańtar-mamyr aılaryndaǵy ishki jalpy ónim ósiminiń qarqyny byltyrǵy osy kezeńmen salystyrǵanda 1,6 paıyzdy qurady.
Asqar Mamınniń aıtýynsha, damýdyń negizgi qozǵaýshy kúshi 7,2 paıyzdyq ósim deńgeıin kórsetip otyrǵan óńdeý ónerkásibi (mashına jasaý, qurylys materıaldaryn óndirý, jeńil ónerkásip jáne t.b. salalarda qarqyndy ósim bar), qurylys sektory bolyp otyr.
Ekonomıkanyń óndirmeıtin sektorlarynda joǵary ınvestısııalyq belsendilik baıqalady. Negizgi kapıtalǵa quıylǵan ınvestısııanyń ósimi taý-ken salasyn esepke almaǵanda 25,5 paıyzǵa jetken.
Prezıdentke kóktemgi egin egý jumystarynyń nátıjesinde egis alqaptary 78,2 myń gektarǵa ulǵaıyp, 22,7 mıllıon gektarǵa deıin artqany jóninde baıandaldy.
Úkimet kóktemgi egis naýqanyn qarjylyq, materıaldyq-tehnıkalyq turǵydan qamtamasyz etý úshin barlyq qajetti sheshimderdi qabyldady. Kóktemgi egis jumystaryna 128 mıllıard teńge qarjy bólinip, 380 myń tonna janarmaı naryqtaǵy baǵadan 14 paıyzǵa tómen satylǵan jáne 405,3 myń tonna tyńaıtqysh berilgen.
Premer-Mınıstr elimizdegi sanıtarlyq-epıdemıologııalyq ahýaldyń jaqsarǵanyn aıtyp, Covid-19 indetiniń taralýy boıynsha Qazaqstan «sary» aımaqtan «jasyl» aımaqqa ótkenin jetkizdi. Bir apta ishinde indet juqtyrý deńgeıi 30 paıyzǵa azaıyp, koronavırýstyń taralý ındeksi 0,84-ke deıin tómendegen. Juqpaly aýrýlar bólimderiniń 24 paıyzynda, jan saqtaý bólimderiniń 21 paıyzynda naýqastar em qabyldap jatyr.
Nur-Sultan qalasy «qyzyl» aımaqta, Almaty qalasy, Atyraý, Pavlodar, Batys Qazaqstan, Aqmola jáne Qaraǵandy oblystary «sary» aımaqta. Qalǵan 10 oblys – «jasyl» aımaqta.
Qazirgi tańda 2,4 mıllıon adam ekpeniń birinshi komponentin aldy, 1,3 mıllıonǵa jýyq adamǵa ekpeniń ekinshi komponenti salynǵan.
Memleket basshysy turǵyndarǵa vaksına salý qarqynyn báseńdetpeýdiń jáne epıdemııaǵa qarsy sharalardy jalǵastyrýdyń mańyzdy ekenin atap ótti.
Kezdesý qorytyndysy boıynsha Prezıdent áleýmettik mańyzy bar azyq-túlik taýarlarynyń baǵasyn ustap turý, qurylys materıaldarynyń baǵasyn retteý, syrtqy jáne ishki ınvestısııa kólemin arttyrý, óńdeý sektoryn damytyp, ósimin qamtamasyz etý arqyly ekonomıkanyń qurylymdaryn ártaraptandyrý jónindegi sharalardy júzege asyrýǵa basa mán berýdi tapsyrdy.
