Sport • 13 Maýsym, 2021

Dop dodasy tosyn oqıǵalarmen bastaldy

117 ret kórsetildi

Jumadan senbige qaraǵan túni Italııa astanasy – Rımde fýtboldan 16-shy Eýropa chempıonatynyń shymyldyǵy túrildi. Kári qurlyq birinshiligi «á» degennen kútpegen oqıǵalarmen bas­taldy. Chempıonattyń alǵashqy golyn Túrkııa quramasynyń fýtbolshysy óz qaqpasyna soǵyp alsa, Danııa-Fınlıandııa arasyndaǵy matchtyń birin­shi taımynda dat fýtbolshysy Krıstıan Erıksen esinen tanyp, stadıonǵa jı­nalǵan jáne oıyndy teledıdar arqyly tamashalaǵan mıllıondaǵan jankúıerdi ýaıymǵa salyp qoıdy.

Sonymen bıylǵy Eýropa chempıonaty Túrkııa jáne Italııa quramalarynyń ara­syndaǵy oıynnan bastaý aldy. Jan­kúıerlermen qatar fýtbolshylardyń ózde­ri de mundaı iri dodany qatty saǵynyp qalǵan bolýy kerek, birinshiliktiń alǵashqy kez­desýinen-aq týrnır tartysty bastaldy. О́z tobynyń kóshbasshysy bolady dep kútilgen eki ujymnyń arasyndaǵy oıyn tek úsh upaıǵa ǵana emes, taktıkalyq kúreske de toly boldy dep aıta alamyz.  

Kezdesýdiń birinshi taımy 0:0 esebimen teń aıaqtalyp, ekinshi taımda Italııa fýtbolshylary Túrkııa quramasynyń qaqpasyna jaýapsyz úsh gol soqty. Italııalyqtardyń birinshi taımnyń sońynda penaltıden  esepti ashatyn múmkindikteri bolǵan edi. Alaıda tóreshi Dennı Makkelı Eýropa chempıonatynda bıyl tuńǵysh ret qoldanylyp jatqan VAR kómegine júginip, túrkııalyq fýtbolshy oıyn erejesin buzbaǵan dep tapty. Ekinshi taımnyń 53-mınýtynda Domenıko Berardıdiń alys­tan shirene tepken doby baıqaýsyzda «Iýventýs» klýbynda óner kórsetetin Túrkııa quramasynyń qorǵaýshysy Merıh Demıralǵa tıip, dop qaqpa torynan tabyldy. Osylaısha Eýropa chempıonatynyń tarıhynda týrnırdiń alǵashqy goly avtogol retinde tirkeldi. Match Italııada ótse de, resmı túrde qonaq komanda bolyp oınaǵan Italııa kezdesý sońyna deıin Túrkııa qaqpasyna taǵy eki gol soǵyp, birinshi matchta 3:0 esebimen jeńiske jetti.

Al Bakýde ótken toptaǵy ekinshi kezdesýde Ýels match sońyna qaraı tarazy ba­syn teńestirip, jeńilisten aman qaldy. Ekin­shi taımnyń 49-mınýtynda Shveısarııa qura­masynyń fýtbolshysy Brel Embolo esep ashsa, 74-mınýtta Kıffer Mýr Ýelstiń qarymta golyn soǵyp, quramasyna mańyzdy bir upaıdy áperdi.

V tobyndaǵy Danııa men Fınlıandııa ara­syndaǵy kezdesýde kútpegen oqıǵa tirkeldi. Oıynnyń birinshi taımy aıaqtalar tusta Danııa quramasynyń jartylaı qorǵaýshysy Krıstıan Erıksen esinen tanyp qaldy. Dárigerler kelgenshe fýtbolshyǵa áriptesteri alǵashqy medısınalyq kómek kórsetip, erlik jasady. Keıinnen dárigerler fýtbolshyǵa alańda 15 mınýtqa jýyq ýaqyt kómek kór­setip, jasandy tynys alý apparatymen esin jıǵyzýǵa tyrysty. Bir aıta keterligi, Erıksenge medısınalyq kómek kórsetilip jatqanda Danııa fýtbolshylary sheńber quryp jınala qalyp, kórermenderge qaı­ǵyly jaǵdaıdy kórsetpeýge tyrysty. Oıyn­shylardyń bul is-áreketin dúnıejúzi jankúıerleri bas barmaqpen baǵalaýda. Rea­nı­masııalyq em jasalyp bolǵan soń, Erıksendi jedel járdem kóligimen aýrýhana alyp ketti. Keıinnen ÝEFA resmı málimdeme jasap, fýtbolshy esin jıǵanyn jáne ózin jaqsy sezinip jatqanyn aıtty.

Dál osy jaǵdaıǵa uqsas oqıǵa 2003 jyly Konfederasııa kýbogynda da bolǵan edi. Kamerýndyq fýtbolshy Mark-Vıven Foe Kolýmbııamen ótken kezdesýdiń 72-mınýtynda esinen tanyp qulap, sol  kúıi o dúnıege attanyp ketken bolatyn.

Danııa men Fınlıandııa arasyndaǵy match 1,5 saǵatqa keıinge shegerilip, eki qu­rama fýtbolshylarynyń ótinishimen qaıta jalǵasty. Kezdesýdiń favorıti sanalǵan Danııa ekinshi taımda kútpegen jerde óz qaqpasyna gol ótkizip alyp, 0:1 esebimen jeńilip qaldy. Al Eýropa chempıonatyna tuńǵysh ret qatysyp jatqan Fınlıandııa birinshi matchtynda jeńiske jetip, týrnırdiń alǵashqy sensasııasyn jasady.

Osy toptaǵy ekinshi oıynda Reseı quramasy Sankt-Peterbýrgte Belgııadan oısyraı jeńildi – 0:3.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar