Atalǵan is-sharanyń biz de kýágeri boldyq. «Ustaz ben shákirt» dep atalatyn jańa konsertti «Qazaqkonsert» ártisteri kúı atasy Qurmanǵazy Saǵyrbaıuly men onyń ataqty shákirti Dına Nurpeıisovanyń shyǵarmashylyǵyna arnady. Bul kesh «Qazaqkonserttiń» 60-shy mereıtoılyq maýsymyna arnalǵan «Juldyzben bir sahnada» atty jańa joba aıasynda júzege asyryldy.
Konsertte belgili kompozıtor Baýyrjan Aqtaevtyń kórkemdik jetekshiligimen «Astana sazy» ansambliniń solısteri uly kúıshilerdiń esimderin asqaqtatyp, artyna qaldyrǵan baı muralaryn jańǵyrtty. Bul keshti ónersúıer qaýym ártistermen bir sahnada otyryp tamashalap, konserttiń tikeleı qatysýshysy retinde jańa áser aldy. Konserttiń jańa formatymen erekshe úılesim tapqan ulttyq mýzyka jáne ártisteriniń kásibı sheberligi kórermenniń joǵary baǵasyna ıe boldy.
Kórermendermen birge merekelik konsertti tamashalaǵan Dına Nurpeıisovanyń týǵan nemeresi Tólegen Qýanyshev «Qazaqkonsert» ártisterine óz alǵysyn bildirdi.
Baýyrjan Aqtaevtyń aıtýynsha, kúıshi Dına Nurpeıisovanyń 160 jyldyǵy men «Qazaqkonserttiń» 60 jyldyq mereıtoıy aıasynda uıymdastyrylǵan bul kesh kórermen qaýymǵa naǵyz rýhanı demalys syılady.
– Bul mereıtoı bizdiń ótkenimiz ben búginimizdiń arasyndaǵy jandy kópir ispettes. Sebebi atalǵan keshtiń maqsaty – bizdiń qazaq dástúrindegi qundylyqtardyń tarıhymen qosa, kúıdiń mán-maǵynasyn halyqqa pash etý. Aldaǵy ýaqytta da uly kúıshilerdiń esimderin asqaqtatyp, artyna qalǵan muralaryn qaıta jańǵyrtatyn sapaly konsertter óz jalǵasyn tabady degen oıdamyz, – dedi B.Aqtaev.
Konsertte Qurmanǵazynyń «Qyzyl qaıyń», «Balqaımaq», «Terisqaqpaı», «Mashına», «Tóremurat» syndy mazmundy, áserli, tereń maǵynaly fılosofııalyq kúıi oryndaldy. Sondaı-aq konserttik baǵdarlamaǵa qazaq dalasyn asqaq ta jigerli kúılerimen terbegen kúıshi Dınanyń «Baıjuma», «8 mart», «Jiger», «Bulbul», «Naýysqy» týyndylary endi. Konsertke qatysqan solısterdiń qatarynda: Nurken Iаqııaev, Ardaq Eleýsiz, Aıgúl Elshibaeva, Zańǵar Mýbarakov, Aıaýlym Qamajan, Ádil Júnisov, Qaırat Kereev boldy.
