Medısına • 14 Maýsym, 2021

Aqtóbede epıdemııalyq ahýal turaqtalyp keledi

Aqtóbede koronavırýs ınfeksııasyn juqtyrý deregi azaıdy. Qazir ınfeksııalyq aýrýhananyń ózi rezervke qoıylyp, naýqastar ftızıopýlmonologııalyq ortalyqta em alyp jatyr, dep habarlaıdy Egemen.kz.

Aıym DÁÝIT

Bir táýlikte taǵy 12 adamnan koronavırýs ınfeksııasy anyqtaldy. Onyń teń jartysy derttiń sımptomdy túrine shaldyqqan. Aqtóbe qalasynda bes, Mártók aýdanynda bir adam aýrý belgilerimen dáriger kómegine júgingen.

Oblystyq sanıtarııalyq-epıdemııalyq baqylaý departamenti baspasóz qyzmetiniń habarlaýynsha, óńirde barlyǵy 11 522 jaǵdaı tirkelip, onyń 96 paıyzǵa jýyǵy jazyldy. Áli de 2 myńnan astam adam úı karantıninde. Al ınfeksııalyq stasıonarlarda 188 adam em alyp jatyr.

«Aýrýshańdyqtyń tómendeýine baılanysty ınfeksııalyq stasıonar sany azaıdy. Sonyń ishinde aýdandarda kereýet sany qysqardy. Al Aqtóbe qalasy boıynsha oblystyq ftızıopýlmonologııalyq ortalyǵy ǵana koronavırýs ınfeksııasyn juqtyrǵandardy qabyldaıdy. Al ınfeksııalyq aýrýhananyń ózi rezervte bolady», dedi oblystyq densaýlyq saqtaý basqarmasy basshysynyń orynbasary Bekbolat Izbasarov.

Sonymen birge COVID-19-den aıyqqan naýqastar ambýlatorlyq jáne stasıonarlyq túrde saýyqtyrýdan ótti. Búginge deıin 1500 adam densaýlyǵyn nyǵaıtty.

«Eger naýqas dertti aýyr jáne ortasha aýyrlyqta ótkerse, shaǵymy bolsa, ýchaskelik dárigerge barýy tıis. Sodan keıin saýyqtyrý kýrsynan ótýge bolady», dedi Bekbolat Izbasarov.

Aqtóbe oblysy boıynsha qazir 17 bala baqylaýda. Olardyń bári ambýlatorlyq em alyp jatyr.

«Aqtóbe oblysy boıynsha 202 450 doza jetkizildi. 97 284 adam birinshisin, 49738 adam eki komponentin de qabyldady. Qazirgi kezde vaksına bar. Turǵyndar dáriger tekserýinen ótip, qabyldaýyna bolady», dedi oblystyq densaýlyq saqtaý basqarmasy basshysynyń orynbasary Bekbolat Izbasarov.