Aımaqtar • 14 Maýsym, 2021

Qaraǵandyda gematolog dárigerlerdiń sany birneshe esege artty

Memlekettik-jekemenshik áriptestiktiń arqasynda Qaraǵandy oblysynda úsh jyl ishinde gematolog dárigerler sany birneshe esege artty. Bul týraly Qaraǵandy gematologııa ortalyǵynyń jetekshisi Irına Pıvovarova aıtyp berdi, dep habarlaıdy Egemen.kz

Aıym DÁÝIT

Gematologııa ortalyǵynyń Qaraǵandy fılıaly 2018 jyly ashylǵan. Úsh jyl buryn medısınalyq mekemede gematologtyń 1,5 stavkasy bolǵan.

«Búgingi tańda onda 16 dáriger jumys isteıdi. Ǵımaratta jóndeý jumystary júrgizildi, «taza aýa palatalary» júıesi jumys isteıdi, zamanaýı HEPA-súzgiler ornatyldy jáne hımıoterapııaǵa arnalǵan preparattardy satyp alý júıesi retke keltirildi. Osynyń bárin memlekettik-jekemenshik áriptestiktiń arqasynda júzege asyrýǵa múmkindik týdy. Leıkozdyń jeńil jáne ortasha túrimen aýyratyn naýqastarǵa yńǵaıly bolý úshin ortalyqta kúndizgi stasıonar jumys isteıdi. Naýqastar sol jerde hımıoterapııa ala alady. Táýlik boıy stasıonarda tek aýyr naýqastar ǵana emdeledi. Medısınalyq mekemede Ambýlatorııalyq ortalyq jumys isteıdi, ol bastapqy dıagnostıka ortalyǵynan (kúndizgi jáne qashyqtyqtan) jáne dıspanserleý ortalyǵynan turady. Qazir gematologııa ortalyǵy AMSK qyzmetimen birge leıkozdy erte anyqtaý úshin jumys isteýde. Dárigerler Qaraǵandy oblysynda qan obyrymen aýyratyn naýqastyń ortasha jasy – 41 jas ekenin atap ótti. Alaıda, sońǵy jyldary dárigerler aýrýdy erte kezeńde jáne qart adamdarda anyqtaı aldy. Bul qosymsha resýrstardy qajet etedi», deıdi «Gematologııa ortalyǵy» JShS basshysy Irına Pıvovarova.

Sondyqtan medısınalyq mekemeni keńeıtý jáne kóshirý týraly josparlanyp otyr.

«Sondaı-aq biz lımfomasy bar naýqastarǵa arnalǵan úı-jaıdy keńeıtýdi josparlap otyrmyz. Árıne, biz reanımasııany kúsheıtýimiz kerek. Adamdarmen ǵana emes, dıalız ben gemofıltrasııa qolymyzda bolýy úshin bizge jergilikti nefrologııalyq ortalyq qajet», dep atap ótti Irına Pıvovarova.

Medısınalyq mekemede ýaqyt óte kele súıek kemigin transplantasııalaý bólimin ashý pysyqtalyp jatyr.

«Biz aýtologııalyq transplantasııalaý júrgizýge qabilettimiz. Ol degenimiz, jasýshalar adamnyń ózinen alynyp, ózine aýystyrylatyn medısınalyq áreket. Bizde oǵan ruqsat bar. Qaraǵandyda Nur-Sultandaǵy transplantasııa ortalyǵynyń jobasyn ázirlegen komandanyń bir bóligi jumys isteıdi. Aýtologııalyq transplantasııa isiktiń ómirlik sıklin birneshe ese qysqartýǵa múmkindik beredi», dep qosty Irına Pıvovarova.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz