Mine, osyndaı sebepterden soń byltyr jazda qaýipti vırýsqa qarsy qoldanylatyn dári-dármekpen qamtý úshin turaqtandyrý qory qurylǵan edi. Dári-dármekterdi satyp alý úshin «Atyraý» áleýmettik-kásipkerlik korporasııasy» AQ dári-dármekterdi saqtaýǵa arnalǵan qoımalary bar «INKAR» JShS fılıalyna 500 mln teńge kóleminde qaryz bergeni anyqtaldy. Alaıda koronavırýsqa qarsy qoldanylatyn dárilik preparattarmen qamtamasyz etýge qatysty uıymdastyrylǵan jumysqa Atyraý qalalyq máslıhatynyń depýtattary men qoǵamdyq uıymdar ókilderiniń kóńili tolmaı otyr. Olar bul máseleni «Atameken» UKP óńirlik fılıalynda ótken dóńgelek ústel basynda talqyǵa saldy.
– Biz «Atyraý – adaldyq alańy» jobalyq keńsesimen birge jergilikti dárihanalarda koronavırýsqa qarsy preparattardyń baǵasyna monıtorıng júrgizdik. Jalpy dárihananyń shekti baǵasy saqtalady. Alaıda olardyń kópshiligi «INKAR» JShS fılıalynan, ıaǵnı turaqtandyrý qorynan satyp alynbaıtynyn aıtyp otyr. О́ıtkeni dári-dármekterdiń quny basqa jetkizýshiler usynatyn baǵadan áldeqaıda qymbat. Sondaı-aq jetkizý merzimi óte uzaq ýaqyt alady. Birqatar dárihanada qaýipti vırýsqa qarsy qoldanylatyn preparattar joq. Tipti dári-dármekterdiń baǵalary men tizimi kórsetilgen aqparattyq tablony tappadyq. Osy máselege qatysty farmasevtıkalyq baqylaý departamentine, «INKAR» JShS-niń fılıalyna hat joldadyq. Biraq tıisti jaýap alǵan joqpyz, – deıdi Atyraý qalalyq máslıhatynyń depýtaty Gúlzeınep Dúsipova.
Al «Atyraý» ÁKK» AQ basqarma tóraǵasynyń orynbasary Amantaı Aıtbaevtyń málimetinshe, «INKAR» JShS-niń fılıalymen jasalǵan kelisimsharttyń merzimi bıylǵy 1 shildede aıaqtalady eken. Qazir atalǵan seriktestik byltyr berilgen qaryzdyń 200 mln teńgesin ǵana qaıtarypty.
– Qazir biz «INKAR» JShS-men kelisimshartty uzartý máselesin qarastyrýdamyz. Ázirge másele ashyq kúıinde qalyp otyr. Al 300 mln teńge kóleminde qalǵan bereshekti óteý úshin seriktestik turaqtandyrý qoryndaǵy dári-dármekterdi satady. Sondyqtan onda dári-dármekterdiń keıbir túrleri joq. Qor erekshe jaǵdaıǵa baılanysty qurylǵan edi. Biraq mundaı jaǵdaı bolǵan joq. Dári-dármekter aýrýhanalarda qajetti mólsherde bar, – deıdi A.Aıtbaev.
Atyraý qalalyq máslıhatynyń depýtattary men «Adaldyq alańy» jobalyq keńsesiniń ókilderi «INKAR» JShS-niń fılıalymen kelisimshart jasaý kezinde koronavırýsqa qarsy preparattarǵa shekti baǵalar naqtylanbaǵanyn durys emes dep sanaıdy. Sondaı-aq olar «Atyraý» ÁKK» AQ tarapynan bólingen qarajattyń maqsatty paıdalanylýyna monıtorıng júrgizilmeıtindigimen kelispeıdi.
Qazir óńir «sary aımaqta» turaqtap tur. Oǵan sońǵy aptada qaýipti vırýsqa shaldyqqandar sanynyń azaıǵany sebep bolyp otyr. Oblystyq densaýlyq saqtaý basqarmasynyń baspasóz qyzmeti taratqan aqparatqa súıensek, 14 maýsymda 27 adamnan koronavırýs ınfeksııasy anyqtalypty. Alaıda áli de óńirdegi ınfeksııalyq stasıonarlarda 331 naýqas em qabyldap jatyr. Onyń ishinde modýldik aýrýhanada – 111, №2 oblystyq aýrýhanada – 100, aýdandardaǵy ınfeksııalyq stasıonarlarda – 56, ftızıopýlmanologııalyq ortalyqta 18 pasıent adam em alý úshin oqshaýlanypty. Al «Teńiz» ken ornyndaǵy ınfeksııalyq stasıonarda 46 adam emdelýde. Sondaı-aq 538 naýqas úı jaǵdaıynda emdelip jatyr.
Nege ekeni belgisiz, Atyraýda vaksına alý máselesi áli de ótkir kúıinde qalyp otyr. Qazir óńirde 31 stasıonarlyq, 10 jyljymaly vaksınalaý beketi ashylǵanmen, 1 aqpan – 14 maýsym aralyǵynda Spýtnık V, QazVac, HayatVax vaksınalarynyń birinshi komponentin saldyrǵandar sany 66 587 adamǵa jetti. Oblystyq densaýlyq saqtaý basqarmasynyń baspasóz qyzmeti málim etkendeı, maýsymda Atyraýdaǵy farmasevtıkalyq qoımaǵa Spýtnık V vaksınasynyń ekinshi komponenti úshin 39 850 doza jetkizilipti. Biraq bul dozalarǵa Reseıden keletin sertıfıkat keshiktirilip jatyr. Endi sertıfıkattar 16-18 maýsymda jetkiziledi dep kútilip otyr.
Bıylǵy 1 aqpannan beri Atyraý oblysyna Spýtnık V, QazVac Hayat Vax vaksınalarynyń ekinshi komponenti úshin 32 350 doza sertıfıkattarymen birge jetkizildi. Qazir bul komponentti 23 505 adam saldyrdy. Koronavırýsqa qarsy vaksınalardyń ekinshi komponentin alǵandar arasynda 2 298 pedagog, 608 polıseı, 208 stýdent, medısına salasynyń – 2 601, arnaıy mekemelerdiń – 95, quqyq qorǵaý organdarynyń 1 578 qyzmetkeri bar. Sondaı-aq 419 memlekettik qyzmetshi, sozylmaly aýrýy bar 243 adam men jergilikti 15 455 turǵyn ektirdi.
Atyraý oblysy
