Bizdiń Gúlsara Ájibekqyzymen áńgimemiz 1960-2000 jyldardaǵy qyrǵyz-qazaq kınosy, qyrǵyz keremeti dáýirine Aıtmatov, Áýezov, qazaq akterleriniń yqpaly baǵytynda jalǵasty.
– Gúlsara Ájibekqyzy, siz bizge Shyńǵys Aıtmatov pen Tólómúsh О́keevtiń «Qyzyl almasyndaǵy» Sábıra arqyly tanyssyz. Kıno sarapshylar «Shyńǵys Aıtmatovtyń osy attas shyǵarmasynyń ıdeıasyn durystap jetkize almady, bir qaınaýy ishinde qalyp qoıdy» dep synasa da Odaq kóleminde de, halyqaralyq prokatta da tabysty kınolardyń biri bolypty. Lokarno kıno festıvalinde kórermenderdiń kózaıymyna aınalǵan týyndy retinde arnaıy júldege ıe boldy.
– Iá, mundaı kınolar umytylmaıdy, ondaı taqyryptardy qoǵamnyń ózi umyttyrmaıdy. Basynda kınojelidegi kúndelikti qarapaıym turmystyq problema men otbasylyq dramany keńestik psıhologııa qabyldamaıtyndaı kóringen. Biraq kerisinshe bolyp shyqty. Keıin kezdesýlerde baıqaǵanymdaı, fılmniń sıýjeti KSRO-daǵy barlyq otbasyǵa jaqyn boldy. Bir-birin taýyp úılengen baqytty otbasylar da, basqalary da osy kınony kórgen saıyn umyta almaı júrgen mahabbattaryn eske túsirip, otbasynyń tynyshtyǵy men baıandylyǵy úshin júreginiń bir qaltarysyna jasyryp qoıǵan sezim degen aýylǵa bir at shaldyryp qaıtatyny anyq.
Bul kartına eń aldymen kommýnıstik qoǵamnyń jalpy máselelerin emes, jeke adamnyń ishki álemin beıneleýge talpynǵan eń alǵashqy qyrǵyz kınosy bolǵanyn atap ótken jón. Erli-zaıyptylar bir-birin túsinbeı eki jaqqa aıyrylyp ketken otbasylar hıkaıasy týraly kıno kóp. Sol otbasylyq tragedııa balanyń álemine qalaı soqqy jasaıtynyn sonshalyqty bárimizge túsinikti tilmen jáne túsinikti kórinistermen jetkize alǵan jazýshy da, rejısser de sırek. Fılmniń túsirilimi kezinde onyń núktesin qandaı jaǵdaımen túıindeımiz degen máselede pikir kóp aıtyldy. Eń sońǵy sátte «Sábıranyń qyzǵanyshyna túsinistikpen qaraıtyn, Temirdiń jastyq shaǵyndaǵy mahabbatyna adaldyǵyn joǵary baǵalaıtyn kórermender bar. Ekeýin bir-birine jyǵyp bermeıik te, aqtamaıyq ta. Bul – taǵdyr» degen paıymǵa basymdyq berildi. Kınonyń sáttiligi adamǵa emes, taǵdyrǵa basymdyq bergenimen ólshenedi ǵoı. «Qyzyl alma» da sondaı fılmderdiń qatarynda boldy...
– Sol «Qyzyl almada» basty róldi oınaǵan sizdi, Temirdiń rólin somdaǵan Súımenqul Choqmorov jastardyń qatty jaqsy kórgenin, biraq resmı bılik sizdermen kezdesý ótkizýge asa yqylasty bolmapty degen sóz bar.
– Adamdardyń tarıhtan tirek izdeıtini sııaqty, tazalyq pen adaldyqty kınodan, keıipkerinen izdeıtini aqıqat. «Qyzyl almadaǵy» Sábıra joldasynyń ózine degen seziminiń taza bolýyn qalady, árbir qyzǵanyshy arqyly joldasyna qııalyn arbap alǵan arýdy múldem umytyp ketýge jol bermedi. Al Temirdiń júregin jaýlap, saǵymǵa aınalyp ketken arýdy qııalynan qýyp shyǵarýǵa erik-jigeri jetpedi. Biraq «resmı bılik olarmen kezdesý ótkizýge asa yqylasty bolmapty» degendi de, kórermenmen kezdesýge kedergi degendi de estigen, sezgen joqpyz. Kórermenderdiń súıikti akterine degen yqylasynyń kemerinen asyp-tógilip jatatynyn árbir kezdesý saıyn sezýge bolady. Tipti sol jyldary bizdiń elde jańa týǵan balalarǵa Sábıra, Temir degen esimder kóp qoıylǵan.
– Súımenqul Choqmorov týraly estelikter kúni búginge deıin qyrǵyzdyń ulttyq maqtanysh obektisi retinde aıtylatyny sonshalyqty, halyqtyń saǵynyshy, yqylasy júrekke syımaı, aspanǵa juldyz bolyp shashylyp ketetindeı áser qaldyrady. Qazaq kórermenderi sizdiń S.Choqmorovpen birge túsken «Tolqyn jaǵada óledi» fılmine de beıjaı qaramaıdy. Jalpy, Choqmorov qandaı adam bolǵan?
– Choqmorovty jaqyn bilmeıtinder tuıyq, romantık, sezimine adal, sondaı-aq súıgeni úshin qylyshtyń júzimen júrip ótýge daıyn turǵan jan dep qabyldaıdy. Ekrandaǵy Choqmorov ózin ózi oınaıtyndaı kórinetini sózsiz. Ol bir ǵana «Jámıladaǵy» Danııar arqyly pendelikke tereńdik, mahabbat, adaldyqtyń aldynda tize búktirtken talant. Ol kınoda «Gamlet» deńgeıinde jańa obrazdy qalyptastyrdy.
– Gúlsara Ájibekqyzy, 1960 jyldardyń ekinshi jartysy men 1970 jyldardan beri qaraı qazaq-qyrǵyz kınosy bir-birimen tonnyń ishki baýyndaı aralasyp ketti. Qyrǵyz-qazaq akterleriniń qatysýmen túsirilgen «Qasqyrdyń apany», «Qarash-Qarash oqıǵasy», «Tolqyn jaǵada óledi» tárizdi eki eldiń de altyn qoryna engen kınotýyndylar dúnıege keldi.
– Menińshe, eki eldiń rejısserleriniń birigip kıno túsirýine jazýshylary da, tarıhshylary da múddeli bolýy kerek. 1960-1990 jyldar arasynda taspaǵa tartylǵan qyrǵyz-qazaq kınosynyń shoqtyǵyn asqaqtatyp turǵan faktor – keshegi Áýezov, Aıtmatov, Qabdolov, Sherhan Murtazalar arasyndaǵy uly dostyq bolatyn. Kezinde Shoqan Ýálıhanov qyrǵyz manasshylarynyń aýzynan «Manastyń» eń alǵashqy úlgilerin qaǵazǵa jazyp alyp, jaryqqa shyǵaryp, uly epostyń jazbasha saqtalýyna sebepker bolǵanyn, «Manastyń» taǵdyryna qara bult úıirilip turǵanda uly Muhtar Áýezov qorǵap, artyq aýyz sózderge arasha túsip, saqtap qalǵanyn, Aıtmatovtyń «Jámılasyna» joǵary baǵa berýi arqyly jolyn ashqanyn qyrǵyz halqy umytpaıdy. Jekelegen tulǵalar arasyndaǵy dostyqtyń kınoǵa da, ádebıetke de yqpal etkenine biz kýámiz. Qazir sol kúnderdiń bári tarıh, alystaǵan saıyn janyńa jumsaq nur sebelep, rýhtandyryp turady.
– Qazir Áýezov pen Aıtmatov arasyndaǵy dostyqtyń ózi kınoǵa suranyp tur ǵoı. Muny eki eldiń rejısserleri birigip qolǵa alsa, qos alyptyń bizge belgisiz qyrlary jarqyrap ashylar ma edi?
– Keremet ıdeıa. Derek te, kózkórgender de jetedi. «Meniń shetelge shyǵarda tólqujatymdaı qasterlep ózimmen ala ketetin eki uly esim bar. Biri – Manas ta, ekinshisi – Muhtar Áýezov. Men árqashan sol ekeýiniń arýaǵyna syıynyp júremin» degen sóz qaldyrǵan Shyńǵys Aıtmatov Muhańnyń rýhy aldyndaǵy adaldyǵynan kózi jumylǵansha aınyǵan joq. Muhańnyń shyǵarmalarynyń qyrǵyz kınosynda ekrandalýyna Aıtmatovtyń sebepker bolǵany túsinikti.
Al eki alyp týraly kórkem týyndy kezegimen keletin dúnıe ǵoı. Basynan bastasaq, qazaqtyń belgili ǵalymy Beısembaı Kenjebaev pen Shyńǵystyń ákesi Tórequl Máskeýde I.V.Stalın atyndaǵy Kúnshyǵys eńbekshileri kommýnıstik ýnıversıtetinde birge oqyǵanyn, aınymas dos bolǵanyn, Tórequldyń shańyraǵynda dúnıege kelgen sábıge Shyńǵys dep at qoıǵan Beısembaı Kenjebaev ekenin Aıtmatovtyń ózi júrgen jerinde aıtyp júretin. Jalpy Aıtmatovty Qazaqstanmen baılanystyratyn faktor kóp.
– Qyrǵyz ádebıeti men kınosyn Aıtmatov keıipkerleriniń ólsheminsiz elestetý múmkin emes. Biraq jańa ıdeıamen alǵa jyljý kerek. Qyrǵyzdyń jas rejısserleri Aıtmatovtyń shyǵarmashylyǵyna qalaı qaraıdy?
– Dúnıe jaralǵaly beri jer betinde qansha án, qansha kúı jazylǵanyn eshkim bilmeıdi. Biraq álemdegi án qudiret – jeti notanyń tóńireginde taraıdy. Sol jeti notanyń bir-birinen aıyrmashylyǵyn ǵalymdar qansha zerttese de, túpkilikti sheshimge árkim ártúrli qyrynan kelipti. Men kıno zertteýshisi emespin. Biraq kıno men ádebıettiń múmkindigin sol jeti notaǵa uqsatamyn. Osy salaǵa den qoıyp júrgen mamandar ádebıet pen kıno tek júz shaqty taqyryptyń tóńireginde ǵana damıtynyn anyqtaǵan. Ádebı týyndylardyń birazy álemniń birneshe elinde kınoǵa taspalanǵan Aıtmatov shyǵarmalary jaıly da osyny aıtýǵa bolady. Mysaly, 1990 jyly Keńes Odaǵy «Máńgúrt» atty fılm shyǵardy. Fılm oqıǵasyn «Ǵasyrdan da uzaq kún» romanynyń ishindegi bir baıandaýshy oqıǵa boıynsha Marııa Iýrmatova jazǵan bolatyn. Bul kıno Qoja Narlıevtiń rejısser retinde usynǵan eń sońǵy fılmi. Arada 14 jyl ótkende qyrǵyz rejısseri Baqyt Qaraǵulov osy taqyrypqa qaıta oraldy. Árıne eki kınonyń bıýdjetin bir-birimen salystyrýǵa bolmas. Alǵashqysy Keńes Odaǵy kezinde Túrkııa, Lıvııa rejısseriniń qatysýymen túsirilse, sońǵysyn qyrǵyz rejısserleri túsirdi. Men kıno synshysy bolmasam da kınonyń qaı baǵytta ketip bara jatqanynan habarym bar. Aıtmatov shyǵarmalarynyń biz zerdeleı almaǵan qyrlaryna keıingi tolqyn nazar aýdarady dep úmittenemin.
Álemdik ádebıetke máńgúrt ıdeıasy Shyńǵys Aıtmatov shyǵarmalary arqyly engeni belgili. Aıtmatov shyǵarmasynyń jelisi boıynsha Máńgúrt obrazy ekrandaldy. Osy fılmnen keıin adamzat balasy atalǵan faktorǵa qoǵamdyq qubylys retinde erekshe mán berip qarady. Sodan bergi álemdik kınoındýstrııada «adamnyń múmkindigi jetilgen saıyn onyń sanasy ońaı basqarylady» degen uǵym aınalysqa endi. Qazirgi mıǵa baǵdarlama qondyrý arqyly basqarylatyn robot-termınator adamdardyń túp negizi – bizdiń Aıtmatovtyń Máńgúrtinen bastaý alyp jatyr. Bul uǵymnyń aıasy ýaqyt ótken saıyn ártaraptandyrylyp kele jatqanyn kórip júrmiz. Bul másele – bizden keıingi tolqynnyń birinshi kezekte nazar aýdaratyn baǵyty.
– 1960-1990 jyldardaǵy qazaq-qyrǵyz kınolarynda ulttyq qundylyqtar basym boldy, al qazirgi úrdis kommersııaǵa basymdyq beretin sekildi.
– Menińshe, kommersııalyq baǵyt pen ulttyq qundylyqtardy bir-birine qarsy qoıýǵa bolmaıdy. Kıno bızneske aınaldy. Múmkindik bolsa, eki salany kıno ındýstrııanyń qos qanaty retinde qatar damytsaq qana kommersııalyq baǵytta básekelestik paıda bolady. Bizdegi kommersııalyq kıno – ázirge Gollıvýd fılmderinen úırenýge, shablondar men shtamptardy sińirýge tyrysý prosesin bastan keship jatqan ózinshe bir álem. Qansha eliktesek te taqyryp jaǵynan da, tehnıkalyq jaraqtaný jaǵynan da olarmen teńesken joqpyz. Taqyryp jaǵynan ózekti bolsa da keıipkerdiń janyn zertteý, múmkindik bolsa dramalyq jaǵyna kóńil bólý kemshil túsip jatyr. Pikir týdyrmaıtyn, jaqsy da emes, jaman da emes, maqtaý da, dattaý da qıyn kınolar kóbeıip, kóńil pás tartyp qalǵan edi.
Qazirgi kınoda ózgeris te bar, alǵa jyljýshylyq ta bar. Kınoındýstrııanyń basynda júrgen jas tolqyn esin tez jıdy, kórermenniń talǵamyn zerttep jatyr. Eń bastysy, kıno ındýstrııasy ebin tapqan adamǵa eń tabysty salanyń biri bolaryna kózin jetkizdi. Árbir shyǵarmashylyq ókili aldyndaǵy taqyrypqa óz mıkro kosmosymen qarap, kókirek kózi qabyldaǵan dúnıeni ekrandaýǵa tyrysady. Sońǵy jyldary jaryqqa shyqqan dúnıelerden fılosofııalyq oı aǵysy, eldik kórkem murattardyń elementteri baıqalady, tyń ıdeıa, jańa keıipkerler izdeýge talpynys bar. Ideologııalyq kınonyń qajettigi týraly bir toqtamdy pikir joqtyǵy ár jerde baıqalyp júr. Memleket bolǵan jerde ıdeologııanyń qosa júretini, odan eshqaıda qashyp qutyla almaıtynymyz aqıqat. Kıno – ıdeologııalyq qural bolǵandyqtan, memleket óziniń mıssııasyna qattyraq kóńil bólse, qazaq-qyrǵyz kınolarynyń altyn dáýirin kózben kóretin bolamyz.
– Qazirgi qyrǵyz kınolary úshin «qany jerge tambaı turǵan taqyryptar» týraly aıtyńyzshy. Qyrǵyz qoǵamynyń kóńilinen shyǵatyn keıipker qandaı bolýy kerek?
– Qazir qany jerge tambaıtyn taqyryp izdeý kommersııalyq baǵyttaǵy kınonyń tabıǵatyna jaqyn. Biraq bul ustanym qazirgi baǵyttyń ólshemi bolýǵa jaramaıdy.
Rejısser Sadyq-Shernııazdyń «Qurmanjan datqasy» kyrǵyz kınosynyń rýhyn kóterip, ulttyq bolmysty jetildiretin týyndy dep qabyldanyp, qandaı kıno tartymdy degen máselege núkte qoıǵandaı boldy. Qazirgi kınoǵa tarıh ótkenimizdi umyttyrmaý úshin kerek. Al qazir ıdeologııanyń ózi ıntegrasııalanyp bara jatqan zamanda álemniń kez kelgen buryshynda ulttyq bolmysyńdy erekshelendirip, asqaqtatyp otyratyn baǵyt jaqyn. Qazirgi jastardyń halyqtyq kıno týraly túsinigi bizdiń túsinikten múldem basqa. Biz ulttyq múddege óz ólshemimizben qaradyq. Kóshpendiler rýhyn saqtap qalýǵa tyrysqan jankeshtiliktiń jańǵyryǵy bizdiń kınodan baıqaldy. Al jastardyń kózqarasy basqa. Jaltyraǵan nemese syldyraǵan pafosqa basymdyq berýge ýaqyty da, nıeti de joq. Tek qana ult retinde ózin ózi joǵaltyp, tamyrynan ajyrap qalmaýǵa, alǵa jyljýǵa basymdyq bergisi keledi. Sebebi qazaq ta, qyrǵyz da joǵaltqany kóp ult. Sondyqtan qazirgi jastardyń mıssııasy bizden on ese aýyr. Jastar kishkentaı ultyn kóshi ozyq halyqtardyń qasyna aparyp qondyrǵysy keledi. Álemdik ıntegrasııanyń kókparynda shań jutyp qalýyn qalamaıdy. Jol bergisi kelmeıdi. Qazirshe betalys durys. Aldaǵy ómir, aldaǵy betalys – Allaǵa amanat.
– Eki eldiń merzimdi basylymdarynda jarııalanyp jatqan kıno-synnyń betalysyna qarasaq, ótkendi, 1960-1970 jyldardaǵy qazaq-qyrǵyz kınosy altyn dáýirin ańsaý basym. Eki eldiń kınosynyń bir-birinen ajyrap qalýynan joǵaltqanmyz kóp deıdi. Siz ne deısiz?
– О́tkenge kóp qaraılaý, ańsaý búginniń betalysyn túsinýge múmkindik bermeıtin sııaqty. Qazaq akterlerimen kıno alańdarynda birge kınoǵa túsip júrgen kezder maǵan jaqyn, saǵynamyn. Jastarǵa syn aıta bilgen aǵa býyn olarǵa múmkindik berýdi de umytpaýy kerek. Jastar biz tárizdi emes, jeti eldiń tilin meńgergen jáne álemdik ádebıetti, tarıhty túpnusqada oqýǵa, álemdik deńgeıdegi túpnusqada kórip, ony ultynyń bolmysymen salystyrýǵa múmkindik bar. «Bizdiń sońymyzdan myqty tolqyn kele jatyr. Biz soǵan daıyn bolýymyz kerek» degendi Shyńǵys Aıtmatov ta jıi aıtatyn. Basqa eldiń jastary úshin eshteńe deı almaımyn. Biraq qyrǵyz jastary baıaǵy biz salyp ketken dástúrdi jańǵyrtýǵa, Ortalyq Azııa elderine ortaq kıno keńistikti qurýǵa daıyn ekenderin ishki túısikpen sezemin.
– Siz fılmge birge túsken qazaq akterlerimen aralasyp turasyz ba?
– Kınodaǵy «qyrǵyzdyń altyn dáýiriniń» qalyptasýyna Nurmuhan Jantórın, Ydyrys Noǵaıbaev, Kenenbaı Qojabekov, Muhtar Baqtygereev sııaqty qazaq akterleri kóp úles qosty. Sol sııaqty kınodaǵy qazaq kınosynyń dáýirlegen kezeńinde qyrǵyz akterleriniń de qoltańbasy bar.
Bul taǵy da Ortalyq Azııadaǵy bes el barlyq salada kúsh jumyldyrsa, alynbaıtyn qamaldyń joq ekenin aldymyzǵa tosyp tur. Qyrǵyz-qazaq kınosynda eki eldiń akterleriniń bir-birinen irgesi alystaǵan kezin esime túsire almaı turmyn. Sonaý 1968 jyly «Jámıladan» bastap 2004 jyly «Naıman anaǵa» deıin birge kele jatyrmyz. Araǵa jyldar salyp kezdese qalsaq, keshe ǵana qoshtasqandaı, qaıta tabysamyz. Ýaqyt, tipti memlekettik shekara, saıasat bizderdiń syılastyǵymyzǵa ámirin júrgize almaıdy. Qazir de osy baǵyt qaıta jandanyp kele jatyr. Qyrǵyz-qazaqtyń jas prodıýserleriniń bir-birimen jıi kezdesip turatynyn kórip júrmiz.
– Sizdiń sulýlyǵyńyz da, minezińiz de dramaǵa jaqyn. Biraq ár adamnyń ishinde onyń ómirdegi minezine múldem uqsamaıtyn «asaý, basqasha aıtqanda, qalypqa syımaıtyn tentekteý syńary» jasyrynyp jatady deıdi. «Qyzyl almadaǵy» sulý, názik, tipti aspandaǵy qustyń kóleńkesinen jany jaýrap qalatyn Sábıra sulý sizdi shekpeninen shyǵarmaı, shyǵarmashylyǵyńyzǵa obal jasaǵan joq pa?
– Iá, halyqtyń yqylasynyń keıde birjaqty ketip, ózderi qalaǵan shekpeninen shyǵarmaı qoıatyny ras. «Kórermeni áriptesimiz Asekeń, asa qymbatty Asanálini «Qyz-Jibektegi» Bekejannan keıin biraz ýaqytqa deıin basqa rólge qabyldamaýǵa tyrysty» degendi biz de estigenbiz. Biraq Asekeń san qyrlylyǵymen Bekejannyń shekpeninen shyqty. Moıyndatty. Kınoda ekiniń birine Asekeń bolyp qalyptasýdy jazbaǵan.
Meniń kınodaǵy janrym – drama. Jaraly júrek, jaýapsyz mahabbat, tipti sezimniń adasyp ketken sátterin somdaý maǵan jeńil beriledi. Jan-jaǵym meni jaǵymsyz keıipker retinde qabyldaı almaıtyndaı túsiniktiń qalyptasyp qalǵanyn men de sezemin. Biraq men úshin jaǵymdy nemese jaǵymsyz keıipkerdiń aıyrmashylyǵy joq. Akter ózi oınaǵan personajdyń logıkasyn, tabıǵatyn túsinbese, ol akterge de, kórermenge de tartymsyz bolady. Keshegi ótken Bolot Shámshıev akter óz róliniń astarynda tyǵylyp jatqan ózekti izdegen saıyn ról de qyzyq bolatynyn, rólińniń ózegi tabylǵan kúni keıipkerińniń syry ashylyp, birtutas adamǵa aınalatynyn jıi aıtatyn. Qyrǵyz kınosynda Súımenqul jaǵymdy jáne jaǵymsyz ról týraly túsinikti keıipker men kórermen arasyndaǵy garmonııa qalyptastyratynyn dáleldep ketken akter edi.
Jastaý kúnimde kózim jáýdirep, úlbirep turǵan soń rejısserler jaǵymsyz róldi qımaǵan shyǵar, ekrandaǵy sulý qyzdardy somdaýdy menshiktep alǵym kelgen erkelik te bolǵan shyǵar. Biraq siz aıtpaqshy «jastaý kúnimde ishte tyǵylyp jatqan asaý, tentekteý syńarymdy» keıinirek teatrda bosattym. Nemis dramatýrgy Bertolt Brehtiń «Jankeshti anasynda» Katerınany alyp shyqtym. Keıde osylaı ishte tyǵylyp jatqan senen tentekteý syńaryńa erik berý adamǵa psıhologııalyq turǵyda jaılylyq, jeńildik ákeledi eken.
– Qazirgi ómirińizde kınoǵa oryn bar ma?
– Kınonyń tabıǵaty adam sııaqty. Qabyldaıdy nemese qabyldaı almaıdy. Bul tabıǵatym kınodan alystap ketti degendi bildirmeıdi. Táýelsizdik alyp, qoǵamdyq formasııalardyń birinen soń biri almasyp jatqan kezeńde kınodaǵy jas sulýlardy, erke kelinshekterdi oınaýǵa jasymyz asyp ketti, aq shashty ájelerdi oınaýǵa da erteleý boldy. Keıin saıasatqa aralasyp, boıdaǵy qandy sýytyp aldyq. Dál qazirgi ómirimdi kınomen baılanystyratyndaı sebep kórip turǵan joqpyn. Biraz kınoǵa tústim, qazir de usynys bar. О́zimniń múmkindigimniń nege jetetinin synap kórýge ýaqyt bergeni úshin, «qyrǵyz kınosynyń keremeti» atanǵan kezeńdi qalyptastyrýǵa múmkindik bergeni úshin Allaǵa rızamyn.
– Kıno úshin tipti alańdamaısyz ba?
– Jastarda áreket bar, syrttaı baqylaımyn, qyzyǵamyn. Kedergilerge moıynsunbaıdy, bir jerde esik jabylyp qalsa, basqa esikti ashýdan júreksinbeıdi. Biz de kınoǵa solaı kelgenbiz. Júgirdik, kózge túsýge tyrystyq, kezdesýlerde kórermenderimiz aldynda erekshelenip kórinýge tyrystyq. Qazir birazdan beri kınodan qol úzip qaldym. Biraz jyldarym bızneske, saıasatqa ketti. Adam bir teriniń ishinde birde tolady, birde solady deıdi. Jas jerortadan aýǵanda taǵdyrdyń synaǵynan da óttik. Eshkimge ókpe joq, bul synaqty Allanyń tózimimdi ózime synatýǵa jibergen múmkindigi dep qabyldadym. Jas ta jetpisten asyp barady. Kınoda birge júrgen joldastardyń birazy aramyzda joq. Endi biri alys-jaqyn shetelderde júr. Biraq qazirgideı aqparattyq tehnologııanyń jetilgen zamanynda jerdiń qashyqtyǵy syılastyqtyń sýyp qalýyna kedergi bola almaıdy eken.
– Áńgimeńizge rahmet.
Áńgimelesken Gúlbarshyn AITJANBAIQYZY,
«Egemen Qazaqstan»
ALMATY
